ယခုနှစ်ရာသီအစပိုင်းကတည်းက ပရီးမီးယားလိဂ် ၆ ပွဲတွင် ၂၅ ဂိုးအထိ သွင်းယူထားသော်လည်း အချက်အချာကျတဲ့နေရာအတွက် ကစားသမားခေါ်ယူခဲ့ခြင်း မရှိတာကြောင့် အာတီတာရဲ့အသင်းဟာ လက်ရှိအချိန်မှာ ဝေဖန်ခြင်းခံနေရတာဖြစ်ပါတယ်။ အာဆင်နယ်ဟာ ဇန်နဝါရီအပြောင်းအရွှေ့တွင် အိုင်ဗန်တိုနေးကို ခေါ်ယူရန် ချိတ်ဆက်ခဲ့သော်လည်း ဘရန့်ဖို့ဒ်ရဲ့ ပေါင်သန်း ၈၀ တောင်းခံမှုက စိတ်ဝင်စားနေတဲ့ ကလပ်တွေကို နှုတ်ထွက်သွားစေခဲ့ပါတယ်။

ယခုရက်သတ္တပတ် ချန်ပီယံလိဂ်တွင် ပေါ်တိုကို ၁-၀ ဂိုးဖြင့် ရှုံးနိမ့်ပြီးနောက် အာဆင်နယ် တိုက်စစ်မှူးဟောင်း ဝဲလ်ကော့က ရာသီကုန်တွင် တိုနေးကို ခေါ်ယူပေးရန် ကလပ်အား တိုက်တွန်းခဲ့ပါတယ်။ ဒါပေမယ့် အီဒူးကတော့ ဒီနွေရာသီမှာ နံပါတ် ၉ အသစ်ကို ခေါ်ယူဖို့ ကလပ်ကို တိုက်တွန်းနေတဲ့ အာဆင်နယ်ပရိသတ်တချို့နဲ့ တူညီတဲ့ ပူပန်မှုတွေကို မမျှဝေဘူးလို့ အခိုင်အမာဆိုလိုက်ပါတယ်။

ဖာဒီနန်က ဒီနွေရာသီမှာ အာဆင်နယ်အတွက် တိုက်စစ်မှူးသစ် ခေါ်ယူဖို့ စဉ်းစားနေလားလို့ မေးမြန်းရာမှာ အီဒူးက "ပရိသတ်တွေ တောင်းဆိုတာကို ကျွန်တော် နားလည်ပါတယ်။ ဒါပေမယ့် ကျွန်တော်တို့မှာ ကျွန်တော်တို့ရဲ့ စိတ်ကူးတွေ၊ ရည်မှန်းချက်တွေ ရှိပြီးသားပါ" "ကျွန်တော်တို့ ရင်ဆိုင်ရမယ့်အရာတွေအတွက် ကြိုတင်စီစဉ်ထားပါတယ်" "ကျွန်တော်တို့အသင်းက ဂိုးတွေ အများကြီးမသွင်းရင်၊ အခွင့်အရေးတွေ မဖန်တီးရင် ကျွန်တော် စိုးရိမ်မိမှာဖြစ်သလို အဲ့ဒါနဲ့ဆန့်ကျင်ဘက်ဖြစ်နေပြီး အသင်းက အခွင့်အရေးတွေ အများကြီးဖန်တီးနေတယ်၊ ဂိုးတွေ အများကြီး သွင်းနေတယ်လို့ ထင်ပါတယ်" "အစီအစဉ်ကတော့ နှစ်တိုင်း ပိုကောင်းအောင် ကြိုးစားဖို့ပါ၊ ကောင်းတဲ့အခိုက်အတန့်တစ်ခုလို့ ကျွန်တော်ထင်ပါတယ်။ ဆက်ပြီး တိုးတက်နိုင်မလားဆိုတာ ကြည့်ကြရအောင်ပါ" လို့ ဖြေပါတယ်။

"မျှမျှတတပြောရရင် လောလောဆယ်မှာ လုပ်စရာတွေ အများကြီးရှိနေပါတယ်" "ကျွန်တော့်ရဲ့ အခန်းကဏ္ဍက ပထမအသင်းမှာတင်မကဘဲ အမျိုးသမီးအသင်းနဲ့ အကယ်ဒမီကိုလည်း ကြည့်ရပါတယ်" "ဟုတ်ပါတယ်။ အခုကျွန်တော်တို့အနေနဲ့ နွေရာသီအကြို ခေါ်ယူမှုတွေအတွက် စတင်စီစဉ်နေပါပြီ။ အများကြီး လုပ်နေတာကြောင့် ကျွန်တော်တို့က တကယ်ကို ပျော်ရွှင်နေပါတယ်" လို့ အီဒူးက ထပ်လောင်း ပြောကြားလိုက်ပါတယ်။