မန်ချက်စတာယူနိုက်တက်မှ ထွက်ခွာပြီး အက်စတွန်ဗီလာသို့ အငှားစာချုပ်နဲ့သွားရောက်ကစားနေတဲ့ တောင်ပံကစားသမား မားကပ်စ်ရက်ရှ်ဖို့ဒ်က သူဟာ ဗီလာပါ့ခ်သို့ရောက်ရှိပြီးနောက်ပိုင်းမှာ ကြံ့ခိုင်မှုသာမက ခြေစွမ်းပိုင်းမှာပါ ပိုမိုတိုးတက်ကောင်းမွန်လာတယ်လို့ခံစားရကြောင်း ပြောကြားလာခဲ့ပါတယ်။ 

ပရက်စ်တန်ကို ၀-၃ နဲ့အနိုင်ရခဲ့တဲ့ အက်ဖ်အေဖလား ကွာတားဖိုင်နယ်ပွဲစဉ်မှာ ရက်ရှ်ဖို့ဒ်ဟာ ဗီလာအတွက် ၂ ဂိုးအထိသွင်းယူပြီး အသင်းကို ဆီမီးဖိုင်နယ်အဆင့်သို့ ပို့ဆောင်ပေးနိုင်ခဲ့တာဖြစ်ပါတယ်။ ယူနိုက်တက်အတွက် ပြိုင်ပွဲစုံ ၄၂၆ ပွဲကစားပြီး ၁၃၈ ဂိုးအထိသွင်းယူနိုင်ခဲ့တဲ့ ရက်ရှ်ဖို့ဒ်ဟာ လက်ရှိနည်းပြသစ် ရူဘင်အာမိုရင်နဲ့ သဘောထားကွဲလွဲမှုတွေဖြစ်ပေါ်ခဲ့တာကြောင့် အိုးလ်ထရက်ဖို့ဒ်ကနေ ထွက်ခွာဖို့ဆုံးဖြတ်ခဲ့ပြီး ဇန်နဝါရီအပြောင်းအရွှေ့ကာလမှာ ဗီလာသို့ရောက်ရှိလာခဲ့ပါတယ်။ 

အာမိုရင်ဟာ ရက်ရှ်ဖို့ဒ်ရဲ့ လေ့ကျင့်ရေးကွင်းမှ ခြေစွမ်းကို ကြိုက်နှစ်သက်ခြင်းမရှိတာကြောင့် အသင်းအတွက်ပေးဆပ်လိုခြင်းမရှိတဲ့ ကစားသမားကို အသုံးပြုမယ့်အစား အသင်းရဲ့ ဂိုးနည်းပြကိုသာ ကွင်းထဲထည့်ပြီး ကစားခိုင်းမယ်လို့ ရက်ရက်စက်စက်ပြောကြားထားခဲ့တာဖြစ်ပါတယ်။ 

ယခုအခါမှာတော့ အက်စတွန်ဗီလာမှာ ခြေစွမ်းပြနေတဲ့ အသက်-၂၇ နှစ်အရွယ်ကစားသမားက "အသင်းအတွက်ဂိုးသွင်းရတာ အရမ်းကောင်းပါတယ်။ ဂိုးရတဲ့အချိန်တိုင်းက တိုက်စစ်ကစားသမားတစ်ယောက်အတွက် ကောင်းတဲ့အရာတွေပါပဲ။ ဒီလိုခြေစွမ်းကို ဆက်လက်ထိန်းသိမ်းသွားနိုင်ဖို့ မျှော်လင့်ပါတယ်" လို့ပြောကြားခဲ့ပါတယ်။ 

ဒီရာသီမှာ ယူနိုက်တက်အတွက် ပရီးမီးယားလိဂ် ၁၅ ပွဲကစားပြီး ၄ ဂိုးသာသွင်းယူနိုင်ခဲ့တဲ့ ရက်ရှ်ဖို့ဒ်ဟာ ပြီးခဲ့တဲ့ ဒီဇင်ဘာလကတည်းက အိုးလ်ထရက်ဖို့ဒ်အသင်းအတွက် ပါဝင်ကစားပေးနိုင်ခဲ့ခြင်းမရှိပါဘူး။ ဆက်လက်ပြီး အင်္ဂလန်လက်ရွေးစင်က "ကျွန်တော်ဒီကိုစရောက်ကတည်းက ကြံ့ခိုင်မှုပိုရှိလာပြီး ခြေစွမ်းပိုင်းမှာလည်း ပိုကောင်းလာတယ်လို့ခံစားရပါတယ်။ကျွန်တော်အခုချိန်မှာတော့ ကျွန်တော့်ရဲ့ပုံစံအမှန်အတိုင်း ဘောလုံးကစားခွင့်ရနေပါပြီ" လို့ပြောကြားခဲ့ပါတယ်။ လာမယ့်ဗုဒ္ဓဟူးနေ့မှာတော့ ပရီးမီးယားလိဂ်အမှတ်ပေးဇယားရဲ့ အဆင့် ၉ နေရာမှာရပ်တည်နေတဲ့ ဗီလာဟာ ဘရိုက်တန်နဲ့ယှဉ်ပြိုင်သွားရမှာဖြစ်ပါတယ်။