အယ်လ်ဗာရက်ဇ်ဟာ အက်သလက်တီကိုရှိ ပထမဆုံးရာသီ၌ အထင်ကြီးစရာ ကောင်းခဲ့ပြီး ပြိုင်ပွဲအားလုံးတွင် ၂၉ ဂိုး သွင်းယူနိုင်ခဲ့ပါတယ်။ အာဂျင်တီးနားလက်ရွေးစင် ကစားသမားဟာ မန်စီးတီးအတွက် ဂိုးများ အဆက်မပြတ် သွင်းယူပေးခဲ့သော်လည်း ပွဲကစားချိန် ပိုမိုရရှိရန်အတွက် ပြီးခဲ့တဲ့ နွေရာသီက အီတီဟတ်မှ ထွက်ခွာသွားခဲ့တာဖြစ်ပါတယ်။

အယ်လ်ဗာရက်ဇ်ဟာ အက်သလက်တီကိုတွင် ဒီယေဂို ဆီမြွန်နီရဲ့ လူစာရင်းတွင် အရေးအပါဆုံး ကစားသမားတစ်ဦးအဖြစ် လျင်မြန်စွာ နေရာယူနိုင်ခဲ့ပြီး သူ့ရဲ့ခြေစွမ်းကလည်း အားလုံးရဲ့ အာရုံစိုက်ခြင်းခံခဲ့ရပါတယ်။ Marca သတင်းစာရဲ့ ဖော်ပြချက်အရ ပရီးမီးယားလိဂ် ချန်ပီယံ လီဗာပူးနှင့် ဒုတိယဆုရှင် အာဆင်နယ် နှစ်သင်းစလုံးဟာ မန်စီးတီးအတွက် ၁၀၃ ပွဲ ကစားရာတွင် ၃၆ ဂိုး သွင်းယူပေးခဲ့တဲ့ အသက် ၂၅ နှစ်အရွယ် ကစားသမားကို စိတ်ဝင်စားကြောင်း သိရပါတယ်။

လီဗာပူးဟာ ဖြစ်နိုင်ဖွယ် နွေရာသီ အပြောင်းအရွှေ့အတွက် အက်သလက်တီကို မက်ဒရစ်ထံသို့ စုံစမ်းမှုများ ပြုလုပ်ထားပြီးဖြစ်သော်လည်း အာဆင်နယ်ကိုမူ အပြင်းထန်ဆုံး ကမ်းလှမ်းနိုင်သူ အဖြစ် တော်တော်များများက ရှုမြင်ထားကြောင်း သိရပါတယ်။ ဆလော့ဟာ ပရီးမီးယားလိဂ်တွင် တိုက်စစ်မှူး မပါဘဲ အဓိက ကစားခဲ့ပြီးနောက် အန်ဖီးလ်သို့ ထိပ်တန်း ဂိုးသွင်းရှင် တစ်ဦးကို ခေါ်ယူရန် စိတ်အားထက်သန်နေပါတယ်။

အာဆင်နယ်အတွက်လည်း ထိုနည်းအတိုင်းပင်ဖြစ်ပြီး မီခဲလ် အာတီတာက အမ်မရိတ်စ်သို့ ထိပ်တန်း တိုက်စစ်မှူးတစ်ဦးကို နောက်ဆုံးတွင် ခေါ်ဆောင်လာရန် အသည်းအသန် ကြိုးစားနေပါတယ်။ ပရီးမီးယားလိဂ် ပြိုင်ဘက်များဟာ ဗစ်တာ ရောကရက်စ်နှင့် ဟူဂို အီကီတီကီတို့ကို ခေါ်ယူရန် ချိတ်ဆက်မှုများ ရှိခဲ့သော်လည်း အယ်လ်ဗာရက်ဇ်ကို ၎င်းတို့ရဲ့ ပစ်မှတ်စာရင်းတွင် ထည့်သွင်းထားပုံရပါတယ်။

အယ်လ်ဗာရက်ဇ် မန်စီးတီးတွင် ရှိနေစဉ် ပြီးခဲ့တဲ့ နွေရာသီက အာဆင်နယ်နှင့်အတူ ချဲလ်ဆီးကလည်း စိတ်ဝင်စားကြောင်း သိရပါတယ်။ အယ်လ်ဗာရက်ဇ်ဟာ ပရီးမီးယားလိဂ်အကြောင်းကို ကောင်းစွာသိရှိသော်လည်း စပိန်လာလီဂါရှိ ပထမဆုံးရာသီ တွင် အလွန်ကောင်းမွန်ခဲ့မှုနှင့် အက်သလက်တီကို မက်ဒရစ်တွင် အလွယ်တကူ အခြေကျခဲ့မှုကြောင့် အင်္ဂလန်သို့ ပြန်လာရန် စိတ်နှစ်ခွဖြစ်နေကြောင်း သိရပါတယ်။

Marca ရဲ့ ဖော်ပြချက်အရ ဘာစီလိုနာဟာ အယ်လ်ဗာရက်ဇ်ကို စပိန်တွင် ဆက်နေရုံသာမက အဓိက ဆုဖလားများ ရရှိနိုင်မည့် အခွင့်အရေး ပေးနိုင်တယ်လို့ သိရပါတယ်။ အဘယ်ကြောင့်ဆိုသော် ၎င်းတို့က အာဂျင်တီးနားသားကို ရောဘတ် လီဝန်ဒေါ့စကီးရဲ့ နေရာကို ဆက်ခံမည့်သူအဖြစ် ရှုမြင်ထားသောကြောင့် ဖြစ်ပါတယ်။

