နော်တင်ဟမ်ဖောရက်စ်နည်းပြ နူနိုဆန်တိုက ပရီးမီးယားလိဂ်ရဲ့  "Big Six" အသင်းတွေရဲ့ စိုးမိုးချုပ်ကိုင်မှုဟာ လျော့ပါးလာနေပြီလို့ ယုံကြည်နေပြီး  "ကွာဟချက်ဆိုတာ မရှိတော့ဘူး" လို့ ယူနိုက်တက်အသင်းနဲ့ ပွဲမတိုင်ခင် ပြောကြားခဲ့ပါတယ်။

လက်ရှိပရီးမီးယားလိဂ် အဆင့် (၃) နေရာမှာ ရပ်တည်နေတဲ့အပြင် အက်ဖ်အေဖလား ဆီမီးဖိုင်နယ်အဆင့်ကိုလည်း တက်ရောက်ထားတဲ့ ဖောရက်စ်အသင်းဟာ အင်္ဂါနေ့ညမှာ ယူနိုက်တက်အသင်းကို City Ground မှာ လက်ခံယှဉ်ပြိုင်ကစားမှာဖြစ်ပါတယ်။ ယူနိုက်တက်အသင်းကတော့ အမှတ်ပေးဇယားအဆင့် ၁၃ နေရာမှာ ရောက်နေပြီး ဒီရာသီမှာ ယူရိုပါလိဂ်ဖလားတစ်ခုတည်းသာ မျှော်လင့်ချက်ရှိတော့တာဖြစ်ပါတယ်။

ယူနိုက်တက်၊ လီဗာပူး၊ အာဆင်နယ်၊ မန်စီးတီး၊ ချဲလ်ဆီးနဲ့ တော့တင်ဟမ်တို့လို အသင်းတွေဟာ ဒီပြိုင်ပွဲမှာ အချမ်းသာဆုံးကလပ်အသင်းတွေဖြစ်နေပေမဲ့ နူနိုဆန်တိုကတော့ နော်တင်ဟမ်ဖောရက်စ်၊ ဘရိုက်တန်၊ ဖူလ်ဟမ်၊ အက်စတွန်ဗီလာနဲ့ ဘုန်းမောက်တို့လို ဝင်ငွေနည်းတဲ့အသင်းတွေဟာ ကွင်းအတွင်းမှာ အပြိုင်အဆိုင်ပိုများလာတယ်လို့သုံးသပ်ခဲ့ပါတယ်။

ယူနိုက်တက်အသင်းနဲ့ပွဲမတိုင်ခင် နူနိုက "ဒါဟာ အပြောင်းအလဲတွေဖြစ်လာနေတာပါ။ ကွာဟချက်က အရင်ကလောက် မသိသာတော့ပါဘူး။ Big Six အသင်းတွေအပြင် ကျွန်တော်တို့လိုကလပ်အသင်းတွေက တိုးတက်လာပြီး ယှဉ်ပြိုင်နိုင်စွမ်းရှိလာကြပါတယ်" လို့ပြောခဲ့ပါတယ်။

ဒီအပြောင်းအလဲကို နူနိုက အကြောင်းရင်းအချို့နဲ့ ရှင်းပြခဲ့ပါတယ်။"ဒါက ကစားသမားခေါ်ယူမှုကိစ္စတစ်ခုပါပဲ။ ပြီးတော့ ပြိုင်ပွဲကိုယ်တိုင်ကလည်း ပရီးမီးယားလိဂ်ကိုရောက်လာတဲ့ ကစားသမားတွေကို အဆင့်မြင့်မားတဲ့အခြေအနေကို ရောက်ရှိအောင်လုပ်ဆောင်ပေးပါတယ်။ ကစားသမားတွေရဲ့ အရည်အသွေး၊ နည်းပြတွေရဲ့ အရည်အသွေးနဲ့ ပွဲစဉ်ရဲ့ အရည်အသွေးတွေနဲ့လည်း သက်ဆိုင်ပါတယ်"လို နူနိုက ဆိုပါတယ်။

နူနိုက ယူနိုက်တက်နည်းပြဖြစ်သူ ရူဘင်အာမိုရင်အတွက်လည်း စာနာကြောင်းပြောကြားခဲ့ပါတယ်။ အာမိုရင်ဟာ ပြီးခဲ့တဲ့နိုဝင်ဘာလက အဲရစ်တန်ဟက်ရဲ့နေရာကို တာဝန်ယူခဲ့ပေမဲ့ အသင်းရဲ့ကံကြမ္မာကို သိသိသာသာမပြောင်းလဲနိုင်ခဲ့ပါဘူး။