စိတ်ပိုင်းဆိုင်ရာအရ သက်သောင့်သက်သာမရှိဘူးလို့ ခံစားခဲ့ရပြီးနောက် ဘာစီလိုနာမှထွက်ခွာဖို့ အတော်လေးနီးစပ်ဖူးပြီး ဟန်စီဖလစ်ခ်ရဲ့ဖုန်းခေါ်ဆိုမှုတစ်ခုကြောင့် သူ့ရဲ့စိတ်ပြောင်းလဲသွားခဲ့တယ်လို့ ရာဖင်ဟာက ထုတ်ဖော်ပြောကြားခဲ့ပါတယ်။ ဘရာဇီးတိုက်စစ်မှူးရဲ့စပိန်မြေကနဦးကာလတွေမှာ အခက်အခဲတွေပြည့်နှက်နေခဲ့ပြီး ဘောလုံးရာသီနှစ်ခုလောက်ကို မျှော်လင့်ထားသလောက် ခြေစွမ်းမပြသနိုင်တဲ့ အခြေအနေမျိုးနဲ့ ဖြတ်သန်းခဲ့ရပါတယ်။ ၂၀၂၃ ခုနှစ်နွေရာသီကာလအတွင်း ဘာစီလိုနာအသင်းက ရာဖင်ဟာကို ရောင်းချပြီး ငွေကြေးရှာဖွေကာ နီကိုဝီလျံစ်ကို ခေါ်ယူဖို့ ကြိုးပမ်းမယ်ဆိုတဲ့ ထင်ကြေးပေးမှုတွေလည်း ထွက်ပေါ်လာခဲ့ပါတယ်။ အခုလိုအပြောင်းအရွှေ့ထင်ကြေးတွေနဲ့ ဝေဖန်မှုတွေက တောင်ပံကစားသမားရဲ့ ကတ္တလန်ကလပ်ကစားသမားဘဝအနာဂတ်ကို မေးခွန်းထုတ်စရာ ဖြစ်လာခဲ့ပါတယ်။

အတိတ်ကာလ၊ အပြောင်းအရွှေ့ထင်ကြေးတွေကြောင့် ဘာစီလိုနာအသင်းမှထွက်ခွာသွားရမယ့်အရေးကို အလေးအနက်ဆင်ခြင်သုံးသပ်မိစေတယ်လို့ Globo Esporte နဲ့တွေ့ဆုံချိန် ရာဖင်ဟာက ဖွင့်ဟလာခဲ့ပါတယ်။ သူက “ကိုပါအမေရိကဖလားပြိုင်ပွဲအပြီးမှာ ဘာစီလိုနာမှထွက်ခွာဖို့ စဉ်းစားနေခဲ့ပါတယ်။ ဟန်စီဖလစ်ခ် ကျွန်တော့်ဆီ ဖုန်းမခေါ်လာခင်အထိ ကျွန်တော့်ရဲ့စိတ်ပိုင်းဆိုင်ရာအခြေအနေမှာ သက်သောင့်သက်သာရှိသလို မခံစားခဲ့ရပါဘူး။နေ့စဉ်နေ့တိုင်း ကျွန်တော် အသင်းပြောင်းရွှေ့တော့မယ်ဆိုပြီး ကောလာဟလတွေလည်း ထွက်ပေါ်နေခဲ့ပါတယ်။ ကိစ္စတွေက ဖြစ်သင့်သလောက် မဖြစ်လာခဲ့သလို မျှော်လင့်ထားတာထက် ပိုမိုဆိုးရွားတဲ့ ဘောလုံးရာသီတစ်ခုကိုလည်း ကြုံတွေ့ခဲ့ရပါတယ်။ နေ့စဉ်နေ့တိုင်း ကျွန်တော်ထွက်ခွာမယ့် သတင်းတွေ ထွက်ပေါ်ခဲ့သလို ထွက်ခွာဖို့အတွက်တောင်းဆိုနေတဲ့ လူတွေကိုလည်း မြင်တွေ့ခဲ့ရပါတယ်။ ဒါကြောင့် ကျွန်တော်ကိုယ်တိုင်လည်း အသင်းပြောင်းရွှေ့ဖို့အတွက် အလေးအနက်စဉ်းစားလာခဲ့ပါတယ်”လို့ ပြောပါတယ်။

