အူစမန် ဒမ်ဘီလီက ပီအက်စ်ဂျီအသင်းကို ချန်ပီယံလိဂ်ဆုကို စွဲလမ်းမှု ရပ်တန့်ပြီး “ထူးခြားတဲ့ ရာသီ” တစ်ခုကို ပေးစွမ်းဖို့ ပြောခဲ့ပါတယ်။ သူ့ရဲ့ ကစားသမားဘဝမှာ အကောင်းဆုံး ရာသီတစ်ခု ပိုင်ဆိုင်ခဲ့တဲ့ ဒမ်ဘီလီက ပီအက်စ်ဂျီကို သူတို့ရဲ့ သမိုင်းဝင် အောင်မြင်မှုတွေကို “မေ့ပစ်ဖို့” နဲ့ ထပ်မံရယူဖို့ ကြိုးစားဖို့ တိုက်တွန်းခဲ့ပါတယ်။ Le Monde သတင်းစာနဲ့ ပြောဆိုခဲ့တဲ့ အင်တာဗျူးမှာ ဒမ်ဘီလီက အင်တာမီလန်ကို အနိုင်ရရှိခဲ့တဲ့ ချန်ပီယံလိဂ်အပါအဝင် ၃ လုံးဖလား ရခဲ့တဲ့ ဘောလုံးရာသီအကြောင်း ပြောခဲ့ပါတယ်။

ပြင်သစ်လက်ရွေးစင်ဟာ ၂၀၂၄-၂၀၂၅ ရာသီမှာ ၃၅ ဂိုး သွင်းယူခဲ့ပြီး ၁၆ ဂိုး ဖန်တီးပေးခဲ့ပါတယ်။ ဥရောပအောင်မြင်မှုအတွက် အဓိက မှတ်တိုင်တွေဖြစ်တဲ့ လီဗာပူးနဲ့ အာဆင်နယ်တို့ကို အနိုင်ရခဲ့တဲ့အကြောင်းကိုလည်း အသားပေး ဖော်ပြခဲ့ပါတယ်။

“ပြီးခဲ့တဲ့ရာသီရဲ့ အောင်မြင်မှုတွေကတော့ သမိုင်းရဲ့ တစ်စိတ်တစ်ပိုင်းပါပဲ။ ဒါပေမဲ့ ထူးခြားတဲ့ ရာသီတစ်ခုကို ပြန်အသက်သွင်းချင်တယ်ဆိုရင်တော့ မေ့ပစ်ရပါမယ်” “ကျွန်တော်တို့က ချန်ပီယံတွေ ဖြစ်ချင်ပါတယ်။ ချန်ပီယံတွေက သူတို့ရဲ့ ကစားသမားဘဝတစ်လျှောက်လုံးမှာ ချန်ပီယံလိဂ်လို ကြီးမားတဲ့ ဖလားတွေကို ၂ ကြိမ် ၃ ကြိမ် ရယူနိုင်ပါတယ်” လို့ ဒမ်ဘီလီက ပြောခဲ့ပါတယ်။

ဒီရာသီရဲ့ သူ့ရဲ့ အမှတ်တရ အကောင်းဆုံး အချိန်တွေအကြောင်း မေးခဲ့တဲ့အခါမှာတော့ “လူတိုင်းလိုပါပဲ။ ဒီပြိုင်ပွဲရဲ့ ဒီအဆင့်မှာ ၅-၀ ဂိုး နဲ့ နိုင်တာမျိုးက နှစ်တိုင်းဖြစ်နေတာ မဟုတ်ပါဘူး” “အစကနေ အဆုံးထိ အသင်းက အံ့မခန်း ကစားခဲ့ပါတယ်။ အဲ့ဒီညက ရာသီရဲ့ အကောင်းဆုံး စိတ်ခံစားမှုတွေကို ကျွန်တော် ခံစားခဲ့ရပါတယ်” လို့ ဒမ်ဘီလီက ပြောခဲ့ပါတယ်။

ဒါပေမဲ့ လီဗာပူးကို ပင်နယ်တီနဲ့ အနိုင်ရရှိခဲ့တဲ့ပွဲစဉ်က “အကြီးမားဆုံးအချိန်” ဖြစ်ခဲ့ပြီး “အကောင်းဆုံး ခရီးစဉ်ရဲ့ အစ” ဖြစ်တယ်လို့ ဒမ်ဘီလီက ပြောခဲ့ပါတယ်။ နောက်ဆုံးမှာတော့ ဒမ်ဘီလီက ပြီးခဲ့တဲ့ရာသီက ရုပ်ပိုင်းဆိုင်ရာနဲ့ စိတ်ပိုင်းဆိုင်ရာ အခြေအနေတွေ ရှိခဲ့ပေမဲ့ အောင်မြင်မှုတွေကို ထိန်းသိမ်းဖို့အတွက် ပီအက်စ်ဂျီရဲ့ တွန်းအားကို အလေးပေး ပြောခဲ့ပါတယ်။

“ကျွန်တော်တို့မှာ ဆန္ဒတွေ အများကြီး ရှိနေပါသေးတယ်။ ကျွန်တော်တို့မှာ လူငယ်အဖွဲ့ ရှိပြီး အနိုင်ရဖို့ ဆာလောင်နေပါသေးတယ်။ ပြီးခဲ့တဲ့ရာသီက ကျွန်တော်တို့ ခံစားခဲ့ရတဲ့အရာတွေကို နှစ်တိုင်း ပြန်ခံစားချင်ပါတယ်” လို့ ဒမ်ဘီလီက ပြောခဲ့ပါတယ်။

ပီအက်စ်ဂျီကတော့ ကလပ် ကမ္ဘာ့ဖလားအဖြစ် အမေရိကန်ပြည်ထောင်စုမှာ ချဲလ်ဆီးကို ရှုံးနိမ့်ပြီး ချန်ပီယံလိဂ်လိုမျိုးအောင်မြင်မှုကို မရရှိခဲ့ပါဘူး။ ဒါပေမဲ့ ယူအီးအက်ဖ်အေ စူပါဖလားမှာ တော့တင်ဟမ်ကို အနိုင်ရပြီး ရာသီရဲ့ ပထမဆုံး လီဂူးဝမ်း ပွဲစဉ် ၂ ပွဲစလုံးကို အနိုင်ရရှိခဲ့ပါတယ်။

ဒမ်ဘီလီနဲ့ ပီအက်စ်ဂျီအတွက်တော့ ပြီးခဲ့တဲ့ရာသီက တစ်ခါတည်း အကောင်းဆုံး ခြေစွမ်းပြတာမျိုး မဟုတ်ဘူးဆိုတာကို သက်သေပြဖို့ စိန်ခေါ်မှုတွေ ရှိနေပါပြီ။ လူးဝစ် အင်းနရစ်ရဲ့ အသင်းကတော့ လီဂူးဝမ်း ဖလားကို ကာကွယ်ရမှာဖြစ်သလို နောက်ထပ် ချန်ပီယံလိဂ်ခရီးစဉ်အတွက် ကြံ့ခိုင်နေဖို့လည်း လိုအပ်ပါတယ်။

တစ်ဦးချင်းအနေနဲ့ ဒမ်ဘီလီရဲ့ ရွှေဘောလုံးဆု မျှော်လင့်ချက်ကတော့ လာမင်း ယာမဲလ်၊ ရာဖင်ညာနဲ့ ကီလီယန် အမ်ဘာပေတို့လို ထိပ်တန်းကစားသမားတွေနဲ့ ယှဉ်ပြိုင်ရတာကြောင့် မရေမရာ ဖြစ်နေပါသေးတယ်။