လီဗာပူးနောက်ခံလူ အီဘရာဟီမာကိုနာတေးက အသင်းရဲ့နောက်ခံလူ ဗန်ဒိုက်ခ်နဲ့ တွဲဖက်ကစားရာမှာ စိတ်ပျက်စရာကောင်းတဲ့အချက်တွေရှိနေကြောင်းနဲ့ ဗန်ဒိုက်ခ်ဟာ အသင်းရဲ့နောက်တန်းအောင်မြင်မှုတစ်ခုလုံးကို တစ်ယောက်တည်း သိမ်းကျုံးရယူနေတယ်လို့ ပြက်လုံးထုတ်ပြောကြားခဲ့ပါတယ်။ 

 ကိုနာတေးနဲ့ ဗန်ဒိုက်ခ်တို့ဟာ လက်ရှိပရီးမီးယားလိဂ်ရဲ့ အကောင်းဆုံးခံစစ်အတွဲတွေထဲမှ တစ်တွဲဖြစ်ပြီး ၂၀၂၄-၂၅ ဘောလုံးရာသီအတွင်းမှာ ပေးဂိုး ၂၇ ဂိုးသာ ခွင့်ပြုထားခဲ့ရတာဖြစ်ပါတယ်။ လီဗာပူးဟာ လက်ရှိပရီးမီးယားလိဂ် အမှတ်ပေးဇယားရဲ့ထိပ်ဆုံးနေရာကို ပြတ်ပြတ်သားသားဦးဆောင်ထားနိုင်သလို ဒုတိယပေးဂိုးအနည်းဆုံးအသင်းအဖြစ်လည်း ရပ်တည်ထားနိုင်ပါတယ်။ 

သို့သော်လည်း ယခုအခါမှာ ကိုနာတေးက ဗန်ဒိုက်ခ်နဲ့တွဲကစားရတဲ့အပေါ် စိတ်ပျက်မိကြောင်းနဲ့ ပရိသတ်တွေက ဗန်ဒိုက်ခ်ကိုသာ ချီးကျူးလေ့ရှိပြီး အသင်းရဲ့အခြားနောက်တန်းကစားသမားတွေကိုတော့ မေ့လျော့နေကြတယ်လို့ ဆိုလာခဲ့ပါတယ်။ တစ်ချိန်တည်းမှာပဲ ကိုနာတေးဟာ ဗန်ဒိုက်ခ်ကို ချီးကျူးပြောဆိုမှုတွေပြုလုပ်ခဲ့ပြီး နယ်သာလန်သားထံမှ အတွေ့အကြုံတွေ အများအပြားသင်ယူခဲ့ရကြောင်း ဝန်ခံခဲ့ပါတယ်။ 

ပြင်သစ်လက်ရွေးစင်နောက်ခံလူက "ဗန်ဒိုက်ခ်ဘယ်လောက်ကောင်းတယ်၊ ဘယ်လောက်ထူးခြားတယ်ဆိုတာ လူတိုင်းသိပါတယ်။ ထိပ်တန်းခြေစွမ်းကို နှစ်ပေါင်းများစွာထိန်းသိမ်းလာခဲ့တဲ့သူပါ။ ကျွန်တော်ကိုယ်တိုင်လည်း သူ့ဆီကနေ သင်ယူခဲ့ရတာတွေရှိပါတယ်။ ကျွန်တော်ဒီကိုရောက်လာကတည်းက သူ့ဆီကနေ အကြံဉာဏ်တွေရခဲ့ပါတယ်။ ဒါပေမယ့် ကျွန်တော်သူ့ကို တစ်နေ့မှာ သူ့ထက်ပိုကောင်းလာစေရမယ်လို့ ပြောထားပြီး နေ့တိုင်းမှာ အလုပ်ကြိုးစားနေပါတယ်"

"ဒီရာသီမှာ ကျွန်တော့်အနေနဲ့ ပွဲစဉ်အလိုက် အကောင်းဆုံးကစားသမားဆုတွေ့ရရှိဖို့ အခွင့်အရေးတွေရှိခဲ့ပါတယ်။ ဗန်ဒိုက်ခ်နဲ့တွဲကစားရတာကောင်းပါတယ်။ သူက အရမ်းတော်တဲ့ကစားသမားပါ။ ဒါပေမယ့် တစ်ခါတလေမှာ ပရိသတ်တွေက လီဗာပူးရဲ့နောက်တန်းမှာ ဗန်ဒိုက်ခ်တစ်ယောက်တည်းကစားနေတယ်လို့ ထင်နေကြပါတယ်။ မဟုတ်ပါဘူး။ ကျွန်တော်တို့လည်း လီဗာပူးရဲ့နောက်တန်းမှာ ပါဝင်နေပါတယ်။ ကျွန်တော်အရမ်းကောင်းခဲ့တဲ့ ပွဲစဉ်တွေလည်းရှိပါတယ်။ ဒါပေမယ့် လူတွေက ဗန်ဒိုက်ခ်ကိုပဲ မြင်ကြပါတယ်။ ကျွန်တော် မနာလိုဖြစ်လို့ပြောတာမဟုတ်ပါဘူး။ ကျွန်တော်တို့ပွဲတွေကိုလာကြည့်လိုက်ပါ။ ကျွန်တော်ပြောတာ မှန်တယ်ဆိုတာ သိပါလိမ့်မယ်" လို့ပြောကြားခဲ့ပါတယ်။ 

ကြာသပတေးနေ့နံနက်က ယှဉ်ပြိုင်ခဲ့တဲ့ ပရီးမီးယားလိဂ်ပွဲစဉ်မှာတော့ လီဗာပူးဟာ မာဆေးဆိုက်ဒါဘီပွဲစဉ်အဖြစ် အဲဗာတန်နဲ့ ထိပ်တိုက်တွေ့ဆုံခဲ့ပေမယ့် ဂိုးမပေးခဲ့ရဘဲ ၁-၀ နဲ့အနိုင်ရခဲ့ပါတယ်။ လာမယ့်တနင်္ဂနွေနေ့မှာတော့ လီဗာပူးဟာ ပရီးမီးယားလိဂ်ပွဲစဉ်အဖြစ် ဖူလ်ဟမ်နဲ့ ဆက်လက်ကစားသွားရမှာဖြစ်ပါတယ်။