ဘရာဇီးရဲ့ကိုပါအမေရိကဖလားပြိုင်ပွဲခရီးစဉ်အပြီး ရာဖင်ဟာဆီ နောက်ဆုံးဆုံးဖြတ်ချက်တစ်ခုမချမှတ်ခင်အထိ လေ့ကျင့်ရေးကွင်းမှာ လေ့ကျင့်ခန်းဆင်းနေဖို့ တိုက်တွန်းတဲ့ ဟန်စီဖလစ်ခ်ရဲ့ဖုန်းခေါ်ဆိုမှုတစ်ခု  ရောက်ရှိလာခဲ့ပါတယ်။ တိုက်စစ်မှူးကိုယ်တိုင်ကလည်း သူ့ရဲ့တန်ဖိုးတွေကိုသက်သေပြသွားဖို့အတွက် သူ့ကိုယ်သူ စိန်ခေါ်မှုတစ်ခုအဖြစ် နောက်ဆုံးအကြိမ်ကြိုးစားကြည့်ရန် ဆုံးဖြတ်ခဲ့ပါတယ်။

ရာဖင်ဟာက “ ကျွန်တော့်ဆီ ဟန်စီဖလစ်ခ်ဖုန်းဆက်လာပြီး နောက်ဆုံးဆုံးဖြတ်ချက်တစ်ခု မချမှတ်ခင်အချိန်အထိ လေ့ကျင့်ရေးကွင်းဆီ လာရောက်ဖို့အတွက် တိုက်တွန်းခဲ့ပါတယ်။ သူက ကျွန်တော်နဲ့ စကားပြောကြည့်ဖို့လိုလားပြီး ကျွန်တော့်ကို အားကိုးချင်လို့ပဲ ဖြစ်ပါတယ်။ ဒါက ကျွန်တော်ဆက်နေဖြစ်ခဲ့တဲ့ဆုံးဖြတ်ချက်မှာ အဓိကကျတဲ့အလှည့်အပြောင်းတစ်ခု ဖြစ်လာခဲ့ပါတယ်။ ကျွန်တော်ကိုယ်တိုင်လည်း ကျွန်တော့်ရဲ့ဇနီးဆီ ‘မိန်းမရေ.. ဒီလူသာ တရားမျှတမှုရှိပြီး လေ့ကျင့်ရေးကွင်းမှာ ငါ့ရဲ့ကြိုးစားအားထုတ်မှုကို မြင်လိုက်မယ်ဆိုရင် သီတင်းတစ်ပတ်အတွင်း သူ ငါ့ကို အလိုရှိလာလိမ့်မယ်။ သူ့အတွက် နောင်တရစရာမရှိပါဘူး’လို့ ပြောခဲ့ပါတယ်။ ပြီးတော့ ကျွန်တော့်ရဲ့ဆုံးဖြတ်ချက် မှန်ကန်ခဲ့တယ်လို့ ထင်ပါတယ်”လို့ ပြောပါတယ်။

ဟန်စီဖလစ်ခ်လက်အောက် ရာဖင်ဟာရဲ့အသွင်ပြောင်းလဲလာမှုတွေက အခုဘောလုံးရာသီ၊ သူ့ရဲ့ကိန်းဂဏန်းအချက်တွေနဲ့အတူ ထင်ဟပ်လာနေပါတယ်။ အခုဘောလုံးရာသီ၊ ၄၂ ပွဲကစားပြီးချိန်မှာ ရာဖင်ဟာက ၂၇ ဂိုးသွင်းယူကာ ဂိုးဖန်တီးမှု ၂၀ကြိမ် စွမ်းဆောင်ထားပြီး ဥရောပထိပ်တန်းကစားသမားတွေအနက် တစ်ဦး ဖြစ်လာခဲ့ပါတယ်။ သူ့ရဲ့စိတ်လှုပ်ရှားဖွယ်ရာပုံစံကောင်းက အခုနှစ်ဘော်လွန်းဒီအောဆုအတွက်ဆွေးနွေးမှုတွေမှာ နေရာယူလာခဲ့ပြီး ဒါက လွန်ခဲ့တဲ့တစ်နှစ်တာကာလအတွင်း လုံးဝမမျှော်လင့်ထားခဲ့တဲ့ ကိစ္စတစ်ခုဖြစ်ပါတယ်။ ရာဖင်ဟာက လတ်တလောမှာ ဘရာဇီးလက်ရွေးစင်အသင်းနဲ့အတူ နိုင်ငံ့တာဝန်ထမ်းဆောင်နေပြီး ဗျူနိုအေးရိစ်မြို့မှာ အာဂျင်တီးနားနဲ့ရင်ဆိုင်ကစားမယ့် အင်္ဂါနေ့၊ ကမ္ဘာ့ဖလားခြေစစ်ပွဲစဉ်အတွက် ပါဝင်ကစားသွားပါလိမ့်မယ်။