မနေ့က အီတီဟတ်ကွင်းမှာ မန်စီးတီးကို ၃-၁ ဂိုးနဲ့ ရှုံးနိမ့်ခဲ့ပေမယ့်လည်း ချဲလ်ဆီးအသင်းဟာ တိုးတက်မှုတွေ ရှိနေဆဲဖြစ်ကြောင်း မန်နေဂျာ အန်ဇိုမာရက်စ်ကာက ယုံကြည်နေပါတယ်။ ဒီရှုံးနိမ့်မှုကြောင့် အမှတ်ပေးဇယားရဲ့ ထိပ်သီးလေးသင်းထဲ ဝင်ဖို့ ချဲလ်ဆီးရဲ့ ရည်မှန်းချက်အတွက် အခက်အခဲတွေ ဖြစ်စေခဲ့ပေမယ့်လည်း မာရက်စ်ကာကတော့ သူ့အသင်းရဲ့ တိုးတက်မှုအပေါ် အကောင်းမြင်နေဆဲပါ။

ချဲလ်ဆီးအသင်းဟာ ပွဲအစမှာ ခြေစွမ်းပြကစားနိုင်ခဲ့ပြီး ၃မိနစ်မှာပဲ မာဒူကီရဲ့ ဂိုးနဲ့ ဦးဆောင်နိုင်ခဲ့ပါတယ်။ ဒါပေမယ့် ဂျီဗာဒီအော၊ ဟာလန်း၊ ဖိုဒန် တို့ရဲ့ ဂိုးတွေကြောင့် မန်စီးတီးဘက်က အနိုင်ရသွားခဲ့ပြီး မာရက်စ်ကာအတွက်တော့ နောင်တတွေ ကျန်ရစ်ခဲ့ပါတယ်။ ဒီနှစ်စမှာ ချဲလ်ဆီးအသင်းဟာ ပရီးမီးယားလိဂ်ပွဲစဉ် လေးပွဲမှာ တစ်ပွဲသညအနိုင်ရရှိခဲ့ပြီး ချန်ပီယံလိဂ်ဝင်ခွင့်နေရာကနေ ဝေးကွာသွားခဲ့ရပါတယ်။ အဝေးကွင်းပွဲစဉ်တွေမှာလည်း ခြေစွမ်းပြနိုင်ခြင်း မရှိတော့ဘဲ နောက်ဆုံးလိဂ်ပွဲစဉ် လေးပွဲဆက် နိုင်ပွဲပျောက်ခဲ့ပါတယ်။

ဒီရှုံးနိမ့်မှုတွေကြားကပဲ ချဲလ်ဆီးအသင်းရဲ့ ခြေစွမ်းတိုးတက်မှုတွေကို မြင်တွေ့ရကြောင်း မာရက်စ်ကာက ထောက်ပြခဲ့ပါတယ်။ "ပွဲအစက ကျွန်တော်တို့အတွက် အရမ်းကောင်းပါတယ်။ ပထမဂိုးသွင်းပြီး နောက်ထပ် နှစ်ဂိုး သုံးဂိုးလောက် ထပ်သွင်းနိုင်ခဲ့သင့်တယ်။ အဲ့လိုဆိုရင် ပွဲရလဒ်က လုံးဝပြောင်းလဲသွားမှာပါ" လို့ သူက ပြောပါတယ်။

ပွဲရဲ့ အဆုံးအဖြတ်ပေးတဲ့ အချိန်ကတော့ ဟာလန်းရဲ့ ဂိုးပါပဲ။ ဥမင်ထဲမဝင်ခင် ဂိုးသမား ဆန်းချက်ဇ်က သူ့ရဲ့ အမှားကို ဝန်ခံခဲ့တယ်လို့ မာရက်စ်ကာက ပြောပြပါတယ်။ "ရောဘတ်က သူ ပိုကောင်းအောင် လုပ်ရမယ်ဆိုတာ ပထမဆုံး ဝန်ခံတဲ့သူပါ။ နေ့တိုင်း ကြိုးစားလေ့ကျင့်မှုက တိုးတက်ဖို့ အကောင်းဆုံး နည်းလမ်းပါပဲ။ ကျွန်တော်တို့က ကစားသမားအားလုံးနဲ့ ဆွေးနွေးပြီး ကူညီပေးဖို့ ကြိုးစားနေပါတယ်" လို့ မာရက်စ်ကာက ဆိုပါတယ်။

