ယမန်နေ့ညပိုင်း၊ ပရီးမီးယားလိဂ်ပွဲစဉ်အဖြစ် တော့တင်ဟမ်ကို ၂-၁ ဂိုးဖြင့် အရေးနိမ့်ခဲ့ပြီးနောက် ဒီပွဲစဉ်အတွက် VAR ဒိုင်လူကြီးတွေရဲ့ ဆုံးဖြတ်ချက်တွေကြောင့် လီဗာပူးအသင်းခေါင်းဆောင်ဗန်ဒိုက် စိတ်ရှုပ်ထွေးခဲ့ရပါတယ်။

အခုပွဲစဉ်အတွင်း VAR က အငြင်းပွားဖွယ် ကြားဝင်ဆောင်ရွက်ပေးမှုတွေရှိခဲ့ရာ အခုလိုလုပ်ဆောင်မှုတွေကြောင့် လီဗာပူးရဲ့အခွင့်အရေးတွေကို ပျက်စီးသွားစေခဲ့ပါတယ်။

ပထမအကြိမ်ကတော့ ဘစ်ဆူးမားအပေါ် ဖျက်ထုတ်ပုံကြမ်းတမ်းခဲ့တဲ့ ကာတစ်ဂျုံးစ်ကို ကွင်းလယ်ဒိုင်ဆိုင်မွန်ဟူးပါးက အစောပိုင်းမှာ အဝါကတ်ပြသခဲ့ပေမယ့် VAR အကြုံပြုချက်နဲ့အတူ တိုက်ရိုက်အနီကတ်ပြစ်ဒဏ်ဖြင့် ထုတ်ပယ်ခဲ့တာပဲ ဖြစ်ပါတယ်။

မကြာခင်မှာပဲ လူးဝစ်ဒီယက်ဇ်က အန်ဖီးလ်ကလပ်အတွက် ဦးဆောင်ဂိုးသွင်းယူပေးခဲ့ပေမယ့် စည်းကြပ်ဒိုင်က လူကျွံဘောလို့ သတ်မှတ်ကာ VAR ကလည်း စည်းကြပ်ဒိုင်ရဲ့ဆုံးဖြတ်ချက်ကို မှန်ကန်ကြောင်း အတည်ပြုပေးခဲ့ပါတယ်။ နောက်ပိုင်းမှာ ပရော်ဖက်ရှင်နယ်ဒိုင်လူကြီးများအစည်းအရုံး(PGMOL)က ဒီယက်ဇ်ရဲ့သွင်းဂိုးကို ခွင့်ပြုပေးသင့်တယ်လို့ ထုတ်ပြန်ပါတယ်။

ဒီအဖြစ်အပျက်တွေ ပြီးပြီးချင်းမှာပဲ တော့တင်ဟမ်က ဦးဆောင်ဂိုးရရှိခဲ့သလို လီဗာပူးကလည်း ပထမပိုင်းမပြီးဆုံးခင်မှာပဲ ချေပဂိုးသွင်းယူခဲ့ပါတယ်။ အခြေအနေတွေအားလုံး ဇောက်ထိုးမိုးမျှော် ဖြစ်စေမှုကတော့ ဒုတိယပိုင်းပွဲချိန်အတွင်း ဂျိုတာကို နှစ်ဝါတစ်နီပြစ်ဒဏ်ဖြင့် ထုတ်ပယ်ဖို့ ဆုံးဖြတ်ခဲ့တာဖြစ်ပြီး မာတစ်ရဲ့ နောက်ကျ O.G နဲ့အတူ လီဗာပူးတို့ တော့တင်ဟမ်ကို အဝေးကွင်းမှာ အရေးနိမ့်ခဲ့ရပါတယ်။

လီဗာပူးနည်းပြယာဂန်ကလော့ပ်ကတော့ မြင်တွေ့ဖူးသမျှ ပွဲစဉ်တွေအနက် တရားမျှတမှုအကင်းမဲ့ဆုံး၊ ရူးနှမ်းနှမ်းဆုံးဖြတ်ချက်တွေ အပေါ်ပေါက်ဆုံးပွဲစဉ်ဖြစ်တယ်လို့ ဒေါသတကြီးပြောဆိုခဲ့ပါတယ်။ အလားတူ ပွဲစဉ်အတွင်း အခိုက်အတန့်အချို့ကလည်း လီဗာပူးကပ္ပတိန်ဗန်ဒိုက်ကို စိတ်ရှုပ်ထွေးသွားစေခဲ့ပါတယ်။

Match of the Day အစီအစဉ်နဲ့တွေ့ဆုံချိန် ဗန်ဒိုက်က “VAR ဟာ သူတို့ဆုံးဖြတ်ခဲ့တဲ့အရာအားလုံးနဲ့ ပတ်သက်လို့ လုံးဝကို ရှင်းရှင်းလင်းလင်းဖြစ်နေသင့်ပါတယ်။ ဒီယက်ဇ်ရဲ့သွင်းဂိုးပုံရိပ်ကိုလည်း မြင်တွေ့ခဲ့ရပါတယ်။ ဒီသွင်းဂိုးမှာ လူကျွံအနေအထားဖြစ်တယ်ဆိုတာ သက်သေပြဖို့အတွက် တိုက်ရိုက်တင်ဆက်မှုမှာ လိုင်းတွေ မဆွဲပြခဲ့ဘူးလို့ ကျွန်တော်ထင်ပါတယ်။

ဒါက အတော်လေးတော့ ထူးဆန်းပါတယ်။ VAR အခန်းထဲမှာထိုင်ပြီး ဘယ်သူ ဆုံးဖြတ်နေသလဲဆိုတာ ကျွန်တော်လည်း မသိပါဘူး။ ဒါက ကောင်းတဲ့အရာမဟုတ်သလို ကြည့်လို့လည်း မသင့်တော်ပါဘူး။ ဒီလိုအရာတွေဖြစ်နေလို့ ကျွန်တော်တို့ ရှုံးနိမ့်ရတယ်”လို့ ပြောပါတယ်။

ဗန်ဒိုက်နဲ့ သူ့ရဲ့အသင်းဖော်တွေဟာ လာမယ့်ကြာသပတေးနေ့၊ ယူနီယံစိန့်ဂီလွိုက်နဲ့ရင်ဆိုင်ရမယ့် ယူရိုပါလိဂ်ပွဲစဉ်မှာ နိုင်ပွဲလမ်းကြောင်းဆီ ပြန်လည်တက်လှမ်းနိုင်ဖို့ ကြိုးစားရပါမယ်။