နယူးကာဆယ်နဲ့ရင်ဆိုင်ရမယ့် လီဗာပူးအသင်းရဲ့ကာရာဘောင်ဖလားဗိုလ်လုပွဲကို ဒဏ်ရာပြဿနာကြောင့် အာနိုးလ်လွဲချော်နိုင်တယ်လို့ သတင်းတွေမှာ ဖော်ပြလာခဲ့ပါတယ်။ အသက်-၂၆ နှစ်အရွယ်ကစားသမားက ပီအက်စ်ဂျီအသင်းကို ရှုံးနိမ့်ခဲ့တဲ့ ချန်ပီယံလိဂ်နောက်ဆုံး ၁၆ သင်းရှုံးထွက်အဆင့်ပွဲစဉ်အတွင်း ခြေကျင်းဝတ်ဒဏ်ရာရရှိခဲ့ပြီး Daily Mail သတင်းစာရဲ့အဆိုအရ နယူးကာဆယ်နဲ့ရင်ဆိုင်ရမယ့် တနင်္ဂနွေနေ့၊ ဗိုလ်လုပွဲကို လွဲချော်မယ်လို့ သိရပါတယ်။

ဒီသတင်းစာကပဲ အာနိုးလ်ရဲ့အခြေအနေဟာ ဆိုးဆိုးရွားရွားထိခိုက်သွားတာမျိုး မဟုတ်ဘဲ အခုဘောလုံးရာသီမကုန်ခင် ပြန်ကစားနိုင်ရန် မျှော်လင့်ရတယ်လို့ ဖော်ပြသွားခဲ့ပါတယ်။ ညာအစွန်နောက်ခံလူက လီဗာပူးအသင်းနဲ့စာချုပ်သက်တမ်းနောက်ဆုံးကာလတွေဆီ ရောက်ရှိနေသူဖြစ်ပြီး အချို့ပရိသတ်တွေကတော့ ပီအက်စ်ဂျီနဲ့ချန်ပီယံလိဂ်ပွဲစဉ်ကို အသင်းအတွက် သူကစားပေးတဲ့နောက်ဆုံးပွဲစဉ် ဖြစ်လာမလားဆိုကာ စိုးရိမ်ထိတ်လန့်နေကြပါတယ်။ ဒါပေမယ့် လတ်တလောအခြေအနေအရ အင်္ဂလန်လက်ရွေးစင်ကစားသမားက အခုဘောလုံးရာသီမကုန်ခင် ပြန်ကစားနိုင်မယ်လို့ ယူဆရပါတယ်။

Daily Mail သတင်းစာက အာနိုးလ်အပြင် အရန်ညာနောက်ခံအစွန်လူဘရက်ဒလေပါ ဒဏ်ရာရရှိနေလို့ လီဗာပူးအသင်းခံစစ်ညာခြမ်းမှာ ကွင်ဆာ ပွဲထွက်ပါဝင်ကစားမယ်လို့ ဖော်ပြခဲ့ပါတယ်။ လီဗာပူးက တနင်္ဂနွေနေ့၊ ဝင်ဘာလေကွင်းမှာ နယူးကာဆယ်နဲ့ရင်ဆိုင်ရချိန် သူတို့ရဲ့ကာရာဘောင်းဖလားချန်ပီယံဘွဲ့ကို ဆက်လက်ထိန်းသိမ်းနိုင်ဖို့ မျှော်လင့်နေပါလိမ့်မယ်။ အာနိုးလ်ရဲ့နောက်ဆုံးအခြေအနေကိုတော့ အခုသီတင်းပတ်ကုန်ပိုင်းမှာ အသေးစိတ်သိရှိရနိုင်ပါတယ်။