အက်သလက်တီကိုမက်ဒရစ်က ရီးရဲလ်မက်ဒရစ်နဲ့ရင်ဆိုင်ရတဲ့ ချန်ပီယံလိဂ် ၁၆ သင်းရှုံးထွက်အဆင့် ပထမအကျော့မှာ ၂-၁ ဂိုးဖြင့် ရှုံးနိမ့်ခဲ့ပေမယ့် နောက်တစ်ဆင့်တက်ရောက်နိုင်ရေးအတွက် မျှော်လင့်ချက် ရှိနေသေးပါတယ်။ ဒီကလပ်အသင်းနှစ်ခုရဲ့ဒုတိယအကျော့ပွဲစဉ်ကို လာမယ့်သီတင်းပတ်၊ မက်ထရိုပိုလီတာနိုကွင်းမှာ ကျင်းပသွားဖို့ရှိနေပြီး အက်သလက်တီကိုကတော့ ပထမအကျော့အရှုံးရလဒ်ကို အိမ်ကွင်းမှာ ချေဖျက်နိုင်မယ်လို့ ခံစားမိနေပါလိမ့်မယ်။

အက်သလက်တီကိုမက်ဒရစ်နည်းပြဒီယေဂိုဆီမြွန်နီကလည်း ဆန်တီယာဂိုဘာနေဗျူးမှာကစားခဲ့တဲ့ မိနစ် ၉၀ အပေါ် အကဲဖြတ်မှုတစ်ခု ပြုလုပ်ခဲ့ပါတယ်။ သူက ပြိုင်ဘက်အတွက် ပေးလိုက်ရတဲ့ ဂိုးတွေနဲ့ပတ်သက်လို့ စိတ်ပျက်မိပေမယ့် အက်သလက်တီကိုမက်ဒရစ်ချပြခဲ့တဲ့ စွမ်းဆောင်ရည်ပိုင်းကို ကျေနပ်မိတယ်လို့ ဖွင့်ဟပြောကြားခဲ့ပါတယ်။

ဆီမြွန်နီက “အလွန်နည်းဗျူဟာမြောက်တဲ့ပွဲစဉ်တစ်ခုပါ။ မတူညီတဲ့အခိုက်အတန့်တွေမှာ တစ်ဦးကို တစ်ဦး ကျော်ဖြတ်နိုင်ဖို့အတွက် ကြိုးစားခဲ့ကြပါတယ်။ ရီးရဲလ်မက်ဒရစ်က အကောင်းဆုံးစတင်လာနိုင်ခဲ့ပြီး အမိုက်စားဂိုးတစ်ဂိုး သွင်းယူခဲ့ပါတယ်။ ဒီဂိုးမှာဆိုရင် ကျွန်တော်တို့တွေ အခုထက်ပိုကောင်းတဲ့နည်းလမ်းမျိုးနဲ့ ဖြေရှင်းနိုင်ခဲ့သင့်ပါတယ်။ အသင်းရဲ့အကောင်းဆုံးစွမ်းရည်ကတော့ စောစောစီးစီးဂိုးပေးလိုက်ရချိန်မှာတောင် အကြောက်အလန့်မရှိ၊ အရှုံးမပေးဘဲ ဆက်သွားနိုင်ခဲ့ခြင်း ဖြစ်ပါတယ်။ ဆန့်ကျင်ဘက်အားဖြင့် ကျွန်တော်တို့တွေ ပြိုင်ဘက်ကွင်းဘက်ခြမ်းမှာကစားသွားဖို့ စတင်ခဲ့ရပါတယ်။ လီနိုတောင်မပေးနိုင်တဲ့ ဘောလုံးပေးပို့မှုမှတဆင့် အယ်လ်ဗာရက်ဇ်ရဲ့ချေပဂိုးလည်း ရရှိခဲ့ပါတယ်။ ဒီလိုနဲ့ ကျွန်တော့်ကို ကောင်းကောင်းနားလည်စေခဲ့တဲ့ ပထမပိုင်းပွဲချိန် ပြီးဆုံးသွားခဲ့ပါတယ်။

ဒုတိယပိုင်းပွဲချိန်တွေကိုလည်း ဒီလိုပဲ စတင်ခဲ့ပါတယ်။ ဘရာဟင်ဒီယက်ဇ်ရဲ့ကောင်းမွန်တဲ့အားထုတ်မှုကို အခုထက်ပိုပြီးကောင်းမွန်တဲ့ပုံစံမျိုးနဲ့ ဖြေရှင်းနိုင်ခဲ့သင့်ပေမယ့် ဒီသွင်းဂိုးကြောင့်ပဲ ရလဒ်ပိုင်းညီမျှနေမှု အဆုံးသတ်သွားခဲ့ပါတယ်။ သူတို့အတွက် တန်ပြန်တိုက်စစ်က ဗင်နီးစီးယက်စ်နဲ့ အမ်ဘာပေတို့ရဲ့ ကြိုးစားအားထုတ်မှုမှတဆင့် ပြန်ရရှိခဲ့တာပါ။တန်ပြန်တိုက်စစ်ကစားချိန်တိုင်းမှာ သူတို့အတွက် အလားအလာကောင်းတွေ အများကြီးရှိပါတယ်”လို့ ပြောပါတယ်။

ဒါ့အပြင် ဆီမြွန်နီက ချန်ပီယံလိဂ်မက်ဒရစ်ဒါဘီအတွက် အဆုံးသတ်အလားအလာကို ခန့်မှန်းသုံးသပ်ခဲ့ပါတယ်။ သူက အခုသီတင်းပတ်ကုန်အပြီးမှသာ ဒုတိယအကျော့ပွဲစဉ်အတွက် စတင်စဉ်းစားနိုင်မှာဖြစ်ပေမယ့် ယုံကြည်မှုအပြည့်အဝရှိနေခဲ့ပါတယ်။ “ကျွန်တော်တို့မှာလည်း အခွင့်အရေးရှိနေဆဲဖြစ်ပါတယ်။ အဲ့ဒါက ဗုဒ္ဓဟူးညပိုင်းလောက် ဖြစ်မယ်လို့ ထင်ပါတယ်။ ကျွန်တော်တို့အတွက် ကောင်းမွန်တဲ့ညတစ်ခုဖြစ်လာပါလိမ့်မယ်။ အခုအချိန်မှာတော့ ကျွန်တော်တို့က ဂီတာဖေးနဲ့ရင်ဆိုင်ရမယ့်ပွဲစဉ်အတွက် ဦးစားပေးရမယ်ဆိုတာ နားလည်ထားပါတယ်။ တနင်္ဂနွေညပိုင်းမှစတင်ပြီး ကျွန်တော်တို့တွေ ဒုတိယအကျော့ပွဲစဉ်အတွက် စတင်စဉ်းစားသွားရပါလိမ့်မယ်”လို့ ဆီမြွန်နီက ပြောပါတယ်။