ယူနိုက်တက်လူငယ်စတား ကိုဘီမီနူးတစ်ယောက် နာပိုလီအသင်းထံပြောင်းချင်နေပေမယ့် ယူနိုက်တက်ဘက်က တိုမီနေးခြေရာလိုက်နင်းနိုင်ချေရှိတာကြောင့် အပြောင်းအရွှေ့ကို ပိတ်ပင်နေပါယတ်။ နာပိုလီဘက်က ပေါင်သန်း ၅၀ နဲ့ ကမ်းလှမ်းဖို့ ဆွေးနွေးနေပြီး ၄ နှစ်စာချုပ်ကမ်းလှမ်းဖို့ အသင့်ရှိနေပါတယ်။ မယ်ရာသတင်းဌာနရဲ့အဆိုအရ မီနူးတစ်ယောက် ယူနိုက်တက်တာဝန်ရှိသူတွေထံ အသင်းကနေ အပြီးသတ်ထွက်ခွာချင်ကြောင်း တောင်းဆိုခဲ့တယ်လို့ သိရပါတယ်။

ဒါပေမယ့်လည်း ယူနိုက်တက်က တိုမီနေးလမ်းစဉ်လိုဖြစ်မှာစိုးရိမ်နေပြီး ထွက်ခွာခွင့်ကို တားဆီးနေပါတယ်။ နာပိုလီနည်းပြကွန်တီက တိုမီနေးကိုအသုံးချပြီး ကိုဘီမီနူးကို ခေါ်ယူဖို့ ဆွဲဆောင်စေချင်နေပါတယ်။ ကိုဘီဟာ လျင်မြန်တဲ့ခြေထောက်အပြင် အမြင်စူးရှမှု ၊ ဖိအားတွေအောက်မှာကစားနိုင်မှုကြောင့် နာပိုလီရဲ့နည်းစနစ်မှာ အလျင်အမြန်အံဝင်နိုင်တာဖြစ်ပါတယ်။ ယူနိုက်တက်ရဲ့အလားအလာအရှိဆုံးလူငယ်ကစားသမားတစ်ဦးဖြစ်ပေမယ့်လည်း ကိုဘီဟာ အာမိုရင်လက်အောက်မှာ နေရာရဖို့ ရုန်းကန်နေရပါတယ်။

အင်္ဂလန်သား နဲ့ ယူနိုက်တက်တို့ကြား စာချုပ်သက်တမ်းက ၂၀၂၇ အထိကျန်ရှိနေပြီး စာချုပ်သစ်ချုပ်ဆိုဖို့ ဆွေးနွေးမှုက အဆင်မပြေသေးတာဖြစ်ပါတယ်။ ဒီရာသီမှာ ကိုဘီတစ်ယောက် ပရီးမီးယားလိဂ်အဖွင့်ပွဲ ၂ ပွဲစလုံးအရန်ခုံမှာထိုင်ခဲ့ရသလို ဂရင်းစ်ဘီအသင်းနဲ့ ကာရာဘောင်ပွဲမှာတော့ မိနစ် ၉၀ ပြည့်ပါဝင်ခွင့်ရခဲ့ပါတယ်။ ပွဲထွက်ခွင့်နည်းပါးနိုင်တာကြောင့် ကိုဘီအနေနဲ့ အသင်းပြောင်းဖို့ တွန်းအားပေးလုပ်ဆောင်နေပါတယ်။ တိုမီနေးတစ်ယောက် ပြီးခဲ့တဲ့နွေရာသီတုန်းက နာပိုလီအသင်းထံ ပေါင် ၂၅ သန်းနဲ့ ပြောင်းရွှေ့ခဲ့ပြီး ကွန်တီလက်အောက်မှာ ထိပ်တန်းစွမ်းဆောင်ရည်တစ်ရပ်ပြသနိုင်ခဲ့ပါတယ်။

နာပိုလီနဲ့ပွဲဦးထွက်ရာသီမှာတင် တိုမီနေးဟာ အသင်းအတွက် ၃၄ ပွဲအတွင်း ၁၂ ဂိုးသွင်းယူနိုင်ခဲ့တဲ့အပြင် နာပိုလီအသင်းစီးရီးအေချန်ပီယံဆုရယူနိုင်ခဲ့ရာမှာလည်း အဓိကနေရာကနေပါဝင်ခဲ့ပါတယ်။ စွမ်းဆောင်ရည်ကောင်းတွေကြောင့် တိုမီနေးဟာ ၁၉၈၇ ခုနှစ်က အလီမက်ကွက်စ်ပြီးနောက် ဘော်လွန်းဒီအော်ဆုလျာထားစာရင်းမှာ ပါဝင်လာခဲ့တဲ့ ပထမဆုံးစကော့တလန်သားဖြစ်လာခဲ့ပါတယ်။ အပြောင်းအရွှေ့ပိတ်ဖို့နီးစပ်လာချိန်မှာတင် ကိုဘီအပြင် အန်တိုနီကလည်း ဘက်တစ်ထံပြောင်းရွှေ့ဖို့ လုပ်ဆောင်နေပါတယ်။ ရက်ရှ်ဖို့ဒ်ကတော့ လာလီဂါမှာ ဘာစီလိုနာနဲ့အတူ ခြေစွမ်းပြနေပြီး ယူနိုက်တက်တာဝန်ရှိသူတွေကတော့ ကိုဘီကို လက်လွှတ်ခဲ့ရင် နောက်ထပ်ကြီးမားတဲ့ဆုံးရှုံးမှုဖြစ်မှာကို စိုးရိမ်နေပါတယ်။