ဆန်းချက်ဇ်ရဲ့ အမှားက ဒီရာသီမှာ ပဉ္စမမြောက်ပါ။ ဒါဟာ ပရီးမီးယားလိဂ် ကစားသမားတွေထဲမှာ အများဆုံးဖြစ်သလို ၂၀၀၇-၀၈ ရာသီနောက်ပိုင်း ချဲလ်ဆီးကစားသမား တစ်ယောက်ရဲ့ တစ်ရာသီအတွင်း အမှားကြောင့် ဂိုးပေးရမှု အများဆုံးလည်း ဖြစ်ပါတယ်။ ဒါပေမယ့် မာရက်စ်ကာကတော့  "ကျွန်တော်တို့ တိုးတက်နေပါတယ်။ လွန်ခဲ့တဲ့ တစ်လ၊ နှစ်လကထက် ပိုကောင်းလာပါတယ်။ ဒီလိုအခြေအနေတွေက ကျွန်တော်တို့ကို ပိုကောင်းအောင် ပြုလုပ်ပေးမှာပါ" လို့ အခိုင်အမာ ပြောကြားခဲ့ပါတယ်။

ချဲလ်ဆီးအသင်းခေါင်းဆောင် ရီစီဂျိမ်းစ်ကလည်း နည်းပြရဲ့ ခံယူချက်ကို ထောက်ခံပြီး နောက်ဆုံးပွဲတွေမှာ ကံမကောင်းခဲ့ဘူးလို့ ပြောပါတယ်။ "ဒီထက်ပိုပြီး ရလဒ်ကောင်းတွေ မရတာက စိတ်ပျက်စရာပါ။ ကျွန်တော်တို့ တိုးတက်နေတယ်လို့ ထင်ပါတယ်။ အကောင်းဆုံး ကြိုးစားနေကြပြီး ရလဒ်ကောင်းတွေ မကြာခင် ရလာမယ်လို့ မျှော်လင့်ပါတယ်။" လို့ ဂျိမ်းစ်က Sky Sports ကို ပြောပါတယ်။

ဂျိမ်းစ်က နှစ်သင်းကြား အတွေ့အကြုံ ကွာခြားချက်ကိုလည်း ထောက်ပြခဲ့ပြီး "ကျွန်တော်တို့ နည်းပြနဲ့အတူရှိတာ တစ်နှစ်တောင် မပြည့်သေးဘူး၊ သူတို့ကတော့ ခုနစ်နှစ်ရှိပြီ။ လူတော်တော်များများက ထိပ်သီးလေးသင်းအကြောင်း ပြောကြပေမယ့် ကျွန်တော်တို့ကတော့ တစ်ပွဲချင်းစီကိုပဲ အာရုံစိုက်သွားမှာပါ" လို့ ပြောပါတယ်။

ချဲလ်ဆီးရဲ့ နောက်ထပ် စိန်ခေါ်မှုကတော့ လာမယ့်အပတ် တနင်္လာနေ့ Stamford Bridge မှာ လန်ဒန်ပြိုင်ဘက် ဝက်စ်ဟမ်းအသင်းနဲ့ ယှဉ်ပြိုင်ရမှာပါ။ ဝက်စ်ဟမ်းနည်းပြက ချဲလ်ဆီးနည်းပြဟောင်း ဂရေဟမ်ပေါ်တာ ဖြစ်တာကြောင့် ဒီပွဲက ပိုပြီး စိတ်ဝင်စားစရာ ကောင်းနေပါတယ်။