ဂျာမနီနဲ့ ပွဲစဉ်အတွက် စကော့တလန်အသင်းမှာ ဘာဖိအားမှမရှိဘူးလို့ ဆိုလိုက်တဲ့ ရော်ဘတ်ဆန်
စကော့တလန်လက်ရွေးစင်အသင်း ကပ္ပတိန်ရော်ဘတ်ဆန်က ဒီနေ့ညပိုင်း၊ ဂျာမနီနဲ့ ရင်ဆိုင်ရမယ့် ယူရို-၂၀၂၄ အုပ်စုအဖွင့်ပွဲစဉ်အတွက် သူတို့အသင်းမှာ ဘာဖိအားမှ မရှိနေသလို ရှုံးထွက်အဆင့်ရောက်ရှိရေး အကူအညီဖြစ်စေမယ့် ရလဒ်ကောင်းတစ်ခုအတွက် တိုက်ပွဲဝင်သွားရလိမ့်မယ်လို့ ပြောဆိုလိုက်ပါတယ်။
လီဗာပူးနောက်ခံလူ ရော်ဘတ်ဆန်က စကော့တလန်အသင်းဟာ နောက်ဆုံး ကစားခဲ့ရတဲ့ ဥရောပချန်ပီယံရှစ်ပြိုင်ပွဲရဲ့ အုပ်စုအဆင့်ပွဲစဉ်တွေမှာ စိတ်ပျက်စရာစွမ်းဆောင်ရည်ကို ပြသခဲ့တယ်ဆိုတာ ဝန်ခံခဲ့ပေမယ့် အခုလိုအမှားမျိုး နောက်တစ်ကြိမ်မကျူးလွန်မိဖို့ လိုအပ်တယ်လို့ ကစားသမားတွေဆီ သတိပေးပြောဆိုလိုက်ပါတယ်။ ဒါ့အပြင် ယူရိုအိမ်ရှင်တွေရဲ့ဘောလုံးပိုင်ဆိုင်မှု အသာစီးရယူကစားလာနိုင်မှုနဲ့အတူ ရော်ဘတ်ဆန်က စကော့တလန်အသင်းဟာ ပြိုင်ဘက်ကို တက်နိုင်သမျှ စိတ်ပျက်အားလျော့နေအောင် လုပ်ဆောင်သွားဖို့ လိုအပ်ပြီး ဘောလုံးပြန်ရရှိမယ့် အခြေအနေအများစုကို အကောင်းဆုံး အသုံးချသွားရမယ်လို့ ပြောပါတယ်။
သတင်းစာရှင်းလင်းပွဲတစ်ခုအတွင်း ရော်ဘတ်ဆန်က “အဲ့ဒီအတိုင်းသာ လုပ်နိုင်မယ်ဆိုရင် ဒါက ရလဒ်ကောင်းတစ်ခုရရှိဖို့ သော့ချက်ဖြစ်လာပါလိမ့်မယ်။ ဒီအတိုင်း လုပ်နိုင်စွမ်းရှိတယ်လို့ ယုံကြည်မှုရှိသလို လုပ်ပြနိုင်ဖို့ကလည်း ကျွန်တော်တို့ရဲ့တာဝန်ပဲဖြစ်ပါတယ်”လို့ ပြောပါတယ်။
စကော့တစ်ရှ်တွေက ၁၉၉၈ ပြင်သစ်ကမ္ဘာ့ဖလားပြိုင်ပွဲနောက်ပိုင်း နိုင်ငံတကာအဆင့်ပြိုင်ပွဲကြီးတွေမှာ ဝင်ရောက်ယှဉ်ပြိုင်နိုင်ခြင်းမရှိဘဲ ပြီးခဲ့တဲ့ယူရို-၂၀၂၀ ပြိုင်ပွဲမှသာ နိုင်ငံတကာဘောလုံးစင်မြင့်ထက်ဆီ ပြန်လည်ရောက်ရှိလာခဲ့တာပါ။ သူတို့တွေက အဓိကပြိုင်ပွဲကြီး ၁၁ ခုမှာ အုပ်စုအဆင့်လွတ်မြောက်အောင် စွမ်းဆောင်နိုင်ခဲ့ခြင်းမရှိဘဲ ဒီသမိုင်းကြောင်းကို ပြောင်းလဲပစ်လိုက်နိုင်ရေးက ယူရို-၂၀၂၄ ပြိုင်ပွဲဝင် စကော့တလန်အသင်းရဲ့ အဓိကရည်မှန်းချက်ဖြစ်လာပါတယ်။
အခုသီတင်းပတ်အတွင်း ဒဏ်ရာပြဿနာခြောက်လှန့်မှုမှ လွတ်မြောက်လာပြီးနောက် ပြိုင်ပွဲဝင်ဖို့ အသင့်ဖြစ်နေပါပြီလို့ ပြောဆိုထားတဲ့ ရော်ဘတ်ဆန်က “ ဒီတစ်ကြိမ်မှာတော့ ဘယ်လိုနောင်တမျိုးကိုမှ နောက်ထပ်မရချင်တော့ပါဘူး။ ကျွန်တော်တို့က သမိုင်းကြောင်းဖန်တီးနိုင်တဲ့ အသင်းဖြစ်တယ်လို့ ယုံကြည်ထားပါတယ်”လို့ ပြောပါတယ်။
မြူးနစ်မြို့ကြီးမှာ မျောလွင့်နေမယ့် ထောင်ပေါင်းများစွာသော ပရိသတ်တွေက အုပ်စု(A) မှာ ဆွစ်ဇာလန်၊ ဟန်ဂေရီတို့နဲ့ပါ အတူတကွကျရောက်နေတဲ့ အသင်းတစ်ခုကို အင်တိုက်အားတိုက်အားပေးဖို့ အသင့်ရှိနေကြပါတယ်။
