ယူနိုက်တက်၊ ချဲလ်ဆီးနဲ့ လီဗာပူးတို့က ချိတ်ဆက်နေပေမယ့် ဘရိုက်တန်နည်းပြ ဒီဇာဘီက အသင်းမှာ ပျော်ရွှင်နေကြောင်း အခိုင်အမာပြောကြားလိုက်ပါတယ်။

အသက် ၄၄ နှစ်သားဟာ ကမ္ဘာဘောလုံးလောကရဲ့ထိပ်တန်းနည်းပြတွေထဲက တစ်ဦးအဖြစ် သတ်မှတ်ခံထားရပြီး ပြီးခဲ့တဲ့ရာသီတုန်းက ဘရိုက်တန်အသင်းကို အဆင့် ၆ နေရာနဲ့ သမိုင်းတစ်လျှောက် ပထမဆုံးဥရောပဝင်ခွင့်နေရာရယူပေးနိုင်ခဲ့ပါတယ်။ ပေါ်တာ နေရာမှာ အစားဝင်လာပြီးကတည်းက ဒီဇာဘီဟာ ဆွဲဆောင်မှုရှိတဲ့ကစားဟန်ကြောင့် ချီးကျူးခံနေရတာဖြစ်ပါတယ်။


အီလတီသားဟာ အသင်းရဲ့အဓိကကစားသမားတွေဖြစ်တဲ့ ကိုင်စီဒို ၊ အလစ္စတာ ၊ ဆန်းချက်ဇ်တို့ ထွက်ခွာခဲ့ပေမယ့် အသင်းရဲ့စွမ်းဆောင်ရည်ကို မကျဆင်းအောင် လုပ်ဆောင်ထားနိုင်ခဲ့ပါတယ်။ ဒီဇာဘီရဲ့စွမ်းဆောင်ရည်ကောင်းတွေကြောင့် အင်္ဂလန်ထိပ်တန်းအသင်းတွေဖြစ်တဲ့ ယူနိုက်တက် ၊ ချဲလ်ဆီး နဲ့ လီဗာပူးအသင်းတွေက စိတ်ဝင်စားနေကြပါတယ်။

ဒီဇာဘီကတော့ အီတလီမြေကို ပြန်ဖို့ ဆွေးနွေးမှုတွေရှိနေသလို ရိုးမားနဲ့ယူ ရိုပါလိဂ်ပွဲမတိုင်ခင် ဘရိုက်တန်နည်းပြက အခုလိုမျိုးပြောကြားခဲ့ပါတယ်။ “အဲ့တာက မမှန်ပါဘူး။ ကျွန်တော် အဲ့အကြောင်းမတွေးဖြစ်ပါဘူး။ ဒါပေမယ့် ကျွန်တော် ကြိုက်နှစ်သက်တာကိုပဲ လုပ်ပါတယ်။ ကျွန်တော်ပျော်ရွှင်တဲ့အရာကိုပဲ လုပ်ပါတယ်။ အခုချိန်မှာတော့ အဲ့နေရာမှာ ကျွန်တော်ရှိနေပါတယ်။ ထိပ်တန်းအဆင့်ရှိတဲ့ အသင်းတွေနဲ့ ကစား‌နေရတာ ကျွန်တော်ကံကောင်းတယ်လို့ ထင်ပါတယ်။ အနိုင်ရချိန်မှာ အဲ့တာက ကျွန်တော်ကိုပျော်ရွှင်စေပါတယ်။ ဒါပေမယ့် အရေးနိမ့်ချိန်မှာတော့ အဲ့တာက တစ်စုံတစ်ခုထူးခြားတယ်လို့ ခံစားရပါတယ်။ တစ်နေ့မှာတော့ ကျွန်တော် အီတလီမြေကိုပြန်နိုင်ပါတယ်။ အဲ့နေ့က ဘယ်ချိန်ရောက်လာမလဲဆိုတာ ကျွန်တော်မသိပါဘူး။ ဒါပေမယ့် အဲ့တာက မှန်ပါတယ်။ ရှက်တာကိုသွားဖို့ ကျွန်တော် ရွေးချယ်ခဲ့တာဆိုတာ မှန်ပါတယ်။ အီတလီမြေပြင်ပမှာ အတွေ့အကြုံအသစ်တွေရှာဖွေချင်ခဲ့ပါတယ်။ အဲ့တာကြောင့် ထွက်ခွာလာခဲ့တာပါ”လို့ ဒီဇာဘီက ပြောကြားခဲ့ပါတယ်။

ဘရိုက်တန်ကတော့ ဒီဇာဘီထွက်ခွာမှုကို တားဆီးနိုင်မှာမဟုတ်ပေမယ့် ဘရိုက်စီအီးအို ပေါလ်ဘာဘာကတော့ ဒီဇာဘီကိုအသင်းမှာဆက်ထိန်းနိုင်လိမ့်မယ်လို့ ယုံကြည်နေပါတယ်။

“ကျွန်တော်တို့ သူ့ကိုမဆုံးရှုံးချင်ပါဘူး။ သူက ထူးချွန်တဲ့နည်းပြပါ။ ကမ္ဘာ့အကောင်းဆုံး နည်းပြတွေထဲကတစ်ဦးပါ။ အဲ့တာကြောင့် သူကဆွဲဆောင်မှုရှိနေတာပါ။ ဒီဇာဘီက ဘရိုက်တန်ကို ချစ်တယ်လို့ ကျွန်တော်ထင်ပါတယ်။ သူက အသင်းနဲ့ အသင်းဝန်ထမ်းတွေ ၊ အသင်းတည်ဆောက်ပုံကိုချစ်ပါတယ်။ အဲ့တာကပဲ သူ့အတွက်ကော ကျွန်တော်တို့အတွက်ပါ ကောင်းမွန်စေတာပါ။ ဒါပေမယ့် သူ့အနာဂတ်နဲ့ပတ်သက်ပြီး ပြောစရာအချို့ရှိနေပါတယ်။ သူဘယ်မှာ ရှိရမလဲပေါ်မူတည်ပြီး သူရွေးချယ်နိုင်ပါတယ်။ ကျွန်တော်တို့ အဲ့တာကို နားလည်ပါတယ်”လို့ ဘာဘာက ပြောကြားခဲ့ပါတယ်။

ဒီဇာဘီဟာ ဘရိုက်တန်အသင်းနဲ့ ၄ နှစ်စာချုပ် ချုပ်ဆိုထားတာဖြစ်ပြီး စာချုပ်ဖျက်သိမ်းကြေးအဖြစ် ပေါင် ၁၂ သန်း ပါရှိတယ်လို့ သိရပါတယ်။