ဘုန်းမောက်ကိုအနိုင်ရရှိခဲ့တဲ့ အက်ဖ်အေဖလားပွဲစဉ်အတွင်း ဟာလန်းရရှိခဲ့တဲ့ ခြေကျင်းဝတ်ဒဏ်ရာနဲ့ ပတ်သက်လို့ နောက်ဆုံးအခြေအနေကို မန်စီးတီးအသင်းက ထုတ်ပြန်ခဲ့ပါတယ်။ ဘုန်းမောက်ကိုအနိုင်ရရှိခဲ့တဲ့ တနင်္ဂနွေနေ့၊ အက်ဖ်အေဖလားကွာတားဖိုင်နယ်ပွဲစဉ်အတွင်း ဟာလန်း ခြေကျင်းဝတ်ဒဏ်ရာရရှိခဲ့ပြီး နောက်ပိုင်းမှာ အကာအကွယ်ဖိနပ်တစ်ခုဝတ်ဆင်ထားခဲ့ပါတယ်။ 

ရာသီကုန်အထိ တိုက်စစ်မှူး အနားယူရနိုင်လားဆိုတဲ့ စိုးရိမ်မှုတွေထွက်ပေါ်နေချိန်မှာပဲ မန်စီးတီးအသင်းဘက်ကတော့ ဟာလန်းရဲ့လတ်တလောကြံ့ခိုင်မှုပိုင်းနဲ့ပတ်သက်လို့ နောက်ဆုံးအခြေအနေတစ်ခုကို ထုတ်ပြန်ပေးခဲ့ပါတယ်။ ကလပ်အသင်းထုတ်ပြန်ချက်တစ်ခုမှာ “ ဟာလန်းရဲ့ဘယ်ခြေကျင်းဝတ်မှာ ဒဏ်ရာပြဿနာတစ်ခု ရှိနေတယ်ဆိုတာကို မန်စီးတီးအသင်းအနေဖြင့် အတည်ပြုပေးနိုင်ပါတယ်။ နော်ဝေသားတိုက်စစ်မှူးက ပြီးခဲ့တဲ့တနင်္ဂနွေနေ့၊ အက်ဖ်အေဖလားကွာတားဖိုင်နယ်အဝေးကွင်းနိုင်ပွဲမှာ ဒဏ်ရာရရှိခဲ့တာပါ။ တနင်္လာနေ့မနက်ခင်းပိုင်းမှာတော့ ဟာလန်းရဲ့ဒဏ်ရာကနဦးစစ်ဆေးမှုကို မန်ချက်စတာမြို့မှာ လုပ်ဆောင်ခဲ့ပါတယ်။ ဒဏ်ရာအခြေအနေအတိုင်းအတာအသေးစိတ်ကို သိရှိနိုင်ဖို့တော့ အထူးကုပါရဂူတွေနဲ့ တိုင်ပင်ဆွေးနွေးသွားရပါဦးမယ်။ အကဲဖြတ်မှုတွေကိုလည်း ဆက်လက်လုပ်ဆောင်နေပါတယ်။ နွေရာသီကလပ်ကမ္ဘာ့ဖလားပြိုင်ပွဲအပါအဝင် လက်ကျန်ဘောလုံးရာသီရဲ့ အစိတ်အပိုင်းတစ်ရပ်မှာ အသင်းအတွက် ဟာလန်းပြန်ကစားပေးနိုင်ဖို့အတွက် ကြံ့ခိုင်မှုပြည့်ဝလာစေရေး မျှော်လင့်မိပါတယ်။ အသင်းမှာရှိတဲ့သူတိုင်း ဟာလန်း အလျှင်အမြန်သက်သာလာဖို့ ဆုတောင်းပေးနေသလို သူ့ရဲ့အခြေအနေနဲ့ပတ်သက်လို့လည်း ပုံမှန်သတင်းထုတ်ပြန်ပေးသွားပါမယ်”လို့ ဖော်ပြထားပါတယ်။

မန်စီးတီးအတွက် လတ်တလောနှစ်တွေအတွင်း အဆိုးဝါးဆုံးဘောလုံးရာသီတစ်ခုကို ဖြတ်သန်းနေရပေမယ့် ဟာလန်းကတော့ အခုဘောလုံးရာသီမှာ ပြိုင်ပွဲစုံဂိုး ၃၀ အထိ သွင်းယူပေးထားပါတယ်။ ပက်ဂွါဒီယိုလာအသင်းက လာမယ့်ရာသီ၊ ချန်ပီယံလိဂ်ပြိုင်ပွဲဝင်ခွင့်ရရှိဖို့နဲ့ အက်ဖ်အေဖလားဆွတ်ခူးနိုင်ဖို့ ကြိုးစားနေဆဲဖြစ်ပါတယ်။ ဒါပေမယ့် အသင်းတိုက်စစ်ပိုင်းမှာ နော်ဝေသားမပါဝင်လာဘူးဆိုရင် ဒီကြိုးပမ်းမှုတွေ အတော်လေးအခက်တွေ့သွားနိုင်ပါတယ်။

အသက်-၂၄ နှစ်အရွယ်တိုက်စစ်မှူးကို အခုဘောလုံးရာသီမကုန်ဆုံးခင် အသင်းအတွက် ပြန်ကစားပေးနိုင်ဖို့ မျှော်လင့်ထားတယ်လို့ မန်စီးတီးအသင်းထုတ်ပြန်ချက်မှာ ဖော်ပြခဲ့မှုကြောင့် ပြင်းထန်ဒဏ်ရာမဖြစ်လာဖို့တော့ မျှော်လင့်ရပါတယ်။ ဒါပေမယ့် ဟာလန်း ဘယ်လောက်ကြာကြာအနားယူရမလဲဆိုတာကိုတော့ စောင့်ကြည့်သွားရပါဦးမယ်။