ရီးရဲလ်မက်ဒရစ်အသင်းဟာ ၂၀၂၄-၂၅ ရာသီကို ဖီဖာ ကလပ်ကမ္ဘာ့ဖလား ဆီမီးဖိုင်နယ်မှာ ပီအက်စ်ဂျီအသင်းကို ရှုံးနိမ့်ပြီး အဆုံးသတ်ခဲ့ပါတယ်။ ဇူလိုင်လအထိ ကစားခဲ့ရတဲ့ပွဲတွေက သူတို့ရဲ့ ရာသီကြို အစီအစဉ်တွေကို သက်ရောက်မှုရှိခဲ့ပြီး လာလီဂါကတော့ ဒီအခြေအနေကို နည်းနည်းလေးမှ စာနာမှု မပြခဲ့ပါဘူး။ အလွန်ဆိုရဲ့ အသင်းဟာ အခုဆိုရင် ဆေးစစ်မှုတွေ ပြန်လုပ်နေပါပြီ။ သူတို့ရဲ့ ၂၀၂၅-၂၆ ရာသီ ပထမဆုံးပွဲစဉ်ကို သြဂုတ်လ ၁၉ ရက်နေ့မှာ အိမ်ကွင်းတွင် အိုဆာဆူနာ နဲ့ ကစားရမှာ ဖြစ်ပါတယ်။

အဲဒီ စတင်မယ့်နေ့ရက်က အငြင်းပွားဖွယ်ရာ ဖြစ်ခဲ့ပြီး ရီးရဲလ်မက်ဒရစ်က ပွဲစဉ်များပြားတဲ့ နွေရာသီအပြီး ကစားသမားတွေကို ပြင်ဆင်ချိန် ပိုပေးဖို့ နှစ်ကြိမ်တိုင်တိုင် နောက်ဆုတ်ဖို့ တောင်းဆိုခဲ့ပါတယ်။ ဒါပေမဲ့ ဒီတောင်းဆိုမှု ကို ပြတ်ပြတ်သားသား ပယ်ချခဲ့ပြီး လာလီဂါဥက္ကဌ ဟာဗီယာ တေဘတ်စ် က ပယ်ချရတဲ့ အကြောင်းရင်းကို ရှင်းပြခဲ့ပါတယ်။

ရီးရဲလ်မက်ဒရစ်ကတော့ ဒီနောက်ပိုင်းမှာ လွတ်လပ်တဲ့ ဆုံးဖြတ်ချက်ချမှတ်ပေးဖို့ တောင်းဆိုခဲ့ပေမဲ့ လာလီဂါက ဆုံးဖြတ်ချက်ကို ပြင်ဆင်ခြင်းမရှိခဲ့တာကြောင့် ပွဲကတော့ စီစဉ်ထားတဲ့အတိုင်း ဆက်လက်ကျင်းပသွားမှာ ဖြစ်ပါတယ်။ အားလပ်ရက်ကနေ ကစားသမားတွေ ပြန်ရောက်လာတာနဲ့ ရာသီကြို လေ့ကျင့်ရေးကြား အချိန်နည်းပါးတာကြောင့် ပွဲစဉ်ဇယား အကြီးအကျယ် ပြောင်းလဲမှုတွေ ရှိခဲ့ပါတယ်။ ဒါပေမဲ့ ကလပ်ကတော့ အခု သွေးပူလေ့ကျင့်ရေးပွဲစဉ် တစ်ပွဲကို ထပ်ထည့်လိုက်ပါပြီ။

ရာသီကြိုပွဲစဉ်တွေ ဘာမှ မကစားဘဲ ရဲရဲဝံ့ဝံ့ ဆုံးဖြတ်ချက်ချခဲ့တာက အံ့အားသင့်စရာ ဖြစ်ခဲ့ပေမဲ့ အလွန်ဆိုရဲ့ အသင်းကတော့ သြဂုတ်လ ၁၂ ရက်နေ့ သြစတြီးယားနိုင်ငံ အင်းဘရွတ်မြို့ရှိ တီဗိုလီ အားကစားကွင်းတွင် ဒေသစံတော်ချိန် ည ၇ နာရီမှာ သြစတြီးယားကလပ် WSG တီရိုးလ် နဲ့ ကစားမှာ ဖြစ်ပါတယ်။

အလွန်ဆိုဟာ ပြင်ဆင်မှုတွေကို အရှိန်မြှင့်ဖို့အတွက် အင်အားကောင်းတဲ့ အသင်းကို သြစတြီးယားကို ခေါ်သွားမှာဖြစ်ပေမဲ့ ဂျုဒ် ဘယ်လင်ဂမ် ကတော့ အတူလိုက်ပါနိုင်မှာ မဟုတ်ပါဘူး။ အင်္ဂလန်လက်ရွေးစင်ကစားသမားဟာ ကလပ်ကမ္ဘာ့ဖလားအပြီးမှာ ဒဏ်ရာရှိတဲ့ ပခုံးအတွက် နောက်ကျပြီးမှ ခွဲစိတ်မှု ပြုလုပ်ခဲ့တာကြောင့် နိုဝင်ဘာလအထိ ပြန်လာနိုင်မှာ မဟုတ်ပါဘူး။ ဖာလန် မန်ဒီ နဲ့ ဒေးဗစ် အလာဘာ တို့ကိုတော့ ဒဏ်ရာကနေ ပြန်လည်သက်သာလာတဲ့အတွက် လာမယ့်ရက်အနည်းငယ်အတွင်း ကစားနိုင်ဖို့ အကဲဖြတ်သွားမှာ ဖြစ်ပါတယ်။