ဆာဂျင်မ်ရက်ကလစ်ဖ်နဲ့ ယူနိုက်တက်တို့ဟာ တန်ဟက်ရဲ့အနာဂတ်ကို ဆုံးဖြတ်ချက်ချခဲ့ကြပြီးဖြစ်တယ်လို့ ဆိုလာတဲ့ ဂယ်ရီနဗီးလ်
မန်ချက်စတာယူနိုက်တက်ဂန္ထဝင် ဂယ်ရီနဗီးလ်က အသင်းရဲ့အကြီးအကဲတွေနဲ့ ဆာဂျင်မ်ရက်ကလစ်ဖ်တို့ဟာ နည်းပြအဲရစ်တန်ဟက်ရဲ့အနာဂတ်ကို ဆုံးဖြတ်ချက်ချခဲ့ကြပြီးဖြစ်တယ်လို့ ပြောကြားလာခဲ့ပါတယ်။
လာမယ့်နွေရာသီမှာ ယူနိုက်တက်အနေနဲ့ အသင်းရဲ့ အပြောင်းအရွှေ့ကိစ္စရပ်တွေကို ကြီးကြီးမားမားပြုလုပ်ဖို့ရှိနေပြီး အသင်းကို တစ်စိတ်တစ်ပိုင်းပိုင်ဆိုင်ခွင့်ရထားတဲ့ ဂျင်ရက်ကလစ်ဖ်ရဲ့ဦးဆောင်မှုနဲ့အတူ ပြောင်းလဲမှုတွေမြင်တွေ့ရဖို့ရှိနေပါတယ်။ ယူနိုက်တက်ရဲ့ဘောလုံးလုပ်ငန်းတွေကို ထိန်းချုပ်ခွင့်ရလိုက်တာနဲ့ တပြိုင်နက် ရက်ကလစ်ဖ်ဟာ မန်စီးတီးမှ အိုမာဘရာဒါကို အသင်းရဲ့ စီအီးအိုအဖြစ် ခေါ်ယူခန့်အပ်ခဲ့ပြီး မကြာသေးမီကလည်း နယူးကာဆယ်အားကစားဒါရိုက်တာ ဒန်အက်ရှ်ဝေါ့သ်ကို ချိတ်ဆက်မှုတွေပြုလုပ်ခဲ့တာဖြစ်ပါတယ်။
ယခုအခါမှာ ယူနိုက်တက်ကစားသမားဟောင်း ဂယ်ရီနဗီးလ်က “မန်စီးတီးကနေ အိုနာဘရာဒါကို ခေါ်ယူပြီးသိပ်မကြာခင်မှာပဲ နယူးကာဆယ်ကနေ ဒန်အက်ရှ်ဝေါ့သ်ကို ခေါ်ယူဖို့ ပြင်ဆင်နေကြပါပြီ။ သူတို့တွေ ဆုံးဖြတ်ချက်တွေကို လျင်လျင်မြန်မြန်ပဲချမှတ်နေတာကြောင့် တန်ဟက်နဲ့ ပတ်သက်တဲ့ ဆုံးဖြတ်ချက်ကိုလည်း ချပြီးကြပြီလို့ထင်ပါတယ်။ ဒီလိုမှမဟုတ်ဘူးဆိုရင်တော့ တန်ဟက်ကို နောက်ရာသီအထိဆက်ထိန်းထားဖို့ ဆန္ဒရှိနေတာဖြစ်ကောင်းဖြစ်နိုင်ပါတယ်။ သူတို့ရဲ့ဆုံးဖြတ်ချက်ကို မေလအထိစောင့်နေရမှာကတော့ မဖြစ်သင့်ပါဘူး” “ယူနိုက်တက်ဟာ ပြီးခဲ့တဲ့ ၁၀ နှစ်အတွင်း ကစားသမားသစ်စုဆောင်းမှုတွေအပါအဝင် ကွင်းတွင်းကွင်းပြင် ကိစ္စရပ်တွေမှာ ဆုံးဖြတ်ချက်မှားယွင်းတော့ ဆုံးဖြတ်ချက်နောက်ကျတာတွေ ဖြစ်ခဲ့ပါတယ်။ အခုအခြေအနေမှာလည်း သူတို့အနေနဲ့ ဒီလိုအမှားတွေကို နိဂိုးချုပ်နိုင်ပြီလို့ ကျွန်တော်မထင်ပါဘူး” လို့ပြောကြားခဲ့ပါတယ်။
တန်ဟက်ဟာ သူ့ရဲ့ယူနိုက်တက်နည်းပြဘဝပထမဆုံးရာသီမှာ ကာရာဘောင်ဖလားကို ဆွတ်ခူးပေးနိုင်ခဲ့သော်လည်း ဒီရာသီမှာတော့ အသင်းသမိုင်းတစ်လျှောက် အဆိုးဝါးဆုံး မှတ်တမ်းတွေနဲ့ ကြုံတွေ့ထားရုံမက ခြေစွမ်းကောင်းရဖို့ပါ ရုန်းကန်နေရတာဖြစ်ပါတယ်။ မကြာသေးမီက ပရီးမီးယားလိဂ်မှာ ၅ ပွဲဆက် အနိုင်ရခဲ့တာကြောင့် ကြီးမားတဲ့ တိုးတက်မှုကိုပြသနိုင်ပြီလို့ ယူဆခဲ့ရပေမယ့် ပြီးခဲ့တဲ့စနေနေ့က အိမ်ကွင်းမှာ ဖူလ်ဟမ်ကို ၁-၂ နဲ့ရှုံးနိမ့်ခဲ့တာကြောင့် ဝေဖန်မှုတွေနဲ့ပြန်လည်ကြုံတွေ့ခဲ့ပါတယ်။
ဒါ့အပြင် တန်ဟက်ဟာ အသင်းကိုချန်ပီယံလိဂ်ပြိုင်ပွဲကနေထွက်ခွာစေခဲ့တဲ့အပြင် လာမယ့်ရာသီမှာလည်း ချန်ပီယံလိဂ်ဝင်ခွင့်ရဖို့ မသေချာသေးဘဲ အမှတ်ပေးဇယားရဲ့အဆင် ၆ နေရာမှာရပ်တည်နေတာဖြစ်ပါတယ်။ ချန်ပီယံလိဂ်ဝင်ခွင့်က အလှမ်းဝေးနေပေမယ့် နောက်ဆုံး ကျန်ရှိတဲ့အောင်မြင်မှု တစ်ခုအဖြစ် အက်ဖ်အေဖလားပြိုင်ပွဲ ကျန်ရှိနေသေးတာကြောင့် တန်ဟက်အနေနဲ့ ဆုဖလားဆွတ်ခူးနိုင်ဖို့ အစွမ်းကုန်ကြိုးစားရမှာဖြစ်ပါတယ်။
လာမယ့်ဗုဒ္ဓဟူးနေ့မှာတော့ တန်ဟက်ရဲ့အသင်းဟာ အက်ဖ်အေဖလား ပဉ္စမအဆင့်ပွဲစဉ်အဖြစ် နော်တင်ဟမ်ဖောရက်စ်ကို အဝေးကွင်းမှာ သွားရောက်ရင်ဆိုင်ရမှာဖြစ်ပါတယ်။
