ယူနိုက်တက်နဲ့ပွဲစဉ်မှာ တောက်ပတဲ့ ခြေစွမ်းတွေပြသနိုင်ခဲ့တဲ့ ဖိုဒန်ကို ချီးကျူးစကားဆိုလာတဲ့ ရွိုင်ကိန်း
ယမန်နေ့က မန်ချက်စတာဒါဘီပွဲစဉ် ယူနိုက်တက်ကို ၃-၁ နဲ့အနိုင်ရရှိခဲ့ရာမှာ မန်စီးတီးအတွက် အရေးပါတဲ့ ဂိုး ၂ ဂိုးကိုသွင်းယူပြီး တောက်ပတဲ့ခြေစွမ်းတွေ ပြသနိုင်ခဲ့တဲ့ ဖီးလ်ဖိုဒန်ကို ယူနိုက်တက် ဂန္ထဝင်ကစားသမားဟောင်း ရွိုင်ကိန်းက ချီးကျူးပြာဆိုမှုတွေ ပြုလုပ်လာခဲ့ပါတယ်။
ယခုပွဲစဉ်မှာ ယူနိုက်တက်က ဦးဆောင်စတင်ရရှိခဲ့တာဖြစ်ပြီး ပထမအစ ၈ မိနစ်မှာပဲ ရက်ရှ်ဖို့ဒ်က ဂိုးဧရိယာအပြင်မှ ဒုံးပျံကန်ချက်နဲ့ သွင်းယူပေးခဲ့တာဖြစ်ပါတယ်။ သို့သော်လည်း ဒုတိယပိုင်းမှာတော့ မန်စီးတီးက ဖိုဒန်၊ ဟာလန်းတို့ရဲ့သွင်းဂိုးတွေနဲ့ အနိုင် ၃ မှတ်ကို ဖော်ဆောင်နိုင်ခဲ့ပါတယ်။
ပွဲအပြီးမှာ ရွိုင်ကိန်းက ဖိုဒန်ဟာ ခြေစွမ်းကောင်းကို ဆက်တိုက် ထိန်းသိမ်းထားနိုင်တာကြောင့် ဂါရတ်ဆောက်ဂိတ်ရဲ့ အင်္ဂလန်အသင်းမှာလည်း အရေးပါတဲ့ကစားသမားဖြစ်လာနိုင်တယ်လို့ ချီးကျူးပြောဆိုခဲ့ပါတယ်။
ကစားသမားဟောင်းက “ဒီနေ့ပွဲမှာ ကျွန်တော် ယူနိုက်တက်အပေါ် မျှော်လင့်ချက်အများကြီးမထားပါဘူး။ ဘာဖြစ်လို့လဲဆိုတော့ မန်စီးတီးက အတော်ကောင်းနေလို့ပါ။ သူတို့က ဘာကြောင့် ချန်ပီယံဖြစ်နေတာလဲဆိုတာကို ပြသနိုင်ခဲ့တယ်လို့ထင်ပါတယ်။ အထူးသဖြင့် ဖိုဒန်က အတော်လေးကောင်းပါတယ်။ မယုံနိုင်စရာကစားသမားပါ။ စီးတီးက ယူနိုက်တက်ကို အရုပ်တစ်ရုပ်လို ကစားခဲ့ပါတယ်။ မန်စီးတီးနဲ့ကစားရင် ပုန်းရှောင်နေလို့မရပါဘူး” “ဂါရတ်ဆောက်ဂိတ်ရဲ့ အင်္ဂလန်အသင်းမှာ ဒီလို ပြိုင်ဆိုင်မှုပြင်းထန်တဲ့ကစားသမားတွေ ရှိနေတာ အားရစရာပါ။ ဒါပေမယ့် ဖိုဒန်ကိုတော့ ပွဲထွက်ကစားသမား ၁၁ ဦးစာရင်းမှာ ထည့်ထားရပါမယ်။ ဒီနေ့ပွဲမှာ သူလုပ်ပြသွားတာတွေကိုကြည့်ပါ။ ကျွန်တော့်အတွက်တော့ ဒီကောင်လေးက အသင်းအတွက် အဓိက ကစားသမားပါပဲ။ သူ အင်္ဂလန်အသင်းမှာ ပါရပါမယ်” လို့ ပြောကြားခဲ့ပါတယ်။
ဒါ့အပြင် ပက်ဂွါဒီယိုလာကလည်း “ဒါက သူဘယ်လောက်အထိ ပွဲတွေ ကစားထားရတယ်ဆိုတာ ပြသလိုက်တာပါပဲ။ သူက ပါရမီရှိပြီးသား ကစားသမားပါ။ ဒါပေမယ့်အခုချိန်မှာတော့ ပိုရင့်ကျက်လာပြီး ပွဲရဲ့အခြေအနေကို ပိုနားလည်လာပါပြီ။ သူက ကွင်းလယ်နဲ့ တောင်ပံနေရာတွေမှာ ကစားနိုင်ပြီး ဘယ်ခြေနဲ့ ဂိုးသွင်းတတ်တဲ့ ကစားသမားပါ။ သူ့ရဲ့လက်ရှိ စွမ်းဆောင်ချက်တွေအရ ဒီရာသီမှာ သူကပရီးမီးယားလိဂ်ရဲ့အကောင်းဆုံး ကစားသမားပါပဲ” လို့ ပြောကြားခဲ့ပါတယ်။
