လီဗာပူးအသင်းအတွက် ပါဝင်ကစားပေးရင်း ဒဏ်ရာတစ်ခုရရှိပြီးနောက် စပိန်အသင်းနဲ့ရင်ဆိုင်ရမယ့် နေးရှင်းလိဂ်ကွာတားဖိုင်နယ်ပွဲစဉ်ကို နယ်သာလန်လက်ရွေးစင်ကွင်းလယ်ကစားသမားဂရာဗန်ဘတ်ချ် လွဲချော်သွားလိမ့်မယ်လို့ ဒတ်ချ်ဘောလုံးအဖွဲ့ချုပ်က ယမန်နေ့(ဗုဒ္ဓဟူးနေ့)မှာ ကြေညာခဲ့ပါတယ်။

ဒါပေမယ့် နည်းပြရော်နယ်ကိုးမန်းကတော့ ရော်တာဒမ်မှာ နေးရှင်းလိဂ်အုပ်စု (A-4)ရဲ့ အုပ်စုဗိုလ်နဲ့ ရင်ဆိုင်ရမယ့် ကြာသပတေးနေ့၊ ကွာတားဖိုင်နယ်ပထမအကျော့ပွဲစဉ်အတွက် ဒီပိုင်းနဲ့ ဖရန်ကီဒီဂျောင်တို့ ကြံ့ခိုင်မှုအပြည့်နဲ့ အသင့်ရှိနေမယ်လို့ အတည်ပြုခဲ့ပါတယ်။

ဒတ်ချ်ဘောလုံးအဖွဲ့ချုပ်ရဲ့ကြေညာချက်တစ်ခုမှာ “ ဂရာဗန်ဘတ်ချ်က လက်ရွေးစင်အသင်းလေ့ကျင့်ရေးကွင်းမှ ဒီနေ့ညနေပိုင်းမှာ ထွက်ခွာသွားခဲ့ပါတယ်။ ကွင်းလယ်ကစားသမားက ပြီးခဲ့တဲ့သီတင်းပတ်ကုန်မှာရရှိခဲ့တဲ့ ဒဏ်ရာပြဿနာကို ဆက်လက်ခံစားနေရဆဲဖြစ်လို့ စပိန်နဲ့ရင်ဆိုင်ရမယ့်ပွဲစဉ်ကို လွဲချော်သွားပါလိမ့်မယ်”လို့ ဖော်ပြထားပါတယ်။

အသက်-၂၂ နှစ်အရွယ်ကစားသမားက ပြီးခဲ့တဲ့တနင်္ဂနွေနေ့၊ ဝင်ဘာလေမှာ နယူးကာဆယ်ကို ရှုံးနိမ့်ခဲ့တဲ့ ကာရာဘောင်းဖလားဗိုလ်လုပွဲအတွင်း ဒဏ်ရာပြဿနာကြုံတွေ့ခဲ့ပါတယ်။ ဂရာဗန်ဘတ်ချ်က အခုဘောလုံးရာသီ၊ ပရီးမီးယားလိဂ်ချန်ပီယံဆုစိန်ခေါ်သူလီဗာပူးအသင်းအတွက် လိဂ်ပွဲစဉ်တိုင်းမှာ ပွဲထွက်ပါဝင်ကစားခဲ့ပြီး ဧပြီ ၂ ရက်၊ အဲဗာတန်နဲ့ရင်ဆိုင်ရမယ့် မာဆေးဆိုဒ်ဒါဘီပွဲစဉ်မတိုင်ခင် သူ့ရဲ့အခြေအနေဘယ်လိုရှိမလဲဆိုတာ စောင့်ကြည့်သွားရပါလိမ့်မယ်။