ဂျူဗင်တပ်စ်ဂိုးသမား ဆက်ဇနီကို ခေါ်ယူနိုင်ရေး ဆွေးနွေးမှုတွေ စတင်လိုက်တဲ့ အယ်လ်နာဆာ
အယ်လ်နာဆာနဲ့ ဂျူဗင်တပ်စ်တို့အကြား ဆွေးနွေးမှုတွေ စတင်လာပြီးနောက် ဆော်ဒီပရိုလိဂ်ဆီ ရောက်ရှိလာနိုင်တဲ့ နောက်ဆုံးဥရောပအခြေစိုက်ကြယ်ပွင့်ကတော့ ပိုလန်လက်ရွေးစင်ဂိုးသမားဆက်ဇနီ ဖြစ်ပါတယ်။
ယူရို-၂၀၂၄ ပြိုင်ပွဲအတွက် ပိုလန်လက်ရွေးစင်အသင်းနဲ့အတူ ပြင်ဆင်နေတဲ့ အသက်-၃၄ နှစ်အရွယ် ဂိုးသမားကို ဆော်ဒီပရိုလိဂ်ကလပ်က လာမယ့်ဘောလုံးရာသီမစတင်ခင် ခေါ်ယူနိုင်ဖို့ ပစ်မှတ်ထားနေပါတယ်။ အပြောင်းအရွှေ့ဂုရုကြီးရိုမာနိုရဲ့အဆိုအရ ဂိုးသမားကို အရှေ့အလယ်ပိုင်းဒေသဆီ ခေါ်ယူနိုင်ရေးအတွက် ကလပ်အသင်း နှစ်ခုအကြား ဖြစ်နိုင်ချေရှိမယ့် သဘောတူညီမှုတစ်ခုပေါ်ပေါက်လာရေး ဆွေးနွေးမှုတွေ စတင်ထားခဲ့ပြီးပြီလို့ သိရပါတယ်။
အီတလီအခြေစိုက်ကလပ်အသင်းဘက်ကတော့ မွန်ဇာဂိုးသမား ဒီဂရီဂေါ်ရီယိုကို ခေါ်ယူနိုင်ဖွယ် ရှိနေမှုနဲ့အတူ ပါရင်နဲ့လည်း စာချုပ်သက်တမ်းတိုးရေးကိစ္စ ဆွေးနွေးမှုတွေ စတင်ထားနိုင်ပါတယ်။ ဒါကြောင့် သူတို့တွေက ဆက်ဇနီ ပြောင်းရွှေ့နိုင်ရေး ခွင့်ပြုပေးထားပါတယ်။ အခုအချိန်မှာ ဒီအပြောင်းအရွှေ့အတွက် ပိုလန်ဂိုးသမား ကိုယ်တိုင်ကပဲ အဆုံးအဖြတ်ပေးသွားရဖို့ ရှိနေပါတယ်။
ရိုးမားနဲ့အတူ စီးရီးအေပြိုင်ပွဲမှာ အောင်မြင်တဲ့အငှားကစားသမားဘဝကို ကျော်ဖြတ်ပြီးနောက် ဆက်ဇနီက ၂၀၁၇ ခုနှစ်အတွင်း အာဆင်နယ်မှ ဂျူဗင်တပ်စ်ဆီ အပြီးသတ်ပြောင်းရွှေ့ခဲ့ပါတယ်။ အိုးလေဒီတို့နဲ့ ခုနစ်ရာသီကြာခရီးစဉ်မှာ သူက အသင်းအတွက် ၂၅၂ ပွဲအထိ ပါဝင်ကစားခဲ့ပြီး စကူဒက်တိုချန်ပီယံဆု သုံးကြိမ်နဲ့ ရှုံးထွက်ဖလားချန်ပီယံဆု ငါးကြိမ် ဆွတ်ခူးနိုင်ခဲ့ပါတယ်။
ပိုလန်ဂိုးသမားက ပြီးခဲ့တဲ့ဘောလုံးရာသီ၊ အတ္တလန္တာကို အနိုင်ရရှိတဲ့ ကိုပါအီတာလီယာဖလား ဖိုင်နယ်မှာ ပွဲထွက်ခွင့်မရရှိဘဲ အရန်ခုံတန်းမှာပဲ ရှိနေခဲ့ပါတယ်။ ဒါကြောင့် အခုအချိန်မှာတော့ သူ့ရဲ့အနာဂတ်အတွက် ဆုံးဖြတ်ပေးရဖို့ ရှိလာပါတယ်။ ဒါပေမယ့် ဆက်ဇနီက မီလန်အခြေစိုက်ကလပ်အသင်းနှစ်ခုရဲ့နောက်မှာ အဆင့်-၃ နေရာဖြင့် ရာသီသိမ်းခဲ့တဲ့ ဂျူဗင်တပ်စ်အတွက် စီးရီးအေပွဲစဉ် ၃၅ ပွဲအထိ ပါဝင်ကစားပေးခဲ့ပါတယ်။ သူက အယ်လ်နာဆာဆီ ပြောင်းရွှေ့ဖို့ ရွေးချယ်မယ်ဆိုရင် ဆော်ဒီကလပ်မှာ စီရော်နယ်ဒို၊ မာနေး၊ လာပေါ်တေးတို့နဲ့ ပြန်လည်ဆုံတွေ့ရပါလိမ့်မယ်။
အယ်လ်နာဆာက အယ်လ်ဟီလယ်ကို အရေးနိမ့်ကာ ဆော်ဒီပရိုလိဂ်ဒုတိယနေရာ၊ ဘုရင့်ဖလားဒုတိယနေရာတို့ဖြင့် ဖလားလက်မဲ့ရာသီတစ်ခုကို ပိုင်ဆိုင်ခဲ့ရပါတယ်။ ဒါပေမယ့် ဆက်ဇနီက ကလပ်အသင်းကစားသမားဘဝအကြောင်း မစဉ်းစားခင် ဂျာမနီနိုင်ငံမှာ ကျင်းပမယ့် ယူရိုပြိုင်ပွဲကိုသာ အပြည့်အဝအာရုံစိုက်နေပါလိမ့်မယ်။ သူ့ရဲ့အသင်းက အုပ်စု(D)မှာ ပြင်သစ်၊ သြစတြီးယား၊ နယ်သာလန်တို့နဲ့အတူ တစ်အုပ်စုတည်း ကျရောက်နေပါတယ်။
