အက်ကရင်တန်စတန်လေကို အနိုင်ရရှိခဲ့တဲ့ အက်အေဖလားတတိယအဆင့်ပွဲစဉ်အတွင်း လှပတဲ့ဂိုးတစ်ဂိုး သွင်းယူပေးခဲ့တဲ့ အာနိုးလ်အပေါ် ဝေဖန်သူတွေကို အန်းစလော့က ပြစ်တင်ဝေဖန်လိုက်ပါတယ်။

လီဗာပူးအသင်းက ယမန်နေ့ညနေပိုင်းမှာ လိဂ်တူးကလပ်အက်ကရင်တန်စတန်လေကို ၄-၀ ဂိုးဖြင့် အနိုင်ယူပြီး အက်ဖ်အေဖလားစတုတ္ထအဆင့်ဆီ တက်လှမ်းသွားခဲ့ပါတယ်။ အခုအန်ဖီးလ်ကွင်းပွဲစဉ်မှာ လီဗာပူးအသင်းအတွက် ဂျိုတာ၊ အာနိုးလ်၊ ဂျေဒန်ဒန်းစ်နဲ့ ချီယေဆာတို့က သွင်းဂိုးတွေ ရယူပေးခဲ့ပြီး ဖလားလေးလုံးအောင်မြင်မှုမျှော်လင့်ချက်ကို ဆက်လက်အသက်သွင်းထားနိုင်ခဲ့ပါတယ်။

အခုပွဲစဉ်မှာ အာနိုးလ်သွင်းယူပေးခဲ့တဲ့ဂိုးက အတော်လေးအဆင့်မြင့်ခဲ့ပြီး ရီးရဲလ်မက်ဒရစ်ရဲ့ စိတ်ဝင်စားမှုတွေအကြားမှာပဲ သူ့ကို စာချုပ်သစ်ပေးဖို့ လီဗာပူးပရိသတ်တွေအတွက် တွန်အားဖြစ်လာခဲ့ပါတယ်။ ဒါပေမယ့် ညာနောက်ခံလူက မန်ချက်စတာယူနိုက်တက်နဲ့ နှစ်ဂိုးစီသရေကျခဲ့တဲ့ ပရီးမီးယားလိဂ်ပွဲစဉ်အတွင်း လီဆန်ဒရိုမာတီနက်ဇ်ရဲ့ဦးဆောင်ဂိုးမှာ အမှားအယွင်းရှိခဲ့လို့ ကျယ်ကျယ်ပြန့်ပြန့်ဝေဖန်ခံခဲ့ရပါတယ်။ သူ့ကို လှောင်ပြောင်ဝေဖန်ခဲ့သူတွေထဲမှာ ရွိုင်ကိန်းလည်း ပါဝင်ပြီး အာနိုးလ်ကို ရီးရဲလ်မက်ဒရစ်ထက် လိဂ်တူးကလပ် ထရန်စမဲလ်ရိုဗာမှာ ကစားတာ ပိုသင့်လျော်တယ်လို့ တိုက်ခိုက်ခဲ့ပါတယ်။

အခုပွဲစဉ်အပြီးမှာ အသင်းကပ္ပတိန်အပေါ် အလျှင်အမြန်အကာအကွယ်ပေးလာတဲ့ အန်းစလော့က “ကျွန်တော်တော့ အခုလိုမယုံကြည်နိုင်စရာသွင်းဂိုးအကြောင်း နာရီပေါင်းများစွာ ပြောနေရပါလိမ့်မယ်။ အာနိုးလ်ရရှိနိုင်မယ့် အကြီးမားဆုံးချီးမွမ်းစကားကတော့ မန်ချက်စတာယူနိုက်တက်နဲ့ပွဲစဉ်အပြီး လူတွေရဲ့တုံ့ပြန်ပုံတွေပဲ ဖြစ်ပါတယ်။ ကမ္ဘာတလွှားမှာ ပုဂ္ဂိုလ်အချို့မှလွဲ၍ ကျန်ဘောလုံးသမားတိုင်းအတွက် ခြေစွမ်းညံ့ဖျင်းဆိုးရွားတဲ့ပွဲစဉ်တစ်ခု ရှိပါတယ်။

