စကော့တလန်နဲ့ ရိမ်းဂျားစ်အသင်းရဲ့ ဂန္ထဝင်ကစားသမား အယ်လီမက်ကွိုက်စ်က ဒီရာသီမှာ အာဆင်နယ်အသင်း ဖလားသုံးလုံး ရနိုင်ခြေရှိ၊ မရှိအပေါ် သုံးသပ်ပြောကြားခဲ့တာပါ။ လက်ရှိမှာ အာဆင်နယ်အသင်းဟာ ပရီမီယံလိဂ်ဇယားရဲ့ ထိပ်ဆုံးမှာ ရပ်တည်နေသလို၊ ချန်ပီယံလိဂ် ၁၆ သင်းအဆင့်ကိုလည်း တက်ရောက်ထားနိုင်ပါတယ်။ ဒါ့အပြင် အက်ဖ်အေဖလား ကွာတားဖိုင်နယ်ကို ရောက်နေပြီး မတ်လ ၂၂ ရက်နေ့မှာ မန်စီးတီးနဲ့ ယှဉ်ပြိုင်ရမယ့် ကာရာဘောင်းဖလား ဗိုလ်လုပွဲကိုလည်း တက်လှမ်းထားနိုင်ခဲ့တာပါ။

မြောက်လန်ဒန်မှာ ဆုဖလားရယူနိုင်ဖို့ ရုန်းကန်နေရတဲ့ နည်းပြ မီခေးလ်အာတီတာရဲ့ လက်အောက်မှာ အာဆင်နယ်အသင်းဟာ ပြိုင်ပွဲစုံမှာ ပါဝင်ယှဉ်ပြိုင်နေရတာကြောင့် ဒီရာသီမှာ ဆုဖလားအများအပြား ရရှိဖို့ဆိုတာက ဖြစ်နိုင်ခြေထက်ကို ပိုနေပါတယ်။ talkSPORT Bet Casino နဲ့ စကားပြောဆိုရာမှာတော့ မက်ကွိုက်စ်က ဖလားသုံးလုံးအောင်မြင်မှုရဖို့ဆိုတာ တကယ့်ကို ခက်ခဲတဲ့အလုပ်ဖြစ်ပေမဲ့ တစ်သင်းသင်းကသာ ဒါကို လုပ်နိုင်မယ်ဆိုရင် အဲဒါ အာဆင်နယ်ပဲ ဖြစ်လိမ့်မယ်လို့ ယုံကြည်နေပါတယ်။

"အာဆင်နယ်က ဖလားသုံးလုံး ရမှာလား? ဖြစ်နိုင်ပါတယ်၊ ဖြစ်နိုင်ခြေ နည်းပေမဲ့ ဖြစ်တော့ ဖြစ်နိုင်ပါတယ်။ ရာသီအကုန်ပိုင်း အဆုံးအဖြတ်ပေးရမယ့် အချိန်တွေမှာ ပြိုင်ပွဲစုံမှာ ပါဝင်နေရတဲ့ အသင်းတွေအတွက် ဘယ်လောက်တောင် ခက်ခဲလဲဆိုတာကို ပြီးခဲ့တဲ့နှစ်တွေမှာ ကျွန်တော်တို့ တွေ့ခဲ့ရပြီးပါပြီ။ ကျွန်တော် ပြောသလိုပါပဲ၊ မဖြစ်နိုင်တာတော့ မဟုတ်ဘူး၊ ဒါပေမဲ့ တကယ့်ကို အရမ်းခက်ခဲပါတယ်။ ပွဲစဉ်တွေကလည်း တစ်ပွဲပြီးတစ်ပွဲ စိပ်စိပ်လေး လာတော့မှာပါ။ ကျွန်တော်ကတော့ သူတို့ လိဂ်ဖလားနဲ့အတူ နောက်ထပ် ဖလားတစ်လုံး ရလိမ့်မယ်လို့ သေချာပေါက် ထင်ပါတယ်။ အဲဒီ နောက်ထပ်တစ်လုံးက ဘာဖြစ်မလဲဆိုတာတော့ မသေချာဘူး။ ဒါပေမဲ့ ဖလားသုံးလုံးဆိုတာကတော့ သူတို့အတွက် လက်လှမ်းမီဖို့ ခက်ခဲဦးမယ်လို့ ထင်ပါတယ်။ ဖလားနှစ်လုံး လောက်တော့ ရနိုင်တာကို မြင်နေရတယ်။ အခုအချိန်မှာ အသင်းတွေကို ကြည့်လိုက်ရင် တကယ်ကို ခက်ခဲနေပါပြီ။ ဒါပေမဲ့ အာဆင်နယ်ကို ကြည့်လိုက်ရင်ရော၊ ဥရောပမှာ သူတို့ထက် ကောင်းတဲ့အသင်း ရှိသေးလို့လား။ ရှိမယ်လို့ ကျွန်တော် မထင်ဘူး" လို့ ၎င်းက ဆိုပါတယ်။

ဒီလနှောင်းပိုင်းမှာ ပက်ဂွာဒီယိုလာရဲ့ မန်စီးတီးနဲ့ ရင်ဆိုင်ရမယ့် ကာရာဘောင်းဖလား ဗိုလ်လုပွဲဟာ အာဆင်နယ်အတွက် ဒီရာသီရဲ့ ပထမဆုံး ဆုဖလားကို ကိုင်မြှောက်နိုင်မယ့် အခွင့်အရေး ဖြစ်ပါတယ်။ ဒါဟာ အာတီတာရဲ့ လက်အောက်မှာ အောင်မြင်မှုတွေကို ဆာလောင်နေတဲ့ အာဆင်နယ်အသင်းအတွက် မှတ်တိုင်သစ်တစ်ခု စိုက်ထူနိုင်မယ့် ရာသီရဲ့ အစပျိုးမှုလည်း ဖြစ်လာနိုင်ပါတယ်။