ဘာစီလိုနာကြယ်ပွင့်လီဝန်ဒေါစကီးကတော့ လာမယ့်သီတင်းပတ်တွေအတွင်း ၂၀၂၄-၂၀၂၅ ဘောလုံးရာသီ၊ ပီချီချီဆုကို သိမ်းပိုက်နိုင်ဖို့အတွက် အစွမ်းကုန်ပြင်ဆင်နေပါပြီ။ လာလီဂါချန်ပီယံပြေးလမ်းမှာ ဘာစီလိုနာတို့ သုံးမှတ်အသာဖြင့် ဦးဆောင်နိုင်စေရန် ဟန်စီဖလစ်ခ်ရဲ့အသင်းက ဒေသတွင်းပြိုင်ဘက်ဂျီရိုနာကို  ၄-၁ ဂိုးဖြင့် အနိုင်ရရှိတဲ့ပွဲစဉ်မှာ လီဝန်ဒေါစကီးက ဒုတိယပိုင်းပွဲချိန်အတွင်း နှစ်ဂိုးသွင်းယူခဲ့ပါတယ်။

အခုဘောလုံးရာသီအတွင်း လီဝန်ဒေါစကီးရဲ့ခြေစွမ်းပိုင်းက ဘာစီလိုနာရဲ့ချန်ပီယံဆုဖလားများခရီးလမ်းမှာ အရေးပါတဲ့အခန်းကဏ္ဍတစ်ခုအဖြစ် တည်ရှိနေပြီး ပြိုင်ဘက်ဂိုးပေါက်ရှေ့တိုက်စစ်မှူးရဲ့လုပ်အားနှုန်းမှာလည်း အံ့မခန်းဖြစ်နေပါတယ်။ ဂျီရိုနာနဲ့ပွဲစဉ်မှာရရှိခဲ့တဲ့သွင်းဂိုးတွေကြောင့် ပီချီချီ[လာလီဂါရွှေဖိနပ်ဆု]ဆုအတွက် အမ်ဘာပေ( ၂၂ ဂိုး)နဲ့ နှိုင်းယှဉ်ရင် သုံးဂိုးအသာ(၂၅ ဂိုး)ဖြင့် လီဝန်ဒေါစကီးအတွက် အနည်းငယ်အသက်ရှုချောင်စရာ ဖြစ်လာပါတယ်။

အခုအချိန်မှာတော့ လီဝန်ဒေါစကီးက ဘာစီလိုနာကစားသမားဘ၀ အကောင်းဆုံးဘောလုံးရာသီကို ပိုင်ဆိုင်ထားပြီး လာလီဂါသွင်းဂိုး ၂၃ ဂိုးဖြင့် ပီချီချီဆုရရှိခဲ့တဲ့ ၂၀၂၂-၂၀၂၃ ဘောလုံးရာသီအတွင်း ရရှိခဲ့တဲ့ ပြိုင်ပွဲစုံသွင်းဂိုး ၃၈ ဂိုးလည်း လိုက်မီသွားခဲ့ပါတယ်။

တိုက်စစ်မှူးက ဘာစီလိုနာကစားသမားဘဝမှာ စုစုပေါင်း ၉၇ ဂိုးအထိ သွင်းယူခဲ့ပြီး လာမယ့်လအတွင်း ၃၆ နှစ်ဆိုတဲ့ ဇရာကို အံတုကာ ရာပြည့်ဂိုးသွင်းယူနိုင်ဖို့ မျှော်လင့်ထားတယ်လို့ ထုတ်ပြောလာပါတယ်။ လီဝန်ဒေါစကီးက “ ကျွန်တော့်ရဲ့အသက်အရွယ်အကြောင်း လူအတော်များများပြောဖြစ်နေကြတာကို ကျွန်တော်သိပါတယ်။ ဒါပေမယ့် ကျွန်တော်က အခုလိုအချိန်အထိ ဘောလုံးကစားနိုင်ဖို့ အသက် ၂၁ နှစ်၊ ၂၂ နှစ်အရွယ်ကတည်းက ကြိုတင်ပြင်ဆင်ခဲ့တာပါ။

ကိန်းဂဏန်းအချက်အလက်တွေကို ပြန်ကြည့်လိုက်မယ်ဆိုရင်လည်း လွန်ခဲ့တဲ့နှစ်အနည်းငယ်နဲ့ အခုအချိန်က ဘာကွာခြားမှုမှမရှိဘူးဆိုတာ တွေ့ရပါမယ်။ ဒါပေမယ့် အရေးအကြီးဆုံးအရာကတော့ အသင်းပါပဲ။ ဒီနေ့၊ ဂျီရိုနာနဲ့ပွဲစဉ်လို အာရုံစူးစိုက်မှုမျိုးရှိနေမယ်ဆိုရင် ကျွန်တော်တို့အသင်းက ရာသီကုန်မတိုင်ခင်အထိ ဘောလုံးကို ပျော်ပျော်ရွှင်ရွှင်ကစားသွားနိုင်ကာ ပြိုင်ဘက်ကို အန္တရာယ်ပေးနိုင်ပါလိမ့်မယ်”လို့ ပြောပါတယ်။

ဘာစီလိုနာအသင်းက အခုသီတင်းပတ်အတွင်း မက်ဒရစ်မြို့တော်မှာ အက်သလက်တီကိုမက်ဒရစ်နဲ့ ကိုပါဒယ်လ်ရေးဖလားဆီမီးဖိုင်နယ်အဆုံးအဖြတ်ပွဲစဉ်ကို ယှဉ်ပြိုင်ကစားရပါမယ်။ ဒါကြောင့် လီဝန်ဒေါစကီးရဲ့ နောက်ထပ်သွင်းဂိုးတွေအတွက် အခွင့်အရေးတစ်ခု ရကောင်းရနိုင်ပါတယ်။ ဒါပေမယ့် ဂျီရိုနာနဲ့ပွဲစဉ်မှာ အရန်ခုံတန်းမှတဆင့် ဝင်ရောက်ကစားပြီး နောက်ဆုံးသုံးပွဲဆက်ဂိုးသွင်းယူနိုင်တဲ့ မှတ်တမ်းကို ပိုင်ဆိုင်သွားခဲ့တဲ့ ဖာရန်တောရက်စ်နဲ့အတူ ဟန်စီဖလစ်ခ်မှာ ပွဲထွက်တိုက်စစ်ပိုင်းအတွက် အလှည့်အပြောင်းပြုလုပ်နိုင်မယ့် အခွင့်အလမ်းတစ်ရပ် ရှိနေပြန်ပါတယ်။

ဖာရန်တောရက်စ်က ဖေဖော်ဝါရီလအတွင်း အက်သလက်တီကိုမက်ဒရစ်နဲ့ လေးဂိုးစီသရေကျခဲ့တဲ့ ကိုပါဒယ်လ်ရေးဖလားဆီမီးဖိုင်နယ်ပထမအကျော့ပွဲစဉ်မှာ ပွဲထွက်ခွင့်ရရှိခဲ့ပေမယ့် နောက်ပိုင်းမှာ လီဝန်ဒေါစကီးနဲ့ လူစားလဲလှယ်ခဲ့ရပါတယ်။ ပိုလန်တိုက်စစ်မှူးကတော့ အဲ့ဒီပွဲစဉ်မှာ အသင်းရဲ့စတုတ္ထမြောက်ဂိုးကို သွင်းယူပေးခဲ့ပါတယ်။