မန်ချက်စတာယူနိုက်တက်နည်းပြ ရူဘင်အာမိုရင်က စနေနေ့ညက ဘရိုက်တန်ကို ၄-၂ နဲ့အနိုင်ရခဲ့တဲ့ ပရီးမီးယားလိဂ်ပွဲစဉ်မှာ အသင်းအတွက် စွမ်းဆောင်ရည်ကောင်းပြသပြီး ဂိုးသွင်းယူနိုင်ခဲ့တဲ့ ကွင်းလယ်လူ ကတ်စ်မဲရိုးကို ချီးကျူးပြောဆိုလာခဲ့ပါတယ်။ 

အဆိုပါပွဲစဉ်မှာ ယူနိုက်တက်ဟာ မားသီးယက်စ်ကွန်ညာ၊ ကတ်စ်မဲရိုး၊ ဘရိုင်ယန်အမ်ဘွေမိုတို့ရဲ့ သွင်းဂိုးတွေနဲ့ ဘရိုက်တန်ကို အိမ်ကွင်းအိုးလ်ထရက်ဖို့ဒ်မှာ ဂိုးပြတ်အနိုင်ရခဲ့တာဖြစ်ပါတယ်။ ဘရိုက်တန်‌အနေနဲ့ ဒုတိယပိုင်းမှာ သွင်းဂိုး ၂ ဂိုးပြန်လည်သွင်းယူပြီး သရေရလဒ်အတွက်မျှော်လင့်ချက်ရှိခဲ့ပေမယ့် အဆုံးမှာတော့ ယူနိုက်တက်ကို အရေးနိမ့်ခဲ့ရတာဖြစ်ပါတယ်။

ကတ်စ်မဲရိုးအနေနဲ့ ယခုပွဲစဉ်မှာ အသင်းအတွက် ဂိုးသွင်းယူပေးနိုင်ခဲ့သလို၊ အသင်းဖော်ကွန်ညာရဲ့ ဦးဆောင်ဂိုးကိုလည်း ဖန်တီးပေးနိုင်ခဲ့တာဖြစ်ပါတယ်။ ပွဲအပြီးမှာ အာမိုရင်က "ဒီပွဲက အနိုင်ရဖို့အရေးကြီးပါတယ်။ အသင်းရဲ့စွမ်းဆောင်ရည်က ဒီနေ့မှာ အရမ်းကောင်းခဲ့ပါတယ်။ ကစားသမားတွေအားလုံးက ပွဲချိန်တစ်လျှောက် ဘယ်အချိန်မှာ ဘာလုပ်ရမယ်ဆိုတာ ကောင်းကောင်းသိနေကြပါတယ်။ ပွဲပြီးကာနီးမှာ ချေပဂိုး ၂ ဂိုးပြန်ပေးလိုက်ရပြီး နာကျင်မှုကိုခံစားခဲ့ရပေမယ့် ယူနိုက်တက်က ဒီလိုနာကျင်မှုတွေနဲ့ အမြဲတမ်းလုံးထွေးနေတဲ့အသင်းပါ" လို့ပြောကြားခဲ့ပါတယ်။

ကတ်စ်မဲရိုးနဲ့ပတ်သက်ပြီး အာမိုရင်က "သူက အသင်းအတွက်အတွေ့အကြုံတွေအများကြီးယူဆောင်လာပေးပါတယ်။ အသင်းရဲ့ စံနမူနာယူစရာကစားသမားလည်းဖြစ်ပါတယ်။ သူ့ရဲ့စွမ်းဆောင်ရည်ကြောင့် တကယ်ပဲစိတ်ကကျေနပ်မိပါတယ်။ အသင်းရဲ့ အခြားကစားသမားတွေလည်း သူ့ကိုကြည့်ပြီး အတုယူသင့်ပါတယ်။ ဘောလုံးလောကမှာ ပြောင်းလဲမှုတွေမြန်မြန်ဆန်ဆန်ဖြစ်ပေါ်နေတယ်ဆိုတာ ကျွန်တော်တို့နားလည်ဖို့လိုပါတယ်"

"အသင်းရဲ့အကောင်းဆုံးကစားသမားလို့သတ်မှတ်ခံထားရရင် အဲဒီကစားသမားက တာဝန်ယူမှုကြီးမားပါတယ်။ ကတ်စ်မဲရိုးက အသင်းရဲ့အကောင်းဆုံးကစားသမားတွေထဲက တစ်ယောက်ပါ" လို့ပြောကြားခဲ့ပါတယ်။ ကတ်စ်မဲရိုးအပြင် အာမိုရင်ဟာ အမ်ဘွေမို၊ ကွန်ညာနဲ့ ဆက်စ်ကိုတို့ကိုလည်း ချီးကျူးပြောဆိုမှုတွေပြုလုပ်ခဲ့ပါတယ်။

လာမယ့်စနေနေ့မှာ‌တော့ ယူနိုက်တက်ဟာ နော်တင်ဟမ်ဖောရက်စ်ကို အဝေးကွင်းမှာသွားရောက်ရင်ဆိုင်ရမှာဖြစ်ပြီး ပရီးမီးယားလိဂ် ၄ ပွဲဆက်နိုင်ပွဲကို ဆက်လက်ဖော်ဆောင်သွားနိုင်မလား စောင့်ကြည့်ရပါမယ်။