မန်ချက်စတာယူနိုက်တက်နည်းပြ ရူဘင်အာမိုရင်က တနင်္လာနေ့နံနက်က လက်စတာကို ၀-၃ နဲ့ဂိုးပြတ်အနိုင်ရခဲ့တဲ့ပွဲစဉ်မှာ အသင်းအတွက် ဦးဆောင်ဂိုးကိုသွင်းယူပြီး ကာလရှည်ဂိုးပေါက်ပျောက်ဆုံးမှုကို အဆုံးသတ်ခဲ့တဲ့ အသင်းရဲ့ တိုက်စစ်မှူး ရက်စ်မွတ်စ်ဟွိုက်လန်းကို ချီးကျူးပြောဆိုမှုတွေပြုလုပ်ခဲ့ပါတယ်။ 

ယူနိုက်တက်အနေနဲ့ ကြားရက်က ယူရိုပါလိဂ်ပွဲစဉ်မှာလည်း စပိန်ကလပ် ရီးရဲလ်ဆိုစီဒက်ကို ၄-၁ နဲ့ဂိုးပြတ်အနိုင်ရထားပြီး ယခုအခါမှာလည်း နောက်ထပ်တစ်ကြိမ် ဂိုးပြတ်အနိုင်ရခဲ့တာကြောင့် ခြေတက်နေတယ်လို့ဆိုရမှာဖြစ်ပေမယ့် နိုင်ငံတကာပွဲစဉ်တွေကစားရတော့မှာဖြစ်လို့ ကလပ်အသင်းပွဲစဉ်တွေကို ခေတ္တရပ်နားထားရတော့မှာဖြစ်ပါတယ်။ 

ပွဲအပြီးမှာ အာမိုရင်က "ဒီဂိုးက ဟွိုက်လန်းအတွက် အရမ်းအရေးကြီးပါတယ်။ သူက လမ်းကြောင်းမှန်ပေါ်မှာ လျှောက်လှမ်းနေသူဖြစ်ပြီး အသင်းကို အမြဲတမ်းအကူအညီပေးနေပါတယ်။ သူသွင်းခဲ့တဲ့ဂိုးက အရမ်းကောင်းပြီး သူနဲ့ထိုက်တန်တယ်လို့လည်း ကျွန်တော်ယုံကြည်ပါတယ်"

"ခက်ခဲတဲ့ဘောလုံးထိန်းချုပ်မှုနဲ့ ခက်ခက်ခဲခဲသွင်းယူခဲ့တာပါ။ အသင်းက ခြေတက်နေပြီး ယုံကြည်မှုရှိနေချိန်မှာ နိုင်ငံတကာပွဲစဉ်တွေရောက်လာတာကတော့ သိပ်မကောင်းပါဘူး။ ကျွန်တော့်ရဲ့ကစားသမားတွေက အမြင့်ဆုံးခြေစွမ်းကို ရောက်နေကြပါတယ်။ အခုအနားရချိန်မှာ ပြန်လည်ထူထောင်ရေးလုပ်ငန်းတွေကို သေချာလုပ်သွားကြဖို့လိုပါတယ်။ ကျွန်တော်တို့ပိုကောင်းလာမှာပါ" လို့ပြောကြားခဲ့ပါတယ်။ 

ယခုပွဲစဉ်မှာ အသင်းရဲ့လူငယ်ကစားသမားလေး အီဒင်ဟီးဗန်းဟာ ဒုတိယပိုင်းမှာ ဒဏ်ရာပြင်းပြင်းထန်ထန်ရရှိပြီး ထမ်းစင်နဲ့သယ်ထုတ်ခံခဲ့ရပေမယ့် ဆေးရုံကိုတော့ သွားစရာမလိုခဲ့ဘူးလို့သိရပါတယ်။ ဆက်လက်ပြီး ပေါ်တူဂီသားနည်းပြက "လာမယ့်အပတ်မှာ သူ့ရဲ့အခြေအနေကိုသိရမှာပါ။ သူမြေပြင်ပေါ်ကို လဲကျသွားခဲ့ပေမယ့် ဘာဖြစ်တယ်ဆိုတာ သူကိုယ်တိုင်မရှင်းပြနိုင်သေးလို့ နားလည်ဖို့ခက်ခဲပါတယ်။ အာဆင်နယ်၊ ရီးရဲလ်ဆိုစီဒက်တို့နဲ့ပွဲစဉ်တွေမှာ သူအကောင်းဆုံးကစားနိုင်ခဲ့ပါတယ်။ ဒီနေ့ပွဲမှာလည်း အာရုံစူးစိုက်မှုအပြည့်နဲ့ကစားခဲ့ပါတယ်" လို့ပြောကြားခဲ့ပါတယ်။ 

ယူနိုက်တက်အတွက် ဒုတိယအနိုင်ဂိုးကိုတော့ ဟွိုက်လန်းလိုပဲ ကာလရှည်ဂိုးပေါက်ပျောက်နေတဲ့ အလီဂျန်ဒရိုဂါနာချိုက သွင်းယူပေးခဲ့တာဖြစ်ပြီး နောက်ဆုံးဂိုးကိုတော့ အသင်းခေါင်းဆောင်ဘရူနိုဖာနန်ဒက်စ်က တစ်ပတ်အတွင်း ၅ ဂိုးမြောက်သွင်းဂိုးအဖြစ် သွင်းယူခဲ့တာဖြစ်ပါတယ်။ 

အာမိုရင်က "ဂါနာချိုကလည်း ဒီပွဲမှာဂိုးသွင်းနိုင်လို့ အရမ်းဝမ်းသာနေပါတယ်။ ဒါပေမယ့် အရေးကြီးဆုံးအချက်က သူ့ရဲ့ဂိုးမဟုတ်ဘဲ စွမ်းဆောင်ရည်တိုးတက်လာမှုပါ။ ဘယ်တောင်ပံမှာရော၊ ညာတောင်ပံမှာပါကစားနေပြီး အသင်းအတွက် အကူအညီတွေပေးထားနိုင်ပါတယ်။ ဘရူနိုဖာနန်ဒက်စ်ကလည်း အရမ်းတော်တဲ့ ပရော်ဖက်ရှင်နယ်တစ်ယောက်ပါ။ သူနေ့တိုင်းအလုပ်ကြိုးစားနိုင်တာက ကျွန်တော့်အတွက် အံ့အားသင့်စရာပါပဲ" လို့ပြောကြားခဲ့ပါတယ်။