ဒေါ့မွန်ရဲ့ စာချုပ်သစ်ကမ်းလှမ်းမှုကို အချိန်ဆွဲနေတဲ့ ယူနိုက်တက်ပစ်မှတ် အဒီယေမီ
ယူနိုက်တက်ရဲ့ ပစ်မှတ်ဖြစ်သူ ကာရင်အဒီယေမီဟာ သူ့ရဲ့အနာဂတ်အတွက် ရွေးချယ်စရာတွေကို အသေအချာ စဉ်းစားနေတာကြောင့် ဒေါ့မွန်အသင်းရဲ့ စာချုပ်သစ်ကို လက်မှတ်ထိုးဖို့ လောလောဆယ်မှာ အလျင်စလို မရှိသေးဘူးလို့ သိရပါတယ်။
အသက် ၂၄ နှစ်အရွယ် ဒီတိုက်စစ်ကစားသမားဟာ အခုရာသီမှာ ဒေါ့မွန်အတွက် အဓိကကစားသမားတစ်ဦး ဖြစ်နေပြီး ပြိုင်ပွဲစုံ ၃၈ ပွဲမှာ ၈ ဂိုးသွင်း၊ ဂိုးဖန်တီးမှု ၇ ကြိမ် ပြုလုပ်ပေးထားပါတယ်။
အဒီယေမီဟာ လာမယ့်နွေရာသီမှာ စစ်ဂနယ်အီဒူးနားပတ်ခ် ကနေ ထွက်ခွာတော့မယ်လို့ သတင်းတွေ အကြီးအကျယ် ထွက်နေပြီး ယူနိုက်တက်အသင်းကလည်း သူ့ကိုခေါ်ယူဖို့ အထူးစိတ်ဝင်စားနေတယ်လို့ ဆိုပါတယ်။
Daily Mail ရဲ့ ဖော်ပြချက်အရ ဒေါ့မွန်အသင်းက အဒီယေမီကို စာချုပ်သစ်ချုပ်ဆိုပြီး အသင်းမှာ ဆက်ထိန်းထားချင်နေပေမဲ့ သူကတော့ လက်မှတ်ထိုးဖို့ အေးအေးဆေးဆေးပဲ နေနေတာပါ။
အဒီယေမီဟာ နွေရာသီ အပြောင်းအရွှေ့ကာလမတိုင်ခင် သူ့ရဲ့ရှေ့ဆက်ရမယ့် လမ်းစတွေကို သေချာစဉ်းစားနေပြီး ပရီးမီးယားလိဂ်ကို ပြောင်းရွှေ့ဖို့လည်း စိတ်အားထက်သန်နေတယ်လို့ နားလည်ရပါတယ်။
