ချဲလ်ဆီးနည်းပြ အန်ဇိုမာရက်စ်ကာက ယခုနွေရာသီအတွင်း အသင်းနဲ့လမ်းခွဲမယ်လို့ သတင်းတွေထွက်ပေါ်နေတဲ့ တိုက်စစ်မှူး နီကိုးလက်စ်ဂျက်ဆန်ဟာ လာမယ့်စနေနေ့ ဝက်စ်ဟမ်းနဲ့ယှဉ်ပြိုင်သွားမယ့် ပရီးမီးယားလိဂ်ပွဲစဉ်မှာ ပါဝင်ကစားမှာမဟုတ်ကြောင်း အတည်ပြုပြောကြားလာခဲ့ပါတယ်။

ဒါကြောင့် ဂျက်ဆန်ရဲ့ချဲလ်ဆီးကစားသမားဘဝအနာဂတ်ဟာ ပိုမိုသံသယဝင်စရာဖြစ်လာခဲ့ပြီး ကစားသမားအနေနဲ့ အသင်းကနေထွက်ခွာသွားဖို့ သေချာသလောက်ဖြစ်နေပါတယ်။ ဒါ့အပြင် မာရက်စ်ဟာက အသင်းမှာ တိုက်စစ်မှူးသစ်တွေဖြစ်တဲ့ လီယမ်ဒီလပ်နဲ့ ဂျာအိုပက်ဒရိုတို့ရှိနေတာကြောင့် ဂျက်ဆန်ရဲ့အနာဂတ်နဲ့ပတ်သက်ပြီး သူကိုယ်တိုင်ဘာဖြစ်မယ်ဆိုတာမသိသေးကြောင်း ပြောကြားခဲ့ပါတယ်။ 

ဂျက်ဆန်ဟာ ပြီးခဲ့တဲ့ရာသီက ချဲလ်ဆီးအတွက် ၁၃ ဂိုးအထိသွင်းယူနိုင်ခဲ့ပေမယ့် တိုက်စစ်မှာနေရာရဖို့ ရုန်းကန်နေခဲ့ရပြီး ပြီးခဲ့တဲ့အပတ်က ခရစ္စတယ်ပဲလေ့စ်နဲ့ပွဲစဉ်မှာလည်း လူစာရင်းမှချန်လှပ်ခံခဲ့ရပါတယ်။ သတင်းတွေအရ ချဲလ်ဆီးဟာ ဆီနီဂေါလက်ရွေးစင်ကို ပြောင်းရွှေ့ကြေးပေါင်သန်း ၆၀ နဲ့ရောင်းချဖို့ပြင်ဆင်နေပြီး အက်စတွန်ဗီလာက စိတ်ဝင်စားနေပေမယ့် ဘဏ္ဍာရေးပြဿနာတွေကြောင့် ခေါ်ယူဖို့ ခက်ခဲနေတယ်လို့သိရပါတယ်။ 

ပွဲကြိုသတင်းစာရှင်းလင်းပွဲမှာ မာရက်စ်ကာက "ဂျက်ဆန်က ကစားဖို့အဆင်သင့်ရှိပါတယ်။ ဒါပေမယ့် ဝက်စ်ဟမ်းနဲ့ပွဲအတွက်လူစာရင်းမှာ ပါဝင်လာမှာမဟုတ်ပါဘူး။ ကျွန်တော်တို့ဒီကိစ္စကိုပြောပြီးသားပါ။ အသင်းမှာ တိုက်စစ်မှူး ၂ ဦးရှိပြီးသားပါ။ ဒါကြောင့် အပြောင်းအရွှေ့ကာလ မပိတ်သိမ်းခင်မှာ တစ်ခုခုဖြစ်လာနိုင်ပါတယ်" လို့ပြောကြားခဲ့ပါတယ်။

ဂျက်ဆန်ရဲ့အနာဂတ်ဘယ်လိုဖြစ်လာမလဲလို့ မေးမြန်းရာမှာ အီတလီသားနည်းပြက "ကျွန်တော်မသိပါဘူး။ ရိုးရိုးသားသားပြောရရင် ကျွန်တော်မသိဘူးလို့ပဲပြောရမှာပါ။ ပြီးခဲ့တဲ့ရာသီမှာကတည်းက ကျွန်တော်ဟာ အသင်းရဲ့လေ့ကျင့်ရေးအစီအစဉ်တွေအပေါ်မှာပဲ အာရုံစိုက်နေခဲ့ပါတယ်။ ပြီးတော့ ပွဲတွေအတွက်ပဲအဓိကပြင်ဆင်နေခဲ့တာပါ။ ကျန်တဲ့ကိစ္စတွေကျွန်တော်မသိပါဘူး" လို့ဖြေကြားခဲ့ပါတယ်။

ဂျက်ဆန်အနေနဲ့ စတန်းဖို့ဒ်ဘရစ်ချ်မှထွက်ခွာပြီး အက်စတွန်ဗီလာသို့ပြောင်းရွှေ့နိုင်ဖို့ မျှော်လင့်နေမှာဖြစ်သလို၊ ချဲလ်ဆီးအနေနဲ့လည်း လာမယ့်ဝက်စ်ဟမ်းနဲ့ပွဲမှာ ယခုရာသီပထမဆုံးပရီးမီးယားလိဂ်နိုင်ပွဲကိုဖော်ဆောင်နိုင်ဖို့ ကြိုးစားသွားရပါမယ်။