သောကြာနေ့နံနက်ကယှဉ်ပြိုင်ခဲ့တဲ့ ယူအီးအက်ဖ်အေနေရှင်းလိဂ် ကွာတားဖိုင်နယ် ပထမအကျော့ပွဲစဉ်တွေနဲ့ နယ်သာလန်နဲ့ စပိန်တို့သရေကျခဲ့ပြီး ပြင်သစ်၊ ပေါ်တူဂီနဲ့ အီတလီတို့ကတော့ ရှုံးပွဲကိုယ်စီကြုံတွေ့ခဲ့ရတာကြောင့် ဒုတိယအကျော့မှာ ရုန်းကန်သွားရတော့မှာဖြစ်ပါတယ်။ 

နယ်သာလန်ကို ရော့တာဒန်မှာသွားရောက်ရင်ဆိုင်ခဲ့ရတဲ့ စပိန်ဟာ ပွဲပြီးကာနီး မိနစ် ၉၀ အထိ ၂-၁ နဲ့ရှုံးနိမ့်နေခဲ့ပေမယ့် ၉၀+၃ မိနစ်မှာ ရရှိခဲ့တဲ့ ကွင်းလယ်လူ မီခေးလ်မီရီနိုရဲ့သွင်းဂိုးကြောင့် သရေရလဒ်ကို ပုံဖော်နိုင်ခဲ့တာဖြစ်ပါတယ်။ ယခုပွဲစဉ်မှာ စပိန်အတွက် ဦးဆောင်ဂိုးကို ပွဲအစ ၉ မိနစ်မှာ နီကိုဝီလီယမ်က စတင်သွင်းယူပေးခဲ့ပေမယ့် ကိုဒီဂတ်ပိုက ပထမပိုင်းမှာပဲ နယ်သာလန်အတွက် ပြန်လည်ချေပခဲ့ပါတယ်။ ဒုတိယပိုင်းမှာတော့ နယ်သာလန်အတွက် ရိန်ဒါစ်က ဦးဆောင်ဂိုးပြန်လည်သွင်းယူပေးခဲ့တာဖြစ်ပါတယ်။ သို့သော်လည်း အာဆင်နယ်ကွင်းလယ်လူ မီရီနိုက စပိန်အတွက်ပြန်လည်ချေပခဲ့တာကြောင့် နယ်သာလန်တို့ အိမ်ကွင်းမှာ အနိုင်ရလဒ်ကိုတော့ မရရှိခဲ့ပါဘူး။ 

ခရိုအေးရှားနဲ့ထိပ်တိုက်တွေ့ဆုံခဲ့တဲ့ ပြင်သစ်ကတော့ အမ်ဘာပေနဲ့ ဒမ်ဘီလီတို့လို ကြယ်ပွင့်ကစားသမားတွေကို ပွဲထုတ်ပြီး အကောင်းဆုံးလူစာရင်းနဲ့ယှဉ်ပြိုင်ခဲ့ပေမယ့် ဂိုးတစ်ဂိုးမှသွင်းယူနိုင်ခဲ့ခြင်းမရှိဘဲ အဝေးကွင်းမှာ ၂-၀ နဲ့ဂိုးပြတ်အရေးနိမ့်ခဲ့ပါတယ်။ အသင်းခေါင်းဆောင် လူကာမိုဒရစ်ဦးဆောင်ခဲ့တဲ့ ခရိုအေးရှားကတော့ ပထမပိုင်းမှာပဲ အနိုင်ဂိုး ၂ ဂိုးစလုံးရရှိခဲ့ပြီး ဘူဒီမာနဲ့ ပါရီဆစ်တို့က သွင်းယူပေးခဲ့တာဖြစ်ပါတယ်။ 

မီလန်မြို့မှာသွားရောက်ယှဉ်ပြိုင်ခဲ့တဲ့ ဂျာမနီကတော့ အီတလီကို နောက်ကနေလိုက်ကစားပြီး ၁-၂ နဲ့အနိုင်ရခဲ့ပါတယ်။ ပွဲအစ ၉ မိနစ်မှာပဲ အီတလီအတွက် ဦးဆောင်ဂိုးကို တိုနာလီက စတင်သွင်းယူပေးခဲ့ပေမယ့် ဂျာမနီက ဒုတိယပိုင်းမှာ ၂ ဂိုးပြန်သွင်းပြီး အဝေးကွင်းနိုင်ပွဲရရှိခဲ့တာဖြစ်ပါတယ်။ 

နောက်ထပ်ပွဲစဉ်တစ်ပွဲဖြစ်တဲ့ ဒိန်းမတ်နဲ့ပေါ်တူဂီတို့ပွဲစဉ်မှာ ပေါ်တူဂီတို့မထင်မှတ်ဘဲ ရှုံးပွဲကြုံတွေ့ခဲ့ရပါတယ်။ ရော်နယ်ဒိုဦးဆောင်တဲ့ ပေါ်တူဂီဟာ ဒိန်းမတ်ရဲ့ခံစစ်ကို ထိုးဖောက်ဖို့ရုန်းကန်ခဲ့ရပြီး တစ်ပွဲလုံးမှ ဂိုးပေါက်ကန်သွင်းချက် ၈ ကြိမ်သာရရှိခဲ့ပါတယ်။ ဒိန်းမတ်အတွက် တစ်လုံးတည်းသောအနိုင်ဂိုးကိုတော့ ယူနိုက်တက်တိုက်စစ်မှူး ဟွိုက်လန်းကသွင်းယူပေးခဲ့ပြီး ကစားသမားဟာ ရော်နယ်ဒိုရှေ့မှာ ရော်နယ်ဒိုလို အောင်ပွဲခံပြခဲ့ပါတယ်။