လီဗာပူးစတား ဆာလက်ကတော့ အာဆင်နယ်ဟာ အခုနှစ်ရဲ့ပရီးမီးယားလိဂ်ချန်ပီယံဆုကို ဗိုလ်စွဲဖို့ ရေပန်းအစားဆုံးလို့ အန်ဖီးလ်မှာ မတွေ့ဆုံခင် ပြောကြားလိုက်ပါတယ်။ ၂၀၂၅ - ၂၆ ရာသီက အခုမှစတင်တာဖြစ်ပေမယ့် ဆာလက်က ပြိုင်ဘက်အာဆင်နယ်ဟာ အခုနှစ်ချန်ပီယံဆုအတွက် ရေပန်းအစားဆုံးလို့ အခိုင်အမာပြောကြားလာခဲ့တာဖြစ်ပါတယ်။ ဆာလက်ရဲ့စကားလုံးတွေက mind games ကစားနေတာဖြစ်နိုင်ပြီး အခုလာမယ့်တနင်္ဂနွေနေ့မှာ အာတီတာ နဲ့ အာဆင်နယ်ကို အန်ဖီးလ်မှာ ဧည့်ခံရမှာဖြစ်ပါတယ်။

ဒါပေမယ့်လည်း အသက် ၃၃ နှစ်သားက ဒီရာသီမှာ အာဆင်နယ်ချန်ပီယံဖြစ်နိုင်တယ်လို့ ယုံကြည်နေပါတယ်။ ၃ နှစ်ဆက်ပရီးမီးယားလိဂ်အမှတ်ပေးဇယားရဲ့ဒုတိယနေရာမှာ ရပ်တည်နိုင်ခဲ့ပြီး အာတီတာဟာ အာဆင်နယ်ကို ၂၀၁၉ ဒီဇင်ဘာကတည်းက အကောင်းဆုံးတည်ဆောက်လာခဲ့တာဖြစ်ပါတယ်။ ဆာလက်က အာဆင်နယ်အနေနဲ့ အချိန်တစ်ချို့ယူခဲ့ရသလို နည်းပြကလည်း လုံလောက်တဲ့အတွေ့အကြုံရှိနေပြီဖြစ်တာကြောင့် အခုလိုမျိုးရေပန်းစားလာခဲ့တာလို့ ဆိုပါတယ်။

အာဆင်နယ်ဟာ အခုနွေရာသီမှာ ဇူဘီမန်ဒီ ၊ မော့ကွယ်ရာ ၊ ယိုကရက်စ် ၊ အီဇီးစတဲ့ကစားသမားတွေအတွက် ပေါင်သန်း ၂၇၀ နီးပါးအထိ အသုံးပြုထားခဲ့ပါတယ်။ စကိုင်းစပေါ့တ်နဲ့အင်တာဗျူးမှာ ဆာလက်က အာဆင်နယ်နဲ့မရင်ဆိုင်ခင် “တနင်္ဂနွေနေ့မှာ ချန်ပီယံဆုအတွက် ရေပန်းအစားဆုံးအသင်းနဲ့ ကစားရပါမယ်။ မှန်ပါတယ် (ရယ်လျှက်)။ ဟုတ်ပါတယ်။ အာဆင်နယ်က ချန်ပီယံဆုအတွက် ရေပန်းအစားဆုံးပါ။ ဘာလို့လဲဆိုတော့ သူတို့က အသင်းတစ်သင်းအနေနဲ့ ၅ နှစ် ၊ ၆ နှစ်လောက် အတူတူကစားလာခဲ့တာပါ။ ဒါကြောင့် တစ်ဦးနဲ့တစ်ဦးက နားလည်မှုအပြည့်ရှိနေပါတယ်။ သူတို့နည်းပြကလည်း ထို့နည်းတူပါပဲ။

အသင်းတစ်သင်းမှာ အခုလိုကြာရှည်လက်တွဲလာရင် တစ်ဦးက ဘာလုပ်မယ်ဆိုတာကို တစ်ဦးသိပါတယ်။ အဲ့တာက သူတို့အတွက် ပိုလွယ်ကူစေပါတယ်။ ဒါပေမယ့် ကျွန်တော်တို့အပြင် မန်စီးတီးကလည်း ကစားသမားအများကြီးအပြောင်းအလဲလုပ်ထားခဲ့တာပါ။ ဒါပေမယ့် ဂွါဒီယိုလာရဲ့စီးတီးကလည်း ချန်ပီယံဆုအတွက် ရေပန်းအမြဲတမ်းစားပါတယ်။ ဒါပေမယ့် ကျွန်တော့်အမြင်အရတော့ ဒီနှစ်က အာဆင်နယ်က နံပတ် ၁ လို့ထင်ပါတယ်”လို့ ဆာလက်က ဖြေကြားခဲ့ပါတယ်။ လီဗာပူးအသင်းနဲ့အတူ ဒုတိယမြောက်ပရီးမီးယားလိဂ်ဖလားရယူနိုင်ခဲ့ပြီးနောက် ဆာလက်ဟာ စလော့ရဲ့တိုက်စစ်မှာ အက်ကီတီကီ ၊ ဝီရက်ဇ်တို့နဲ့အတူ ဆက်လက်ပါဝင်လာဦးမှာဖြစ်ပါတယ်။