 ဒါပေမယ့် အာနိုးလ်မှာလည်း အဲ့ဒီလိုအခိုက်အတန့်တစ်ခု ရှိခဲ့ပြီး ဒါနဲ့ပတ်သက်လို့ လူတိုင်းမှာ ထင်မြင်ချက်တစ်ခုစီ ရှိပါတယ်။ စာချုပ်သက်တမ်းအခြေအနေတွေကြောင့်လည်း ဖြစ်ကောင်းဖြစ်နိုင်ပါတယ်။ အခုလိုတူညီတဲ့ပုံစံမျိုးကို လူတွေက အခုလိုမျိုးပဲ တုံ့ပြန်လေ့ရှိသလားဆိုတာ ကျွန်တော်လည်း မသိပါဘူး။ အရမ်းကောင်းတဲ့ ပထမရာသီဝက်ကာလအပြီး ယူနိုက်တက်နဲ့ပွဲစဉ်မှာ ပုံမှန်အတိုင်းကောင်းမွန်အောင် မကစားနိုင်ခဲ့ဘူး။ ဒါကို လူတိုင်းလည်း မြင်ပါတယ်။

 ဒါပေမယ့် အဲ့ဒီလူတော်တော်များများက အာနိုးလ်အပေါ် နားလည်ပေးဖို့ အတော်လေးခက်ခဲနေခဲ့ပါတယ်။ ကျွန်တော့်အမြင်အရ ကိုယ့်ရဲ့အိမ်ကွင်းပရိသတ်ရှေ့မှောက်မှာ အသင်းပရိသတ်တွေရဲ့ကြိုဆိုလက်ခံပေးမှုကို ပြန်ခံစားရတာ သူ့အတွက် ကောင်းမွန်တယ်လို့ ထင်ပါတယ်။ ဒီနေ့ပွဲစဉ်လည်း အထူးကောင်းမွန်ခဲ့ပြီး ဒါက အာနိုးလ်နဲ့ ကျွန်တော်တို့အတွက် အကူအညီဖြစ်စေနိုင်ပါတယ်”လို့ ပြောပါတယ်။

အာနိုးလ်ရဲ့လက်ရှိစာချုပ်သက်တမ်းက အခုဘောလုံးရာသီပိတ်သိမ်းချိန်မှာ ကုန်ဆုံးသွားဖို့ရှိနေပြီး ကစားသမားအနေဖြင့် နိုင်ငံရပ်ခြားကလပ်အသင်းတွေနဲ့ လွတ်လွတ်လပ်လပ်ညှိနှိုင်းဆွေးနွေးခွင့် ရှိနေပါတယ်။ သတင်းတွေအရ ရီးရဲလ်မက်ဒရစ်က သူ့ကိုခေါ်ယူနိုင်ရေးအတွက် ဇန်နဝါရီလအတွင်း အကြိုသဘောတူညီမှုတစ်ခုရယူထားတာပဲဖြစ်ဖြစ်၊ နွေရာသီကာလမှာ ပုံမှန်အပြောင်းအရွှေ့တစ်ခုကို အကောင်အထည်ဖော်ဆောင်သွားတာပဲဖြစ်ဖြစ် လုပ်ဆောင်သွားနိုင်ဖို့ ယုံကြည်မှုရှိနေတယ်လို့ သိရပါတယ်။

အခုအချိန်မှာတော့ လီဗာပူးအသင်းရဲ့အာရုံစိုက်မှုတွေက လာမယ့်အင်္ဂါနေ့၊ နော်တင်ဟမ်ဖောရက်စ်နဲ့ရင်ဆိုင်ရမယ့် အရေးကြီးပရီးမီးယားလိဂ်ပွဲစဉ်ဆီ ရောက်ရှိနေပါပြီ။ နူနိုဆန်းတို့စ်ရဲ့အသင်းက လီဗာပူးနဲ့ခြောက်မှတ်အကွာ၊ ပရီးမီးယားလိဂ်အမှတ်ပေးဇယားတတိယနေရာမှာ ရပ်တည်နေပြီး အခုဘောလုံးရာသီ၊ ကြိုးကြာနီတွေကို အနိုင်ယူထားတဲ့ တစ်ခုတည်းသောကလပ်အသင်းအဖြစ် မှတ်တမ်းဝင်နေပါတယ်။

 အဲ့ဒီပွဲစဉ်မှာလည်း အာနိုးလ်ရဲ့စွမ်းဆောင်ရည်ပိုင်းအပေါ် လူအများရဲ့အာရုံစိုက်မှု နောက်တစ်ကြိမ်ရောက်ရှိလာနိုင်ပြီး ကစားသမားကိုယ်တိုင်လည်း အက်ဖ်အေဖလားပွဲစဉ်မှာပြသခဲ့တဲ့ အထင်ကြီးလောက်စရာစွမ်းဆောင်ရည်မျိုး နောက်တစ်ကြိမ်ပြသနိုင်ဖို့ ကြိုးစားသွားပါလိမ့်မယ်။