ချာကီဟာ ယခုရာသီတွင် လိုင်ယွန်ရဲ့ အဓိက ကစားသမား ဖြစ်ခဲ့ပြီး လီဂူးဝမ်း တွင် ၈ ဂိုးသွင်းကာ ၁၁ ဂိုး ဖန်တီးပေးခဲ့ပြီး ယူရိုပါလိဂ်တွင်လည်း နောက်ထပ်၄ ဂိုးသွင်းကာ ၈ ဂိုး ဖန်တီးပေးခဲ့ပါတယ်။ သို့သော် လိုင်ယွန်ရဲ့ ငွေကြေးအခက်အခဲများကြောင့် ပြင်သစ်ကလပ်ဟာ ယခုနွေရာသီတွင် အသက် ၂၁ နှစ်အရွယ် ကစားသမားအတွက် ကမ်းလှမ်းမှုများကို နားထောင်ရန် အတင်းအကျပ် ခိုင်းစေခံရပါတယ်။

မန်စီးတီးဟာ ချာကီကို ခေါ်ယူရန် ဆွေးနွေးမှုများ ပြုလုပ်ထားပြီး ပက် ဂွါဒီယိုလာ ဟာ ကီဗင်ဒီဘရိုင်း ထွက်ခွာပြီးနောက် ကွင်းလယ်တွင် ပိုမိုဖန်တီးမှုများ လုပ်ဆောင်ရန် စိတ်အားထက်သန်နေပါတယ်။ လီဗာပူးနှင့် ယူနိုက်တက်တို့ဟာလည်း ကြာသပတေးနေ့တွင် စပိန် နှင့် ယှဉ်ပြိုင်ကစားမည့် နေးရှင်းလိဂ် ဆီမီးဖိုင်နယ်မတိုင်မီ ပြင်သစ်လက်ရွေးစင်အသင်းအတွက် ပထမဆုံးခေါ်ယူခံရတဲ့ ချာကီ ကို ခေါ်ယူရန် ချိတ်ဆက်ထားကြပါတယ်။

The Athletic ရဲ့ဖော်ပြချက်အရ စလော့ ဟာ ချာကီ နှင့် တွေ့ဆုံရန် ပြင်သစ်တောင်ပိုင်းသို့ သွားရောက်ရန် ပြီးခဲ့တဲ့ရက်သတ္တပတ်က သူ့ရဲ့အားလပ်ရက်မှ ထွက်ခွာခဲ့ပါတယ်။ စလော့ရဲ့ ချာကီ နှင့် ဆွေးနွေးမှုများက လီဗာပူးက ဘိုင်ယန် လေဗာကူဆင် ကွင်းလယ်လူ ဖလိုရီယန် ဝါ့ဇ် ကို ခေါ်ယူရန် ကြိုးစားမှုများကို မတိုးမြှင့်မီက ရှိခဲ့ကြောင်း အဆိုပါသတင်းက ဖော်ပြထားပါတယ်။

သို့သော် မန်စီးတီးက ချာကီ ကို ခေါ်ယူရန် သဘောတူညီမှု ရယူနိုင်မယ်လို့ မျှော်လင့်နေပါတယ်လို့ ဆိုပါတယ်။ လိုင်ယွန်က အသက် ၂၁ နှစ်အရွယ် ကစားသမားအတွက် အနည်းဆုံး ယူရို သန်း ၄၀ တောင်းဆိုနေကြောင်း သိရပါတယ်။ ယခုရက်သတ္တပတ် L'Equipe နှင့် အင်တာဗျူးတစ်ခုတွင် ချာကီ ကို မန်စီးတီး သို့မဟုတ် လီဗာပူးသို့ ပြောင်းရွှေ့ပါက မည်သို့ လိုက်လျောညီထွေဖြစ်အောင် လုပ်မလဲလို့ မေးမြန်းခဲ့ပါတယ်။

"ကျွန်တော် ဘယ်စနစ်အတွက်မဆို အဆင်သင့်ပါပဲ။ ကျွန်တော် နေ့တိုင်း၊ ရုပ်ပိုင်းဆိုင်ရာရော စိတ်ပိုင်းဆိုင်ရာပါ၊ အဆင်သင့်ဖြစ်အောင် ကြိုးစားပါတယ်" "အဓိကအားဖြင့် ကျွန်တော့်အတွက် အကောင်းဆုံး ရွေးချယ်မှုကို ရွေးချယ်ဖို့ ကြိုးစားနေပါတယ်။ လူတစ်ဦးအနေနဲ့ရော ဘောလုံးသမားတစ်ဦးအနေနဲ့ပါ တိုးတက်ဖို့ပါပဲ" လို့ ချာကီ က ပြောကြားခဲ့ပါတယ်။

ချာကီ ကို ယခုနွေရာသီတွင် လိုင်ယွန်မှ ထွက်ခွာခြင်းက မှန်ကန်တဲ့ ဆုံးဖြတ်ချက်ချခြင်းဖြစ်သလားလို့ ယုံကြည်လားလို့လည်း မေးမြန်းခဲ့ပါတယ်။ "ဘယ်တော့မှ ဘာတစ်ခုမှ မသေချာပါဘူး။ ဒါပေမယ့် ကျွန်တော် ပြောပါ့မယ်။ ကျွန်တော် လိုင်ယွန် မှာ လုပ်ချင်တာကို လုပ်ခဲ့တယ်၊ တကယ့် လိုင်ယွန်ဒေသခံတစ်ဦးကဲ့လို့ ကျွန်တော့်ကလပ်အတွက် အားလုံးပေးဆပ်ခဲ့တယ်" 

"အခက်အခဲရှိနေတဲ့ သင်္ဘောကို ကျွန်တော် မထားခဲ့ပါဘူး။ ကျွန်တော် နေခဲ့တယ်၊ သွားတွေကျစ်ကျစ်ပါအောင် ကြိတ်ခဲ့တယ်။ ကျွန်တော် ငိုခဲ့တယ်၊ ရယ်ခဲ့တယ်၊ ကြောက်ခဲ့တယ်။ ဒါပေမယ့် လူတစ်ယောက်က အဲဒီလို ဖြစ်ရမယ်၊ အဲဒါက သူ့ DNA ရဲ့ အစိတ်အပိုင်းတစ်ခုပါပဲ။ ခက်ခဲနေချိန်မှာတောင်၊ ငိုနေချိန်မှာတောင်၊ ကြောက်နေချိန်မှာတောင်၊ သင့်ကလပ်အတွက် တိုက်ပွဲဝင်ရမှာပါ" လို့ သူက ပြောပါတယ်။