ပြင်သစ်လက်ရွေးစင်အသင်းနည်းပြသစ်အဖြစ် ရီးရဲလ်မက်ဒရစ်ဂန္တဝင်ဇီဒန်း တာဝန်ယူနိုင်တယ်ဆိုတဲ့ ကောလာဟလတွေ ထွက်ပေါ်လာချိန်မှာပဲ အမ်ဘာပေက ဘာမှတ်ချက်မှမပေးမိစေဖို့ သတိပြုရှောင်ရှားနေတယ်လို့ အတိအလင်းဝန်ခံပြောဆိုခဲ့ပါတယ်။

၂၀၁၂ ခုနှစ်မှာ ပြင်သစ်လက်ရွေးစင်အသင်းကို စတင်တာဝန်ယူကိုင်တွယ်ခဲ့တဲ့ ဒက်စ်ချမ့်စ်က မြောက်အမေရိကတိုက်မှာကျင်းပမယ့် ၂၀၂၆ ကမ္ဘာ့ဖလားပြိုင်ပွဲအပြီး သူ့ရဲ့ရာထူးတာဝန်ကို စွန့်လွှတ်သွားမယ်လို့ အတည်ပြုခဲ့ပါတယ်။ ဒက်စ်ချမ့်စ်ရဲ့နေရာအစားထိုးမယ့်သူကို အခုအချိန်အထိ တရားဝင်ထုတ်ပြန်လာခြင်းမရှိသေးပေမယ့် နည်းပြသစ်နေရာမှာ ဇီဒန်းဖြစ်လာနိုင်တယ်ဆိုတဲ့ ကောလာဟလတွေလည်း တဟုန်ထိုးထွက်ပေါ်လာခဲ့ပါတယ်။ ဇီဒန်းက ၂၀၂၁ ခုနှစ်မှာ ရီးရဲလ်မက်ဒရစ်နည်းပြရာထူးကို ဒုတိယအကြိမ်မြောက်စွန့်ခွာလာပြီးကတည်းက ဘယ်အသင်းကိုမှ တာဝန်ယူကိုင်တွယ်ခဲ့ခြင်း မရှိပါဘူး။

ပြင်သစ်လက်ရွေးစင်အသင်းကို ဇီဒန်းတာဝန်ယူကိုင်တွယ်နိုင်တယ်ဆိုတဲ့သတင်းတွေ ထွက်ပေါ်လာချိန်မှာပဲ ရီးရဲလ်မက်ဒရစ်ကြယ်ပွင့်အမ်ဘာပေက စပိန်နိုင်ငံရဲ့မြို့တော်မှာလတ်တလောနေထိုင်နေတဲ့ အသက်-၅၂ နှစ်အရွယ်ဂန္တဝင်ကြီးနဲ့ပတ်သက်တဲ့ ကောလာဟလတွေကို ထင်မြင်ချက်မပေးမိစေဖို့ သတိရှိရှိရှောင်ရှားနေပါတယ်လို့ ဝန်ခံပြောဆိုခဲ့ပါတယ်။ ဒါ့အပြင် လက်ရှိပြင်သစ်အသင်းကပ္ပတိန်က ဒက်စ်ချမ့်စ်ရဲ့ ၁၄ နှစ်ကြာတာဝန်ယူမှုနဲ့ ဒက်စ်ချမ့်စ်ရဲ့နေရာ ဘယ်သူအစားထိုးနိုင်မလဲဆိုတဲ့ မေးခွန်းတွေကိုလည်း ဖြေကြားပေးဖို့ ငြင်းဆန်ခဲ့ပါတယ်။

Le Parisein နဲ့တွေ့ဆုံချိန် ဇီဒန်းနဲ့ပတ်သက်လို့ မေးမြန်းလာမှုကို အမ်ဘာပေက “ ကျွန်တော် သူနဲ့ပတ်သက်လို့ ဘာမှတ်ချက်မှမပေးမိစေဖို့ သတိကြီးကြီးထားပြီး ရှောင်ရှားနေပါတယ်”လို့ ပြောပါတယ်။ ဒါ့အပြင် ပီအက်စ်ဂျီကြယ်ပွင့်ဟောင်းက အနာဂတ်မှာလစ်လပ်လာမယ့် နည်းပြရာထူးနဲ့ပတ်သက်လို့ ထင်ကြေးမပေးချင်ဘူးလို့ အခိုင်အမာပြောကြားခဲ့ပါတယ်။

ဒီအကြောင်းအရာနဲ့ပတ်သက်ပြီး နောက်ထပ်ပြောကြားရာမှာလည်း အမ်ဘာပေက “ ခင်ဗျားတို့က ကျွန်တော့်ကို ဒီအကြောင်းပြောစေချင်တယ်ဆိုတာ ကျွန်တော်သိပါတယ်။ ဒါပေမယ့် ကျွန်တော်ကတော့ ဇီဒန်းအကြောင်း ပြောမှာမဟုတ်ပါဘူး။ ဘာကြောင့်လဲဆိုတော့ ဒါက ကျွန်တော့်ရဲ့အခန်းကဏ္ဍ မဟုတ်လို့ပါပဲ။ ဒါက ဘောလုံးအဖွဲ့ချုပ်ဥက္ကဋ္ဌရဲ့တာဝန်သာဖြစ်ပြီး သူကပဲ ဆုံးဖြတ်ချက်ချမှတ်သွားပါလိမ့်မယ်။ လူတိုင်းကတော့ ဖီဒန်းအကြောင်းကို ဆွေးနွေးပြောဆိုနေပါတယ်။ကျွန်တော်ကတော့ ဂူအောင်းလူသားတစ်ဦးလို ဟန်မဆောင်ချင်သလို ဘာတွေဖြစ်ပျက်နေသလဲဆိုတာလည်း တကယ်မသိပါဘူး။ ဒါပေမယ့် ဒီကိစ္စက ကျွန်တော်ပြောသင့်တဲ့အကြောင်းအရာလည်း မဟုတ်ပါဘူး”လို့ ဆိုပါတယ်။

အမ်ဘာပေက အခုနိုင်ငံတကာသီတင်းပတ်မှာ ခရိုအေးရှားနဲ့ရင်ဆိုင်ရမယ့် နေးရှင်းလိဂ်ကွာတားဖိုင်နယ်နှစ်ကျော့ပွဲစဉ်ကို ပြင်သစ်အသင်းနဲ့အတူ ဆင်နွှဲသွားရပါမယ်။