The network connection is lost.

Banner Image

ယာမယ်လ်ကိုရပ်တန့်သွားစေမယ့် ဒတ်ချ်တွေရဲ့အစီအစဉ်အကြောင်း ထုတ်ပြောလာတဲ့ ရော်နယ်ကိုးမန်း

စပိန်နဲ့ရင်ဆိုင်နေရတဲ့ နေးရှင်းလိဂ်တိုက်ပွဲမှာ ယာမယ်လ်ကို ရပ်တန့်သွားစေဖို့ နယ်သာလန်အသင်း ဘယ်လိုစီစဉ်ထားသလဲဆိုတာကို ရော်နယ်ကိုးမန်းက အလေးပေးပြောကြားခဲ့ပါတယ်။

ဇွန်လ၊ နောက်ဆုံးအဆင့်ပြိုင်ပွဲဆီ တက်ရောက်နိုင်မယ့် အခွင့်အလမ်းနဲ့အတူ ဗလန်စီယာမှာ ဒီနှစ်သင်း ထိပ်တိုက်ရင်ဆိုင်သွားရပါမယ်။ စပိန်အသင်းကတော့ ၂၀၂၃ ခုနှစ်မှာ နေးရှင်းလိဂ်ချန်ပီယံဆုဆွတ်ခူးနိုင်ခဲ့လို့ လက်ရှိချန်ပီယံအဖြစ် မှတ်တမ်းဝင်နေပါတယ်။ ရော့တာဒမ်မှာကစားခဲ့တဲ့ပွဲစဉ်အတွင်း ဒီလာဖွန်တေရဲ့အသင်းက လူစားဝင်ကစားသမားမီရီနိုရဲ့ နောက်ကျချေပဂိုးကြောင့် တစ်ဖက်နှစ်ဂိုးစီသရေရလဒ်နဲ့အတူ အသက်ရှုချောင်ခဲ့ပြီး မက်စ်တဲလားပွဲစဉ်မတိုင်ခင် စိတ်လှုပ်ရှားစရာအခိုက်အတန့်တွေ ပြည့်နှက်လာခဲ့ပါတယ်။

ယာမယ်လ်က နယ်သာလန်မြေပထမအကျော့ပွဲစဉ်မှာ နီကိုဝီလျံစ်ရဲ့အဖွင့်ဂိုးအတွက် အကောင်းဆုံးပါဝင်ကူညီပေးနိုင်ခဲ့ပေမယ့် ထင်သလောက်တော့ ခြေစွမ်းမပြသနိုင်ခဲ့ပါဘူး။ ဒါပေမယ့် သူရဲ့ပွဲထွက်ခွင့်နေရာဆုံးရှုံးသွားရဖို့အထိ မရှိလာသေးပါဘူး။ ဒီလာဖွန်တေကိုယ်တိုင်ကလည်း တိုက်စစ်ပိုင်းမှာ နီကိုဝီလျံစ်၊ ယာမယ်လ်တို့နဲ့အတူ မိုရာတာနေရာမှာ ဖာရန်တောရက်စ်ကို ပွဲထွက်ခွင့်ပေးမယ်လို့ အရိပ်အမြွက်ပြောကြားခဲ့ပါတယ်။

ပွဲကြိုသတင်းစာရှင်းလင်းပွဲအတွင်း ရော်နယ်ကိုးမန်းက ကမ္ဘာ့အကောင်းဆုံးဗဟိုကွင်းလယ်လူတစ်ဦးအဖြစ် တိုးတက်လာမှုအတွက် ပက်ဒရီကို ချီးကျူးဂုဏ်ပြုခဲ့ပြီး ဗလန်စီယာနဲ့ ဘာစီလိုနာမှာ ဖြတ်သန်းခဲ့ချိန်တွေအကြောင်း ဖွင့်ဟပြောဆိုခဲ့ပါတယ်။ ဒါပေမယ့် ပြီးခဲ့တဲ့သီတင်းပတ်၊ ဟာတိုရဲ့အနီကတ်ပြစ်ဒဏ်နဲ့အတူ ဒုတိယအကျော့ပွဲစဉ်မှာလည်း ယာမယ်လ်ကိုထိန်းချုပ်နိုင်ဖို့ ဘယ်လိုစီမံထားသလဲဆိုတဲ့မေးခွန်းတွေ ဒတ်ချ်လူမျိုးနည်းပြအတွက် သဘာဝကျကျထွက်ပေါ်လာခဲ့ပါတယ်။

ရော်နယ်ကိုးမန်းက “ ကျွန်တော်က ကစားသမားတစ်ဦးချင်းစီကိုရွေးချယ်ပြီး ထုတ်မပြောချင်ပါဘူး။ ပထမအကျော့ပွဲစဉ်မှာ ကျွန်တော်တို့တွေ ယာမယ်လ်ကို အကောင်းဆုံးထိန်းချုပ်ထားနိုင်ခဲ့တယ်လို့ ထင်ပါတယ်။ ဒါပေမယ့် အဲ့ဒီလိုအခြေအနေတွေက ဒီကစားသမားရဲ့အရည်အသွေးကို ဖုံးကွယ်သွားစေဖို့ မဖြစ်နိုင်ပါဘူး။ နောက်ခံအစွန်နေရာမှာ ဘယ်သူကစားမလဲဆိုတာ မေးခွန်းတစ်ခုမဟုတ်ပါဘူး။ အခြားကစားသမားတွေကိုယ်တိုင်လည်း ကိုယ့်ရဲ့အသင်းဖော်အတွက် အကူအညီပေးသွားရပါမယ်။

ဒီလိုကစားသမားတစ်ဦးကို ရပ်တန့်ပစ်လိုက်ဖို့ဆိုတာ မလွယ်ကူပါဘူး။ သူ့ရဲ့ဘောလုံးစွမ်းရည်တွေကြောင့် အခိုက်အတန့်တစ်ခုမှာတော့ သူ့အတွက် အခွင့်အရေးတစ်ခု ရရှိသွားနိုင်ပါတယ်”လို့ ပြောပါတယ်။ ပုံမှန်ဆိုရင်တော့ ဟာတိုရဲ့နေရာမှာ အာဆင်နယ်ကစားသမား
တင်းဘာကို ရွေးချယ်နိုင်ပေမယ့် ဂန်းနားခံစစ်မှူးက အဖျားဝေဒနာကြောင့် ရော်နယ်ကိုးမန်းရဲ့လူစာရင်းမှနုတ်ထွက်ပြီး မြောက်လန်ဒန်အရပ်ဆီ ပြန်သွားခဲ့ပါတယ်။ ဒါကြောင့် အက်စတွန်ဗီလာနောက်ခံလူမတ်ဆန်ကို အစားထိုးခေါ်ယူထားပြီး ကိုးမန်းအတွက် ရွေးချယ်စရာနည်းပါးနေလို့ လက်ရွေးစင်အဆင့်ပွဲဦးထွက်ကစားခွင့်ကို မတ်ဆန် ရရှိသွားနိုင်ပါတယ်။