သတင်းတွေအရ ယူနိုက်တက် နဲ့ အာဆင်နယ်တို့ဟာ စပို့တင်းတိုက်စစ်မှူး ဗစ်တာဂရိုကီရက်စ်ကို စိတ်ဝင်စားနေတယ်လို့ သိရပါတယ်။ လာမယ့်နွေမှာ ၂ သင်းစလုံးဟာ တိုက်စစ်ပိုင်းအားဖြည့်ဖို့ လုပ်ဆောင်နေတာဖြစ်ပါတယ်။ ဒီရာသီမှာ ဗစ်တာတစ်ယောက် ၄၁ ပွဲမှာ ၄၀ ဂိုးအထိသွင်းယူထားနိုင်ခဲ့ပြီး ဥရောပရဲ့အလားအလာအကောင်းဆုံးတိုက်စစ်မှူးအဖြစ် စွမ်းဆောင်ပြနေပါတယ်။

အသက် ၂၆ နှစ်သားဟာ ပြီးခဲ့တဲ့ရာသီတုန်းက စွမ်းဆောင်ရည်ကောင်းတွေပြသနိုင်ခဲ့ပြီး ပထမဆုံးရာသီမှာတင် ၄၃ ဂိုးအထိသွင်းယူနိုင်ခဲ့ပါတယ်။ ယူနိုက်တက် နဲ့ အာဆင်နယ်တို့က စိတ်ဝင်စားနေတဲ့ ဗစ်တာဟာ အခြားကမ္ဘာကလာတဲ့သူလို့ စပို့တင်းအသင်းဖော်တစ်ဦးက တင်စားခဲ့ပါတယ်။

အင်တာဗျူးတစ်ခုမှာ စပိန်နောက်ခံလူ ဖရက်စ်နီဒါက “သူ(ဗစ်တာ)က ဂိုးအမြဲသွင်းချင်နေတဲ့သူပါ။ သူဂိုးမသွင်းနိုင်ရင် စိတ်ပျက်တတ်တဲ့သူပါ။ သူက ပွဲအတွင်းမှာကော လေ့ကျင့်ခန်းအစီအစဉ်မှာပါ စက်တစ်ခုလိုပါပဲ။ သူက အခြားကမ္ဘာကလာတဲ့သူလို့တောင်ထင်ရပါတယ်။ သူက နောက်တစ်ဆင့်ရောက်နေတဲ့သူပါ။ သူက လုံးဝပြီးပြည့်စုံတဲ့ကစားသမားပါ။ ဘာလို့လဲဆိုတော့ ရုပ်ပိုင်းဆိုင်ရာအရလည်း သန်မာပါတယ်။ လျင်မြန်သလို ခွန်အားလည်းအပြည့်ပါပဲ။ သူ့ကန်ချက်ကလည်း အားပါပါတယ်။

အရည်အချင်းတွေက ဒါတင်မဟုတ်ပဲ အရပ်အမောင်းကော အမြင့်ဘောတွေမှာပါ အားသာပါတယ်။ ဒီလိုကစားသမားမျိုးကို ဒီနေ့ခေတ်မှာရှာဖို့ဆိုတာ မလွယ်ပါဘူး။ သူ့လိုကစားသမားမျိုးက တွေ့ရခဲပါတယ်”လို့ ဖရက်ရှ်နီဒါက ပြောကြားခဲ့ပါတယ်။ ယူနိုက်တက်ဟာ ပြီးခဲ့တဲ့နွေတုန်းက ဇီကာဇီး နဲ့ ဟွိုက်လန်းတို့ကို ပေါင်သန်း ၁၀၀ ကျော်အသုံးပြုပြီးခေါ်ယူထားခဲ့တာဖြစ်ပါတယ်။ ယူနိုက်တက်ဟာ အာမိုရင်ရှိနေတာကြောင့် ဗစ်တာကိုခေါ်ယူနိုင်ဖို့ ဦးဆောင်နေပေမယ့် ကစားသမားက ချန်ပီယံလိဂ်ဝင်ခွင့်ရတဲ့အသင်းကိုသာ ပြောင်းချင်နေပါတယ်။

ယူနိုက်တက်အနေနဲ့ လာမယ့်ရာသီချန်ပီယံလိဂ်ဝင်ခွင့်ရဖို့အတွက်က ယူရိုပါလိဂ်ဖလားရဖို့လိုအပ်နေပြီး လက်ရှိအမှတ်ပေးဇယားမှာတော့ အဆင့် ၁၃ နေရာမှာ ရပ်တည်နေပါတယ်။ အာဆင်နယ်ကလည်း နွေရာသီမှာ တိုက်စစ်ပိုင်းအားဖြည့်မှာဖြစ်ပြီး အီဆက် ၊ ဗစ်တာ နဲ့ ဆက်စ်ကိုတို့ကို ပစ်မှတ်ထားနေပါတယ်။ အာဆင်နယ်ရဲ့ဦးစားပေးပစ်မှတ်ကတော့ အီဆက်ဖြစ်ပြီး အီဆက်ကိုမရမှသာ အခြားပစ်မှတ်တွေကို ခေါ်ယူဖွယ်ရှိနေပါတယ်။ ယူနိုက်တက်ဂန္ထဝင်ဟောင်း ဖာဒီနန်ကတော့ ဗစ်တာရဲ့ဂိုးသွင်းစံချိန်က အထင်ကြီးနေပေမယ့် ပရီးမီးယားလိဂ်မှာ အံဝင်နိုင်မယ်ဆိုတာကို သံသယဖြစ်နေပါတယ်။

“သူက ပရီးမီးယားလိဂ်မှာ အံဝင်နိုင်မယ့်ကစားသမားမျိုးမဟုတ်ပါဘူး။ကျွန်တော် ၃ ပွဲလောက် သူ့ကိုအနီးကပ်ကြည့်ဖြစ်ခဲ့ပါတယ်။ ပရီးမီးယားလိဂ်မှာ အဲ့လိုအခွင့်အရေးမျိုးရမှာမဟုတ်ပါဘူး။ ကျွန်တော်ကတော့ သူ့အနေနဲ့ ပရီးမီးယားလိဂ်နဲ့အဆင်ပြေမယ်လို့ မထင်ပါဘူး”လို့ ဖာဒီနန်က ပြောကြားခဲ့ပါတယ်။