ဆွီဒင်နည်းပြဂရေဟမ်ပေါ်တာက ကမ္ဘာ့ဖလားခြေစစ်ပွဲရှုံးထွက်အဆင့်ပွဲစဉ်မှာ ပိုလန်ကိုအနိုင်ရရှိခဲ့ပြီးနောက် "စိတ်နဲ့လူ မကပ်တော့ဘဲ ကိုယ်ပျောက်သွားသလို ခံစားရတဲ့ အတွေ့အကြုံ" လို့ တင်စားပြောဆိုလိုက်ပါတယ်။

ချယ်လ်ဆီးနဲ့ ဘရိုက်တန်နည်းပြဟောင်းက ဆွီဒင်အသင်းကို လာမယ့်နွေရာသီပြိုင်ပွဲအတွက် ခြေစစ်ပွဲအောင်မြင်ဖို့အတွက် အကောင်းဆုံးစွမ်းဆောင်ပေးနိုင်ခဲ့ပါတယ်။

ပိုလန်နဲ့ပွဲစဉ်ရဲ့ ပွဲချိန် ၈၈ မိနစ်မှာ အာဆင်နယ်တိုက်စစ်မှူးယောကရက်စ်ရဲ့ အဖိုးတန်အနိုင်ဂိုးနဲ့အတူ ဂရေဟမ်ပေါ်တာရဲ့အသင်းက ၃-၂ ဂိုးဆိုတဲ့ရလဒ်ဖြင့် အနိုင်ရရှိခဲ့ပါတယ်။

ပွဲစဉ်အပြီး ပေါ်တာက "တကယ်ပြောရရင် ကျွန်တော့်ကိုယ်ကျွန်တော် ဘယ်ရောက်နေမှန်းတောင် မသိတော့ဘဲ ကိုယ်ပျောက်သွားသလို ခံစားလိုက်ရတယ်။ အသင်းဂိုးသွင်းလိုက်တဲ့အချိန်မှာ အရန်ခုံမှာရှိနေသူတွေအားလုံး ကွင်းထဲပြေးဝင်သွားတာကို ကြည့်ပြီး 'ငါ တကယ် ဒီမှာရှိနေတာလား' လို့တောင် ကိုယ့်ကိုယ်ကိုယ် ပြန်မေးမိတယ်၊ ဒါဟာ ကျွန်တော့်ဘဝမှာ အမြဲတမ်းတန်ဖိုးထားနေမယ့် အခိုက်အတန့်တွေအနက် တစ်ခုပါပဲ" လို့ ပြောပါတယ်။

"တကယ့်ကို အံ့ဩဖို့ကောင်းတဲ့ ညတစ်ခုပါ။ ဒီလိုပွဲမျိုးမှာ ပါဝင်ခွင့်ရတယ်ဆိုတာ တကယ့်ကို ဂုဏ်ယူစရာကောင်းသလို မယုံနိုင်စရာ အတွေ့အကြုံတစ်ခုလည်း ဖြစ်ပါတယ်။ အသင်းအတွက်လည်း အရမ်းဝမ်းသာမိပါတယ်။ ပွဲကတော့ တကယ်ခက်ခဲခဲ့ပေမဲ့ အသင်းသားတွေအတွက် တကယ်ကို ဂုဏ်ယူပါတယ်။ စိတ်လှုပ်ရှားစရာကောင်းသလို ခံစားချက်တွေနဲ့ အနိုင်အရှုံးအပေါ် ဖိအားတွေကိုထိန်းချုပ်ဖို့ ခက်ခဲတဲ့ ပွဲစဉ်တစ်ခုပါပဲ" လို့လည်း ဆိုပါတယ်။

ပေါ်တာက ဆွီဒင်အသင်းဆီစရောက်လာချိန် အသင်းမှာ စိတ်ဓာတ်ပိုင်းဆိုင်ရာ ထိခိုက်နေတဲ့အခြေအနေ ရှိနေခဲ့ပြီး ဘယ်လိုမျိုး ပြန်လည်မြှင့်တင်ပေးခဲ့ရတယ်ဆိုတာကိုလည်း ရှင်းပြခဲ့ပါတယ်။

"အသင်းသားတွေကို စည်းလုံးအောင် အဓိကထား ကြိုးစားခဲ့ပါတယ်။ အသင်းမှာ အရည်အချင်းရှိတဲ့ကစားသမားတွေ ရှိပေမဲ့ တစ်ဦးချင်းအရည်အချင်းကောင်းရုံနဲ့တော့ မလုံလောက်ပါဘူး၊ အထူးသဖြင့် နိုင်ငံတကာအဆင့်မှာပေါ့။ အသင်းကို စည်းစည်းလုံးလုံးဖြစ်အောင် ကြိုးစားခဲ့ပြီး အဲဒါကိုပဲ အခြေခံအဖြစ် တည်ဆောက်ခဲ့ရပါတယ်။ ပြီးတော့ ပြိုင်ဘက်ကို ဒုက္ခပေးနိုင်တဲ့ ကစားသမားတွေလည်း ကျွန်တော်တို့ဆီမှာ ရှိပါတယ်။ နောက်ဆုံးမှာတော့ အသင်းတစ်ခုလုံး စုပေါင်းပြီး တစ်ဦးအတွက် တစ်ဦး ဘယ်လိုတိုက်ပွဲဝင်ခဲ့ကြသလဲဆိုတာသာ အရေးကြီးဆုံးဖြစ်ပြီး ကျွန်တော့်အသင်းအတွက် တကယ်ကို ဂုဏ်ယူပါတယ်" လို့ ပြောကြားခဲ့ပါတယ်။