သတင်းမီဒီယာတစ်ခုနဲ့ ပထမဆုံးအကြိမ်အင်တာဗျူးအစီအစဉ်အတွင်း အမ်ဘာပေက ရီးရဲလ်မက်ဒရစ်ကစားသမားဘဝပွဲဦးထွက်ဘောလုံးရာသီအကြောင်း ဖွင့်ဟလာခဲ့ပါတယ်။ ၂၀၂၅ နှစ်ဆန်းပိုင်းမှစတင်ကာ အမ်ဘာပေရဲ့ခြေစွမ်းက အကောင်းမွန်ဆုံးအဆင့်အတန်းထိ ရောက်ရှိလာပြီး လာလီဂါသွင်းဂိုး ၂၂ ဂိုးအပါအဝင် ပြိုင်ပွဲစုံ ၃၃ ဂိုးအထိ သွင်းယူနိုင်ခဲ့ပါတယ်။

ဒါက စပိန်နိုင်ငံမြို့တော်မှာ စီရော်နယ်ဒိုရဲ့ပွဲဦးထွက်ဘောလုံးရာသီသွင်းဂိုးနဲ့ တူညီသွားခဲ့ပေမယ့် အမ်ဘာပေကတော့ အသင်းရဲ့အခုဘောလုံးရာသီပစ်မှတ်တွေကိုသာ အာရုံစိုက်နေခဲ့ပါတယ်။ ရီးရဲလ်မက်ဒရစ်က လာလီဂါ၊ ချန်ပီယံလိဂ်နဲ့ ကိုပါဒယ်လ်ရေးဖလားပြိုင်ပွဲတွေမှာ ဆက်ရှိနေပြီး ရာသီကုန်ဆုဖလားသုံးလုံးအောင်ပွဲဖန်တီးနိုင်ဖို့အတွက် အခွင့်အရေးရှိနေပါတယ်။

အမ်ဘာပေကိုယ်တိုင်လည်း ပြီးခဲ့တဲ့နွေရာသီမှာ ပီအက်စ်ဂျီနဲ့အဆက်ဖြတ်ပြီး ကာလရှည်အပြောင်းအရွှေ့ဇာတ်လမ်းတစ်ခုရဲ့နောက်ဆက်တွဲအဖြစ် ရီးရဲလ်မက်ဒရစ်ဆီ ပြောင်းရွှေ့လာခဲ့ပါတယ်။ အခုအချိန်မှာတော့ အမ်ဘာပေက အပြောင်းအရွှေ့အတွက် သူ့ရဲ့နောက်ဆုံးဆုံးဖြတ်ချက်နဲ့ သူ့စိတ်ထဲမှာ အမှန်တကယ်ပုံဖော်ထားတဲ့အရာကို ထုတ်ဖော်ပြောပြခဲ့ပါတယ်။

La Sexta နဲ့ အင်တာဗျူးမှာ အမ်ဘာပေက “ ပရိတ်သတ်တွေကိုယ်တိုင် ကျွန်တော့်ရဲ့အမည်ကို အော်ဟစ်နေရင်းနဲ့ ကျော်ကြားလှတဲ့ ဂျာစီအင်္ကျီကိုဝတ်ဆင်ပြီး ဘာနေဗျူးကွင်းကြီးမှာ ကစားခွင့်ရရှိဖို့က ကျွန်တော်အလိုချင်ဆုံးအရာဖြစ်ပါတယ်။ ကျွန်တော်က ဘောလုံးသမားမဖြစ်လာခင်အထိ သာမန်လူတစ်ဦးတစ်ယောက်ပါပဲ။သာမန်လိုပဲ ဘဝကို ဖြတ်သန်းပြီး နှစ်သက်မိတဲ့အရာတွေရော၊ ဝမ်းနည်းမိတဲ့အခိုက်အတန့်တွေကိုရော ပိုင်ဆိုင်ထားသူ ဖြစ်ပါတယ်။ ကျွန်တော်က ဂိုးတွေသွင်းယူပြီး ပျော်ရွှင်ချင်သူတစ်ဦး ဖြစ်ပါတယ်။ ကျွန်တော်ကိုယ်တိုင်လည်း ဇီဒန်းနဲ့ ရီးရဲလ်မက်ဒရစ်ကို ကြိုက်နှစ်သက်တဲ့ ပရိသတ်တစ်ဦးပါ။ ဒါက ကမ္ဘာ့အကောင်းဆုံးကလပ်အသင်းတစ်ခုဖြစ်ပြီး အခြားအသင်းတွေမှာမရှိတဲ့ သြဇာမျိုးတွေကို ပိုင်ဆိုင်ထားပါတယ်။ ကျွန်တော်ရဲ့မျက်နှာမှာ ပျော်၊မပျော်ဆိုတဲ့ အရိပ်အယောင်တွေကို မြင်တွေ့နိုင်ပါတယ်။ အခုတော့ ကျွန်တော် အရမ်းပျော်ရွှင်နေပါတယ်။ ကျွန်တော်ရောက်ရှိနေတဲ့နေရာအတွက် အရမ်းပျော်ရွှင်မိပါတယ်”လို့ ပြောပါတယ်။