အစ်ဆွစ်နဲပွဲစဉ်မှာ နှစ်ဂိုးသွင်းယူပြီး ခြေစွမ်းပြကစားနိုင်ခဲ့တဲ့ ဖိုဒန်ကို မန်စီးတီးနည်းပြပက်ဂွါဒီယိုလာက ချီးကျူးဂုဏ်ပြုခဲ့ပါတယ်။ ပို့စ်မန်းရုတ်ဒ်ကွင်းအတွင်း အစ်ဆွစ်ကို ခြောက်ဂိုးပြတ်အနိုင်ရရှိတဲ့ပွဲစဉ်မှာ ဖိုဒန်က မန်စီးတီးအတွက် သွင်းဂိုးနှစ်ဂိုးရယူပေးခဲ့ပြီး အသင်းကို အမှတ်ပေးဇယားထိပ်ဆုံးလေးသင်းစာရင်းပြန်လည်ဝင်ရောက်နိုင်အောင် ကူညီပေးခဲ့ပါတယ်။ ပြီးခဲ့တဲ့ဘောလုံးရာသီ၊ PFA တစ်နှစ်တာအကောင်းဆုံးကစားသမားဆုရှင်က အခုဘောလုံးရာသီမှာတော့ စွမ်းဆောင်ရည်ကောင်းတွေ ပြသနိုင်ရေးရုန်းကန်ခဲ့ရပြီး မန်စီးတီးအသင်းအပေါ် အကျိုးပြုပေးနိုင်ခြင်းလည်း မရှိခဲ့ပါဘူး။ ဒါပေမယ့် ပရီးမီးယားလိဂ်နောက်ဆုံးသုံးပွဲမှာ ငါးဂိုးအထိ သွင်းယူနိုင်ခဲ့ပြီးနောက် လမ်းကြောင်းမှန်ဆီ ဖိုဒန် ပြန်လည်ရောက်ရှိလာပါပြီ။

ပွဲစဉ်အပြီး သူ့ရဲ့ကြယ်ပွင့်ကစားသမားနဲ့ပတ်သက်လို့ ပက်ဂွါဒီယိုလာက “ ပြီးခဲ့တဲ့လတွေအတွင်း ကျွန်တော်တို့တွေ ဒီအကြောင်းအရာကို အကြိမ်များစွာဆွေးနွေးခဲ့ပြီးပါပြီ။ ဖိုဒန်က ရာသီအစပိုင်းမှာ မြင်တွေ့ခဲ့ရတဲ့ပုံစံမျိုးနဲ့ မတူညီတော့တဲ့ ကောင်လေးတစ်ယောက်ဖြစ်သွားပါပြီ။ သူ့မှာ ပြဿနာအချို့ ရှိခဲ့ပါတယ်။ ဒါပေမယ့် သူတို့တွေက လူသားတွေဖြစ်ပြီး တခါတရံ ဆုတ်ယုတ်မှုတွေနဲ့ ရင်ဆိုင်ရတာလည်း ပုံမှန်အခြေအနေဖြစ်ပါတယ်။

ဒါပေမယ့် အခုအချိန်မှာ ဖိုဒန်ပြန်လည်ပျော်ရွှင်နေပြီဖြစ်လို့ ကျွန်တော်တို့ တကယ်ကို ကျေနပ်အားရမိပါတယ်။ ဒါက ကျွန်တော်တို့အားလုံးအတွက် အရမ်းကောင်းပါတယ်”လို့ ပြောပါတယ်။ ၂၀၂၄-၂၀၂၅ ဘောလုံးရာသီအတွင်း ဖိုဒန်က သွင်းဂိုးတစ်ဂိုးသာ ရရှိခဲ့ပေမယ့် နောက်ဆုံးကစားခဲ့တဲ့ပရီးမီးယားလိဂ်ပွဲစဉ်သုံးခုမှာတော့ ငါးဂိုးအထိ သွင်းယူနိုင်ခဲ့ပါတယ်။ အခုလိုပုံစံကောင်းတွေ ပြန်လည်ရရှိနေပေမယ့် အင်္ဂလန်လက်ရွေးစင်က ပြီးခဲ့တဲ့ရာသီစွမ်းဆောင်ရည်ဖြစ်တဲ့ သွင်းဂိုး ၁၉ ဂိုး၊ ဂိုးဖန်တီးမှု ရှစ်ကြိမ်ပြုလုပ်နိုင်ဖို့တော့ အတော်လေးအလှမ်းဝေးနေဆဲ ဖြစ်ပါတယ်။ အင်္ဂလန်အသင်းနဲ့အတူ ခက်ခဲတဲ့ဥရောပချန်ပီယံရှစ်ပြိုင်ပွဲကို ဖြတ်သန်းခဲ့ရပြီးနောက် ဖိုဒန်အတွက် မန်စီးတီးအသင်းက အားလပ်ရက်အချို့စီမံပေးခဲ့ပေမယ့် ကစားသမားရဲ့ပုံမှန်စွမ်းဆောင်ရည်မျိုး ပြန်လည်ရရှိဖို့ ရုန်းကန်ခဲ့ရပါတယ်။

ဖိုဒန်က ဗုဒ္ဓဟူးညပိုင်း၊ ပီအက်စ်ဂျီနဲ့ရင်ဆိုင်ရမယ့် ချန်ပီယံလိဂ်ပွဲကြီးပွဲကောင်းမှာ သူ့ရဲ့သွင်းဂိုးတွေ ဆက်လက်ရယူနိုင်ဖို့ မျှော်လင့်နေပါလိမ့်မယ်။ မန်စီးတီးအသင်းက ပြင်သစ်နိုင်ငံရဲ့မြို့တော်မှာ ချန်ပီယံလိဂ်ရှုံးထွက်အဆင့်ဆီ တက်လှမ်းနိုင်ရေး အရည်အချင်းပြည့်မီနိုင်ဖို့အတွက် ရည်မှန်းထားပါလိမ့်မယ်။ အဲ့ဒီပွဲစဉ်အပြီး လာမယ့်သီတင်းပတ်ကုန်ပိုင်းမှာတော့ မန်စီးတီးက TOP 4 ဝင်နိုင်ရေး အကြိတ်အနယ်ယှဉ်ပြိုင်နေရတဲ့ ချဲလ်ဆီးနဲ့ ပွဲကြီးပွဲကောင်းကို အိမ်ကွင်းမှာ ဧည့်ခံကစားသွားရပါမယ်။