အမ်ဘာပေရဲ့အနာဂတ်နဲ့ပတ်သက်လို့ အရိပ်အမြွက် ပြောပြလာတဲ့ လီဗာပူးနောက်ခံလူ ကိုနာတေး
ယမန်နေ့ညဦးပိုင်း၊ ဘရန့်ဖို့ဒ်ကို အနိုင်ယူခဲ့တဲ့ပွဲစဉ်အပြီး လီဗာပူးနောက်ခံလူ ကိုနာတေးက လာမယ့်နွေရာသီမှာ လက်ရွေးစင်အသင်းဖော် အမ်ဘာပေ ရီးရဲလ်မက်ဒရစ်ဆီ ရောက်ရှိလိမ့်မယ်လို့ အရိပ်အမြွက်ထုတ်ဖော်ပြောဆိုလိုက်ပါတယ်။ အမ်ဘာပေက လီဂူးဝမ်းချန်ပီယံတွေနဲ့ စာချုပ်သက်တမ်းကုန်ဆုံးချိန် အခုဘောလုံးရာသီကုန်မှာ ပီအက်စ်ဂျီမှ ထွက်ခွာမယ်လို့ အတည်ပြုပြောဆိုထားပါတယ်။
ရီးရဲလ်မက်ဒရစ်ကလည်း အသက်-၂၅ နှစ်အရွယ် ပြင်သစ်စူပါကြယ်ပွင့် ရောက်ရှိလာနိုင်မယ့် နေရာအဖြစ် ကာလရှည်သတင်းတွေ ထွက်ပေါ်ခဲ့ဖူးပါတယ်။ ဒါပေမယ့် ၂၀၁၈ ဖီဖာကမ္ဘာ့ဖလားချန်ပီယံဆုရှင်ကို ခေါ်ယူဖို့ လီဗာပူးဆီက စိတ်ဝင်စားမှုတစ်ခု ရှိခဲ့ဖူးပါတယ်။
လက်ရှိမှာတော့ ကိုနာတေးက သူ့ရဲ့လက်ရွေးစင်အသင်းဖော်ဟာ လာမယ့်နွေရာသီမှာ ရီးရဲလ်မက်ဒရစ်ဆီ ရောက်ရှိသွားလိမ့်မယ်လို့ အရိပ်အမြွက်ထုတ်ပြောလာပါတယ်။ လီဗာပူးက ဘရန့်ဖို့ဒ်ကို အနိုင်ယူခဲ့တဲ့ပွဲစဉ်အပြီး အသက်-၂၄ နှစ်အရွယ်ကစားသမားဆီ အမ်ဘာပေရဲ့ အခြေအနေနဲ့ အန်ဖီးလ်ဆီ ရောက်ရှိလာနိုင်မလားဆိုတဲ့ မေးမြန်းမှုတွေ ရှိလာခဲ့ပါတယ်။
ကိုနာတေးက “အရိုးသားဆုံးပြောရရင်တော့ အမ်ဘာပေက လီဗာပူးဆီလာမယ်လို့ ထင်နေကြပါသလား? ကျွန်တော်တို့ သူ့အကြောင်းကို မတွေးထားပါဘူး။ ကျွန်တော်တို့အားလုံးလည်း သူဘယ်ကလပ်အသင်းဆီ သွားမလဲဆိုတာ သိထားကြတာပါပဲ။ ကျွန်တော်ကိုယ်တိုင် ဘာမှမသိထားသလို ဒီကိစ္စမှာလည်း ပါဝင်ပတ်သက်မှုမရှိပါဘူး။ ဒါပေမယ့် ကျွန်တော် ပြောပြနိုင်မယ်ဆိုရင်လည်း ကျွန်တော်ကိုယ်တိုင်တောင် အံ့အားသင့်မိသွားပါလိမ့်မယ်။ အမ်ဘာပေကို ခေါ်ယူဖို့ဆိုရင် သူ့ရဲ့လစာ၊ လက်မှတ်ထိုးကြေးတွေက ထိပ်တန်းကလပ်အသင်းအများစုအတွက် ခက်ခဲစေတယ်လို့ပဲ ကျွန်တော်သိထားရပါတယ်”လို့ ပြောပါတယ်။
ပီအက်စ်ဂျီမှ ထွက်ခွာတော့မယ်လို့ အမ်ဘာပေက တရားဝင်အတည်ပြုထားမှုနဲ့အတူ ရီးရဲလ်မက်ဒရစ်ဆီရောက်ရှိသွားနိုင်မယ့် အရိပ်အယောင်တွေလည်း ပြသနေပါတယ်။ အချို့သတင်းတွေမှာဆိုရင် ရီးရဲလ်မက်ဒရစ်ဥက္ကဋ္ဌပီရက်ဇ်ကိုယ်တိုင်က အသင်းအဝတ်လဲခန်းဆီ အသက်-၂၅ နှစ်အရွယ် ပြင်သစ်ကြယ်ပွင့် ရောက်ရှိလာတော့မယ်ဆိုတဲ့အကြောင်း ဖွင့်ပြောထားတယ်လို့ ရေးသားဖော်ပြနေပါတယ်။
ဒါပေမယ့် တရားဝင်ကြေညာချက်တွေကတော့ အခုဘောလုံးရာသီကုန်မှပဲ ထွက်ပေါ်လာနိုင်ပါတယ်။