လီဝန်ဒေါ့စကီးက နူးကမ့်တွင် နောက်ထပ် အောင်မြင်သော ရာသီတစ်ခုကို ပိုင်ဆိုင်ခဲ့ပြီး ပြိုင်ပွဲအားလုံးတွင် ဂိုး ၄၀ သွင်းယူနိုင်ခဲ့သော်လည်း အသက် ၃၆ နှစ်ရှိပြီဖြစ်သဖြင့် ဆုဖလားများစွာရရှိခဲ့သော ကစားသမားဘဝ ပြီးဆုံးတော့မှာ ဖြစ်ပါတယ်။

အယ်လ်ဗာရက်ဇ်ရဲ့ စပိန်မြို့တော်တွင် ပြသခဲ့သော အထင်ကြီးစရာ ခြေစွမ်းကြောင့် မန်စီးတီးက ပြီးခဲ့တဲ့ နွေရာသီက ရောင်းချခဲ့တဲ့ ဆုံးဖြတ်ချက်အပေါ် မေးခွန်းထုတ်မှုများ ရှိလာခဲ့ပါတယ်။ သို့သော် မန်စီးတီးဟာ တိုက်စစ်မှူးကို ရောင်းချခဲ့ရာတွင် ပေါင် ၈၁.၅ သန်း (ယူရို ၉၅ သန်း) ရရှိခဲ့ပြီး ပက်ဂွါဒီယိုလာက အယ်လ်ဗာရက်ဇ် ကိုယ်တိုင် အပြောင်းအရွှေ့ကို စတင်ခဲ့ခြင်းဖြစ်တယ်လို့ ပြောကြားကာ ဆုံးဖြတ်ချက်ကို ကာကွယ်ခဲ့ပါတယ်။

"သူနဲ့ အလုပ်လုပ်ရတာ ပျော်စရာပါပဲ" လို့ ဂွါဒီယိုလာက ပြောကြားခဲ့ပါတယ်။ "ကျွန်တော် သူ့ဆီကနေ အများကြီး သင်ယူခဲ့ရပြီး သူ ရှာနေတဲ့ အရာကို တွေ့ရှိနိုင်ပါစေလို့ မျှော်လင့်ပါတယ်" "သူ ဒီမှာနေတဲ့ ကာလ ပြီးဆုံးသင့်ပြီလို့ သူ ယုံကြည်တယ်။ ဒါကြောင့် ကလပ်နှစ်သင်းလုံး သဘောတူညီမှု ရခဲ့ကြတာပါ"

"သူ့ရဲ့ အပြုအမူတွေကြောင့် အသင်းက သူ့ကို အရမ်းချစ်ပါတယ်။ ဒါပေမယ့် ကျွန်တော် ကစားသမားများစွာအတွက် အကြိမ်ကြိမ် ပြောခဲ့သလိုပါပဲ သူ ထွက်သွားပြီး စိန်ခေါ်မှုအသစ်တစ်ခု ရယူချင်တာပါ" လို့ ဂွါဒီယိုလာက ပြောကြားခဲ့ပါတယ်။

ရာသီအစောပိုင်းက အင်္ဂလန်ကွင်းလယ်လူဟောင်း ဂျိုး ကိုးလ်က အယ်လ်ဗာရက်ဇ်ကို နောင်တွင် ဘော်လွန်းဒီအော် ဆုရှင်ဖြစ်လာမည်ဟု ချီးကျူးခဲ့ပါတယ်။ "သူက ပရီးမီးယားလိဂ်ကနေ ကျွန်တော်တို့ အရမ်းရင်းနှီးတဲ့ ကစားသမားတစ်ဦးပါ" လို့ ကိုးလ်က အက်သလက်တီကို မက်ဒရစ်နှင့် ရီးရဲလ်မက်ဒရစ်တို့၏ ချန်ပီယံလိဂ် ပထမအကျော့ပွဲအပြီး TNT Sports တွင် ပြောကြားခဲ့ပါတယ်။

"ချန်ပီယံလိဂ်မှာ ဒီထက်ကောင်းတဲ့ ဂိုးကို ခင်ဗျား မြင်ရမှာ မဟုတ်ပါဘူး။ ဒါဟာ လှပပါတယ်၊ စိတ်လှုပ်ရှားစရာ ကောင်းပါတယ်" "ဒီကလေးက အကုန်လုံးကို အနိုင်ရပြီး အကုန်လုံးကို လုပ်ဆောင်ပြီးပြီ။ သူက အသက် ၂၅ နှစ်ပဲ ရှိသေးတယ်။ လာမယ့် ငါးနှစ်အတွင်း သူ့ရဲ့ အကောင်းဆုံးပုံစံကို ကျွန်တော်တို့ မြင်ရပါလိမ့်မယ်။ သူဟာ နောင်တွင် ဘော်လွန်းဒီအော် ဆုရှင် ဖြစ်လာမယ်လို့ ကျွန်တော် ထင်ပါတယ်" လို့ ဂျိုး ကိုးလ်က မှတ်ချက်ပေးခဲ့ပါတယ်။