မန်ချက်စတာယူနိုက်တက် နည်းပြဖြစ်သူ ကာရစ်က အသင်းရဲ့ ကစားသမား အပြောင်းအရွှေ့ အစီအစဉ်တွေမှာ အပြောင်းအလဲတွေ စတင်လုပ်ဆောင်နေပြီလို့ ဝန်ခံပြောကြားလိုက်ပါတယ်။

ရူဘင် အာမိုရင် ထွက်ခွာသွားပြီးနောက်ပိုင်း သူအသုံးပြုခဲ့တဲ့ နောက်တန်း ၃ ယောက်တန်းစနစ်ကလည်း မရှိတော့တဲ့အတွက် ယူနိုက်တက်အနေနဲ့ တောင်ပံတိုက်စစ်ကို အခြေခံတဲ့ ကစားကွက်ဆီကို ပြန်လည်ကူးပြောင်းတော့မှာဖြစ်ကြောင်း ကာရစ်က ပြောပြခဲ့တာပါ။

ဒါကြောင့်လည်း ပြီးခဲ့တဲ့နှစ်က ချဲလ်ဆီးကို ပြောင်းရွှေ့သွားတဲ့ ဂါနာချို၊ အခု လက်ရှိ အငှားကစားနေတဲ့ ဘာစီလိုနာအသင်းဆီကို အပြီးသတ် ပြောင်းရွှေ့တော့မယ့် ရက်ရှ်ဖို့ဒ်နဲ့ အက်စတွန်ဗီလာမှာ ရောက်ရှိနေတဲ့ ဆန်ချိုတို့ရဲ့ နေရာတွေအတွက် ယူနိုက်တက်က လာမယ့်နွေရာသီမှာ တောင်ပံကစားသမားသစ်တွေကို ရှာဖွေဝယ်ယူသွားမှာ ဖြစ်ပါတယ်။

အသင်းရဲ့ တောင်ပံကစားသမား လိုအပ်ချက်နဲ့ ပတ်သက်ပြီး အင်္ဂါနေ့က မေးမြန်းရာမှာတော့ "အသင်းရဲ့ ဟန်ချက်ညီမှုနဲ့ ပုံစံအမျိုးမျိုး ပြောင်းလဲကစားနိုင်ဖို့အတွက် အမြဲတမ်း စဉ်းစားနေရတာပါ၊ ဒါကြောင့် တောင်ပံကစားသမားသစ်တွေ ရှာဖို့ဆိုတာကတော့ သေချာပေါက် လုပ်ဆောင်ရမယ့် အရာပါပဲ" လို့ ကာရစ်က ဖြေကြားခဲ့ပါတယ်။

ထပ်မံအတည်ပြုမေးမြန်းမှုကိုတော့ "ဖြစ်နိုင်ခြေ အများကြီးရှိပါတယ်" လို့ သူက ဆိုပါတယ်။

သူက ဆက်လက်ပြီး "ကျွန်တော်တို့ အသင်းက အခုထိ အန္တရာယ်ပေးနိုင်တုန်းပါပဲ။ မားသီးယပ်စ် ကူညာက အဲဒီနေရာမှာ ကစားနိုင်ပြီး ပြိုင်ဘက်တွေကို ဒုက္ခပေးနိုင်ခဲ့သလို အခိုက်အတန့်ကောင်းတွေလည်း ဖန်တီးပေးနိုင်ခဲ့ပါတယ်။ သူ တောင်ပံမှာ ကစားတဲ့အခါ တစ်ယောက်ချင်း ရင်ဆိုင်ရရင် တားဆီးဖို့ တကယ်ကို ခက်ခဲပါတယ်" လို့ ပြောကြားခဲ့ပါတယ်။

တကယ်တော့ ဇွန်လမှာ အပြောင်းအရွှေ့တွေ မလုပ်ခင်အထိ လက်ရှိလူစာရင်းနဲ့ပဲ အားနည်းချက်တွေကို ဖုံးဖိနိုင်မယ်လို့ ကာရစ်က ယုံကြည်နေတာပါ။ "ကစားသမားတွေကို ဘယ်လိုအကောင်းဆုံး တွဲဖက်ပေးရမလဲ၊ ကွင်းထဲမှာ ဘယ်လိုပုံစံက အသင့်တော်ဆုံးဖြစ်မလဲဆိုတာကို အမြဲတမ်း စဉ်းစားနေပါတယ်။ နည်းလမ်းတွေ အများကြီးရှိသလို ကျွန်တော်တို့ရဲ့ တိုက်စစ်ပိုင်းမှာလည်း ရွေးချယ်စရာ ကစားသမားကောင်းတွေ ရှိနေပါတယ်" လို့ ၎င်းက ပြောကြားခဲ့ပါတယ်။