ဒဏ်ရာပြဿနာတွေနဲ့ပတ်သက်ပြီး အံ့ဖွယ်ဖြစ်စဉ်တွေ လိုအပ်နေပြီလို့ ဖွင့်ဟလာတဲ့ ယာဂန်ကလော့ပ်
ဒီနေ့ညပိုင်း၊ အက်ဖ်အေဖလား ပဉ္စမအဆင့်ပွဲစဉ်အဖြစ် အန်ဖီးလ်မှာ ဆောက်သမ်တန်ကို ဧည့်ခံကစားရဖို့ ပြင်ဆင်နေချိန်မှာပဲ လီဗာပူးနည်းပြ ယာဂန်ကလော့ပ်က အသင်းရဲ့ဒဏ်ရာပြဿနာတွေကို ကိုင်တွယ်ဖြေရှင်းနိုင်ဖို့ အံ့ဖွယ်ဖြစ်စဉ်တွေ လိုအပ်နေကြောင်း ထုတ်ဖော်ပြောဆိုလိုက်ပါတယ်။
ကလော့ပ်ရဲ့ဒဏ်ရာရ ကစားသမားစာရင်းမှာ နောက်ဆုံးပါဝင်လာသူကတော့ ခြေကျင်းဝတ်ဒဏ်ရာ ရနေတဲ့ ဒတ်ချ်ကွင်းလယ်လူဂရာဗန်ဘတ်ချ်ပဲ ဖြစ်ပါတယ်။ မိုဆာလက်၊ ဆိုဘိုဆလိုင်းနဲ့ ဒါဝင်နူနက်ဇ်တို့ကတော့ အသင်းနဲ့အတူ လေ့ကျင့်ခန်းပြန်ဆင်းနေပေမယ့် ချန်ပီယံရှစ်ကလပ် ဆောက်သမ်တန်နဲ့ ရင်ဆိုင်ရမယ့်ပွဲစဉ်မှာ ပါဝင်ကစားနိုင်ပါ့မလားဆိုတာ သံသယနဲ့ စောင့်ကြည့်နေရဆဲဖြစ်ပါတယ်။
ဒဏ်ရာရ ကစားသမားစာရင်းနဲ့ ပတ်သက်လို့ ကလော့ပ်က “အများကြီးတိုးတက်လာပြီလို့တော့ ကျွန်တော် ပြောလို့ မရပါဘူး”လို့ ဆိုပါတယ်။ ချဲလ်ဆီးကို အနိုင်ရခဲ့တဲ့ တနင်္ဂနွေနေ့၊ ကာရာဘောင်ဖလား ဗိုလ်လုပွဲအတွင်း ဒဏ်ရာရရှိသွားတဲ့ ဂရာဗန်ဘတ်ချ်ကို ထမ်းစင်ဖြင့် သယ်ထုတ်ခဲ့ရပါတယ်။
နောက်ပိုင်းမှာတော့ သူက အကာအကွယ်ဖိနပ်၊ ဂျိုင်းထောက်တို့ကို ဝတ်ဆင်ကာ ကွင်းဘေးစည်းအနီး ပြန်လည်ဝင်ရောက်လာပြီး ဆုဖလားအောင်ပွဲခံမှုမှာ ပူးပေါင်းပါဝင်ခဲ့ပါတယ်။ အသက်-၂၁ နှစ်အရွယ် ဒတ်ချ်လက်ရွေးစင်က အလီဆင်၊ အာနိုးလ်၊ မာတစ်၊ သီယာဂို၊ ကာတစ်ဂျုံးစ်၊ ဘာ့ဂျ်စီတစ်၊ ဂျိုတာတို့နဲ့အတူ ကာလအတန်ကြာ အနားယူရပါမယ်။
တန်းတက်မျှော်လင့်ချက်ရှိနေတဲ့ ဆောက်သမ်တန်နဲ့ ရင်ဆိုင်ရမယ့် ပွဲစဉ်အတွက် ဆုံးဖြတ်ချက်တွေ မချမှတ်ခင် အင်္ဂါနေ့လေ့ကျင့်ရေးအစီအစဉ်တစ်ခုမှာ ဆိုဘိုဆလိုင်း၊ ဒါဝင်နူနက်ဇ်နဲ့ မိုဆာလက်တို့ ဘယ်လိုအခြေအနေမျိုးရှိနေမလဲဆိုတာ စောင့်ကြည့်သွားပါဦးမယ်လို့ ယာဂန်ကလော့ပ်က ရှင်းပြပါတယ်။ ဒါ့အပြင် ကွင်းလယ်လူဝါတာရုအန်ဒိုကိုလည်း သံသယအခြေအနေနဲ့ စောင့်ကြည့်နေရပြန်ပါတယ်။
ကလော့ပ်က “ဂရာဗန်ဘတ်ချ်ကတော့ မကစားနိုင်ပါဘူး။ အဆိုးရွားဆုံးအထိ ဖြစ်လာနိုင်ပေမယ့် သူ့ကို အခုပွဲစဉ်နဲ့ လာမယ့်ပွဲစဉ်အတွက် ဖယ်ထုတ်ထားလိုက်ရတာနဲ့တင် တော်တော်လေးကို ဆိုးရွားနေပါပြီ။ ကျွန်တော်တို့ စောင့်ကြည့်သင့်ပါတယ်။ အချို့ကစားသမားတွေအတွက် ဒဏ်ရာမှပြန်လာနိုင်ဖို့ အံ့ဖွယ်ဖြစ်စဉ်တွေ ကျွန်တော်တို့ လိုအပ်နေပါပြီ။ ဒါကြောင့် ကျွန်တော် သူတို့ကို အချိန်အကြာကြီး လက်မလွှတ်ထားချင်တော့ပါဘူး။ ဒါပေမယ့် ကာရာဘောင်ဗိုလ်လုပွဲမှာ မကစားနိုင်တဲ့ ကောင်လေးအများစုနဲ့အတူ အခုလို ဖြစ်လာမလားဆိုတာလည်း မသေချာသေးပါဘူး”လို့ ဆက်ပြောခဲ့ပါတယ်။
လီဗာပူးက ဝင်ဘာလေမှာ ချဲလ်ဆီးကို အနိုင်ယူပြီး အခုရာသီအတွက် ပထမဆုံးဆုဖလားကို ဆွတ်ခူးထားနိုင်သလို ဖလားလေးလုံးအောင်မြင်မှု မျှော်လင့်ချက်အပေါ် အစမ်းသပ်ခံဖို့ ဒီနေ့ညပိုင်းမှာ ရပ်ဆဲလ်မာတင်ရဲ့အသင်းနဲ့ ရင်ဆိုင်ကစားရပါမယ်။
