လျာထားနည်းပြသစ်စာရင်းမှာပါဝင်တဲ့ အာမိုရင်ရဲ့စပို့တင်းလစ္စဘွန်းအသင်းကို စောင့်ကြည့်ဖို့ လီဗာပူးအသင်းက ကိုယ်စားလှယ်စေလွှတ်ခဲ့တယ်လို့ သတင်းတွေအရ သိရပါတယ်။လက်ရှိနည်းပြကလော့ပ်က အန်ဖီးလ်မှာ ကိုးနှစ်ကြာတာဝန်ယူပြီးနောက် ခွန်အားတွေကုန်ခမ်းသွားပြီလို့ ဝန်ခံပြောဆိုရင်း အခုရာသီကုန်မှာ အသင်းကိုစွန့်ခွာတော့မယ်လို့ ပြီးခဲ့တဲ့ဇန်နဝါရီလကုန်ပိုင်းမှာ တရားဝင်ကြေညာလိုက်ပါတယ်။

ကလပ်အသင်းဘက်ကလည်း အခုရာသီ၊ ပြိုင်ပွဲစုံမှာ ဆုဖလားအောင်မြင်မှုရရှိရေး ဆက်လက်ယှဉ်ပြိုင်နေတဲ့ ဂျာမန်လူမျိုးနည်းပြကြီးကို အမှတ်တရများစွာနဲ့ နှုတ်ဆက်ခွင့်ရရှိစေရန် အစွမ်းကုန်ကြိုးစားလျက်ရှိပါတယ်။ ပြီးခဲ့တဲ့သီတင်းပတ်အတွင်းမှာပဲ လီဗာပူးက ဝင်ဘလေကွင်းမှာ ချဲလ်ဆီးကို အနိုင်ယူကာ ကာရာဘောင်ဆုဖလားကို သိမ်းပိုက်ခဲ့ပြီး ယာဂန်ကလော့ပ်အတွက် အခုရာသီ၊ ဗွေဆော်ဦးဆုတံဆိပ်ကို ဆွတ်ခူးနိုင်အောင် စွမ်းဆောင်ပေးခဲ့ပါတယ်။

ဒါပေမယ့် တဖက်မှာလည်း လီဗာပူးအသင်းက ကလော့ပ်ရဲ့နေရာဆက်ခံနိုင်သူအဖြစ် ဇာဘီအလွန်ဆို၊ အာမိုရင်နဲ့ ဒီဇာဘီတို့ကို သတ်မှတ်ထားကာ အသင်းကိုဦးဆောင်ပေးမယ့်နည်းပြသစ်ကို ဆက်လက်ရှာဖွေနေဆဲ ဖြစ်ပါတယ်။Mirror သတင်းဌာနရဲ့အဆိုအရ မာဆေးဆိုဒ်ကလပ်က နည်းပြရာထူးအတွက် အင်တာဗျူးမေးမြန်းမှုတွေ မပြုလုပ်ခင် အကြိုလေ့လာစောင့်ကြည့်မှုတွေ လုပ်ဆောင်နေတယ်လို့ သိရပါတယ်။

အာမိုရင်ကို ချဲလ်ဆီးအသင်းဘက်ကလည်း နည်းပြသစ်အဖြစ်တာဝန်ပေးအပ်ဖို့ ၂၀၂၂ ခုနှစ်၊ စက်တင်ဘာလ တူချယ်ကို ရာထူးမှထုတ်ပယ်ပြီးနောက်မှာ တစ်ကြိမ်၊ ၂၀၂၃ ခုနှစ်၊ ဧပြီလ ဂရေဟမ်ပေါ်တာ ထွက်ခွာသွားချိန်မှာ တစ်ကြိမ် စဉ်းစားခဲ့ဖူးပါတယ်။လက်ရှိ အာမိုရင်းရဲ့စာချုပ်ဖျက်သိမ်းကြေးက ခန့်မှန်းတန်ဖိုး ပေါင် ၈ ဒဿမ ၅ သန်းအထိ ရှိတယ်လို့ သိထားရပေမယ့် ဒီကိန်းဂဏန်းတွေက သိသိသာသာလျှော့ချထားတယ်လို့လည်း ယုံကြည်ရပါတယ်။

အသက်-၃၉ နှစ်အရွယ်နည်းပြရဲ့စပို့တင်းလစ္စဘွန်းက ပေါ်တူဂီလိဂ်အမှတ်ပေးဇယားဒုတိယနေရာမှာ ရပ်တည်နေပြီး အာမိုရင်ကိုယ်တိုင်လည်း ဇန်နဝါရီလအတွက် တစ်လတာအကောင်းဆုံးနည်းပြဆုကို ဆွတ်ခူးရရှိခဲ့ပါတယ်။အခုလအစောပိုင်း၊ စပို့တင်းက ဘင်ဖီကာကို ၂-၁ ဂိုးဖြင့် အနိုင်ရရှိတဲ့ ပေါ်တူဂီပြည်တွင်းရှုံးထွက်ဖလားဆီမီးဖိုင်နယ်(ပ-ကျော့)ကိုလည်း လီဗာပူးအသင်းကင်းထောက်တွေ တက်ရောက်ကြည့်ရှုခဲ့ပါတယ်။

မာဆေးဆိုဒ်ကလပ်ဘက်က နည်းပြသစ်နေရာအတွက် ဦးစားပေးသတ်မှတ်ထားတဲ့ ဇာဘီအလွန်ဆိုကို ခေါ်ယူရန်ကြိုးစားရာမှာ အခက်အခဲတွေ ရှိလာနိုင်တာကြောင့် အခြားရွေးချယ်နိုင်သူတွေကိုလည်း လျာထားသတ်မှတ်ထားပါတယ်။လေဗာကူဆင်နဲ့အတူ အခုဘောလုံးရာသီကို အကောင်းဆုံးဖြတ်သန်းပြနေတဲ့ အလွန်ဆိုက ဂျာမန်ဘီလူးကြီးဘိုင်ယန်မြူးနစ်ကို တစ်ပွဲလျော့၊ ခုနစ်မှတ်အသာရရှိအောင် စွမ်းဆောင်ပြထားပါတယ်။

တဖက်မှာလည်း ဘိုင်ယန်မြူးနစ်ဘက်က သူတို့ရဲ့ကစားသမားဟောင်းဖြစ်တဲ့ အလွန်ဆိုကို လက်ရှိနည်းပြတူချယ်နေရာမှာ အစားထိုးတာဝန်ပေးသွားဖို့ စိတ်အားထက်သန်နေပါတယ်။အလွန်ဆိုက လေဗာကူဆင်နဲ့ ၂၀၂၆ ခုနှစ်အထိ စာချုပ်သက်တမ်းရှိနေပါတယ်။