နိုင်ငံတကာသီတင်းပတ်အပြီး အချိန်အနည်းငယ်အတွင်းမှာပဲ ကျင်းပဖို့စီစဉ်ထားတဲ့ ကြာသပတေးနေ့၊ လာလီဂါလက်ကျန်ပွဲစဉ်အတွက် တိုက်စစ်မှူးရာဖင်ဟာနဲ့ နောက်ခံလူအရူဂျိုတို့ မပါဝင်နိုင်လို့ မကျေမနပ်ဖြစ်ရတယ်လို့ ဘာစီလိုနာနည်းပြဟန်စီဖလစ်က ပြောကြားပါတယ်။ ဘရာဇီးသားရာဖင်ဟာက အာဂျင်တီးနားကို ၄-၁ ဂိုးဖြင့် ရှုံးနိမ့်ခဲ့တဲ့ ကမ္ဘာ့ဖလားခြေစစ်ပွဲမှာ ပွဲချိန်ပြည့်ပါဝင်ကစားခဲ့ပြီး အဲ့ဒီပွဲစဉ်က အိုဆာဆူနာနဲ့ရင်ဆိုင်ရမယ့် ဘာစီလိုနာပွဲစဉ်စတင်ခင် ၄၂ နာရီအလိုမှာ ပြီးဆုံးသွားခဲ့ပါတယ်။

အလားတူ အရူဂျိုကလည်း ဘိုလီဗီးယားနဲ့ရင်ဆိုင်ရတဲ့ အင်္ဂါနေ့ပွဲစဉ်အတွက် ဥရုဂွေးအရန်လူစာရင်းမှာသာ ပါဝင်ခဲ့ပေမယ့် အိုဆာဆူနာပွဲစဉ်ကို လွဲချော်သွားပါလိမ့်မယ်။ ဘာစီလိုနာနဲ့ အိုဆာဆူနာတို့ ရင်ဆိုင်ရမယ့် လတ်တလောပွဲစဉ်က အခုလအစောပိုင်း၊ ဘာစီလိုနာအသင်းဆရာဝန်မီနဲရိုးဂါစီယာဆုံးပါးမှုကြောင့် ရွှေ့ဆိုင်းခဲ့ရတဲ့ပွဲစဉ် ဖြစ်ပါတယ်။ ဗုဒ္ဓဟူးနေ့သတင်းစာရှင်းလင်းပွဲအတွင်း ဟန်စီဖလစ်ခ်က “ သူတို့နှစ်ဦးလုံး ထွက်လာကြပါပြီ။ လေယာဉ်ခရီးစဉ်က ရှည်လျားလွန်းပြီး အသင့်တော်ဆုံးအခြေအနေလည်း မဖြစ်နေပါဘူး။ သူတို့တွေ ကြံ့ခိုင်မှုပြည့်ဝဖို့နဲ့ လေ့ကျင့်ခန်းဆင်းဖို့ လိုအပ်ပါတယ်။ ပြီးရင် တနင်္ဂနွေနေ့ပွဲစဉ်အတွက် ပါဝင်ကစားနိုင်မလား စောင့်ကြည့်သွားရပါမယ်”လို့ ပြောပါတယ်။

နယ်သာလန်ကွင်းလယ်ကစားသမား ဒီဂျောင်၊ ပိုလန်တိုက်စစ်မှူး လီဝန်ဒေါစကီးအပါအဝင် နိုင်ငံတကာသီတင်းပတ်အတွင်း နိုင်ငံလက်ရွေးစင်တာဝန်ထမ်းဆောင်ရတဲ့ အခြားဘာစီလိုနာကစားသမား ၁၁ ဦးကတော့ အိုဆာဆူနာနဲ့ပွဲစဉ်ကို ပါဝင်ကစားနိုင်ပါလိမ့်မယ်။ ဒါပေမယ့် ဟန်စီဖလစ်ခ် ဒီကစားသမားတွေ ကြံ့ခိုင်မှုအပြည့်အဝမရှိသေးဘူးလို့ ပြောပါတယ်။

ဘာစီလိုနာနည်းပြက “သူတို့အတွက် အကောင်းဆုံးအခြေအနေတော့ မဟုတ်ပါဘူး။ ကစားသမားတွေက နိုင်ငံ့လက်ရွေးစင်အသင်းနဲ့အတူ ကစားပေးခဲ့ရတယ်။ ဒါက ဆိုးလွန်းပါတယ်။ အခုတော့ ကျွန်တော်တို့က အိုဆာဆူနာနဲ့ ကစားရပါမယ်။ ဒါက မှန်ကန်သင့်လျော်တဲ့အခိုက်အတန့်လားဆိုတာ ကျွန်တော်တို့ ဆွေးနွေးသွားရပါမယ်။ ကျွန်တော် မကျေနပ်ပါဘူး။ တခြားလိဂ်တွေမှာ အခုလိုပွဲစဉ်တွေကို ကျင်းပဖို့ အခြားမတူညီတဲ့နည်းလမ်းတွေ ရှိကြပါတယ်။ ကျွန်တော်ကတော့ အခုလိုစီစဉ်မှုတွေကို ပြောင်းလဲနိုင်စွမ်း မရှိပါဘူး။ ဒါက ကျွန်တော့်ရဲ့ပုဂ္ဂလိကအမြင်ပဲ ဖြစ်ပါတယ်။ ဒါပေမယ့် ကျွန်တော်တို့ ပွဲစဉ်ကို ယှဉ်ပြိုင်ကစားရမှာဖြစ်ပြီး ဆင်ခြေပေးနေလို့ မရပါဘူး။ အသင်းက အဆင်သင့်ဖြစ်နေပြီး အကောင်းဆုံးစွမ်းဆောင်ရည်ထုတ်ပြနိုင်ဖို့ ကြိုးစားသွားရပါမယ်။ ဒီအတိုင်းပဲ ကျွန်တော်တို့ ဆက်သွားရပါမယ်။ အသင်းရဲ့အရည်အသွေးပိုင်းက ကောင်းမွန်ပြီး ကစားသမားတွေအတွက် အနားယူချိန် လုံလုံလောက်လောက်မရရှိဘူးဆိုရင်တောင် ဘယ်ပြိုင်ဘက်မဆို အနိုင်ယူနိုင်စွမ်းရှိပါတယ်”လို့ ပြောပါတယ်။

အိုဆာဆူနာကို အနိုင်ရရှိမယ်ဆိုရင် ဘာစီလိုနာအသင်းက လိဂ် ၁၀ ပွဲကစားရဖို့ကျန်ရှိချိန်၊ အနီးဆုံးပြိုင်ဘက်ရီးရဲလ်မက်ဒရစ်ကို သုံးမှတ်ဖြတ်ပြီး လာလီဂါအမှတ်ပေးဇယားထိပ်ဆုံးနေရာမှာ ရပ်တည်သွားနိုင်ပါလိမ့်မယ်။ ကတ္တလန်ကလပ်အသင်းက လာလီဂါ၊ ကိုပါဒယ်လ်ရေး၊ ချန်ပီယံလိဂ်ပြိုင်ပွဲတွေအတွက် ပြိုင်ပွဲစုံခုနစ်ပွဲတိတိကို ၁၉ ရက်အတွင်း ယှဉ်ပြိုင်ကစားသွားရပါမယ်။