ခက်ခဲကြမ်းတမ်းလှတဲ့ ပွဲကျပ်ကာလတစ်ခုကိုဖြတ်သန်းရချိန် ကစားသမားတွေ အထိအခိုက်မရှိအောင် အာရုံစိုက်ထားရမယ်ဆိုတဲ့ စိန်ခေါ်မှုတစ်ခု အန်ဆယ်လော့တီအတွက် ရှိနေပေမယ့် ရီးရဲလ်မက်ဒရစ်နည်းပြကတော့ ကိုပါဒယ်လ်ရေးဖလားဖိုင်နယ်ဆီ နောက်တစ်ကြိမ်တက်လှမ်းနိုင်မယ့် အခွင့်အလမ်းမှတဆင့် အပိုစိတ်ခွန်အားရရှိနိုင်ရေး ကြိုးပမ်းနေပါတယ်။

၁၅ ရက်အတွင်း ငါးပွဲကစားရဖို့ရှိနေတဲ့ ရီးရဲလ်မက်ဒရစ်က ပထမဆုံးပွဲစဉ်အဖြစ် ဒီည၊ အိမ်ကွင်းဘာနေဗျူးမှာ ဆိုစီဒက်နဲ့ရင်ဆိုင်ရမယ့် စပိန်ဘုရင့်ဖလားဆီမီးဖိုင်နယ်ဒုတိယအကျော့ကို ဧည့်ခံကစားရပါမယ်။ ပထမအကျော့မှာတော့ ရီးရဲလ်မက်ဒရစ်က ၁-၀ ဂိုးဖြင့် အနိုင်ရရှိခဲ့ပါတယ်။

တနင်္လာနေ့၊ သတင်းထောက်တွေနဲ့တွေ့ဆုံချိန် အန်ဆယ်လော့တီက “ ပွဲစဉ်တွေအတွက် ကြိုတင်ပြင်ဆင်မှု၊ ဒဏ်ရာပြဿနာဝန်ထုပ်ဝန်ပိုးတွေ ဒါတွေအားလုံးကို ကျွန်တော်တို့ စီမံခန့်ခွဲသွားရပါမယ်။ တစ်နေ့မှာ ပွဲစဉ်တွေအတွက် ကြိုတင်ပြင်ဆင်မှုပြုလုပ်ဖို့ အချိန်တွေ ပိုမိုရှိနိုင်တယ်မျှော်လင့်ချက်နဲ့အတူ ကျွန်တော်တို့ စီမံခန့်ခွဲရပါမယ်”လို့ ပြောပါတယ်။

လာလီဂါအမှတ်ပေးဇယားဦးဆောင်သူဘာစီလိုနာနဲ့ သုံးမှတ်အကွာမှာရှိနေတဲ့ ရီးရဲလ်မက်ဒရစ်က ဧပြီ ၈ ရက်နဲ့ ဧပြီ ၁၆ ရက်တို့မှာ ကျင်းပမယ့် ချန်ပီယံလိဂ်ကွာတားဖိုင်နယ်အဆင့်အတွက် အာဆင်နယ်နဲ့ ရင်ဆိုင်ရပါမယ်။ အီတာလျံသားနည်းပြက “ အလွန်တောင်းဆိုမှုများပြားတဲ့ ဘောလုံးရာသီတစ်ခု ဖြစ်လာနေပြီး အခုအချိန်ထိတော့ ကျွန်တော်တို့ ကောင်းကောင်းစီမံခန့်ခွဲထားနိုင်ပါတယ်။

ကစားသမားတွေအတွက် အာရုံစိုက်ပေးနိုင်ဖို့ ကျွန်တော်တို့ ကြိုးစားရပါမယ်။ ဒါပေမယ့် ဘောလုံးပြက္ခဒိန်က ကျွန်တော်တို့ကို ပင်ပန်းနွမ်းလျနေအောင် လုပ်ထားလို့ နည်းနည်းတော့ ရှုပ်ထွေးပါတယ်”လို့ ပြောပါတယ်။ အဓိကနောက်ခံလူတွေဖြစ်တဲ့ ကာဗာဂျယ်လ်၊ မီလီတာအိုနဲ့ ဖာလန်းမန်ဒီ၊ ကွင်းလယ်ကစားသမား စီဘယ်လော့စ်တို့ ဒဏ်ရာပြဿနာကြုံတွေ့နေလို့ ရီးရဲလ်မက်ဒရစ်အသင်း အားနည်းနေရတယ်လို့ အန်ဆယ်လော့တီက ပြောပါတယ်။

သူက “ ပြီးခဲ့တဲ့ဘောလုံးရာသီထက် ကျွန်တော်တို့တွေ ကြံ့ခိုင်မှုပိုင်း အားနည်းပါတယ်။ ဒါပေမယ့် တိုက်စစ်ပိုင်းကတော့ ပိုမိုထက်မြက်ပါတယ်။ ခံစစ်ပိုင်းမှာ အလွန်အရေးကြီးတဲ့ဒဏ်ရာပြဿနာအချို့ရှိနေလို့ ကျွန်တော်တို့ရဲ့စုစည်းသန်မာမှုကို ဆုံးရှုံးစေပါတယ်”လို့ ဆက်ရှင်းပြပါတယ်။ အသက်-၆၅ နှစ်အရွယ်ရှိနည်းပြက ရီးရဲလ်မက်ဒရစ်သမိုင်းတလျှောက် ကိုပါဒယ်လ်ရေးဆုဖလားသုံးကြိမ်တိုင် အနိုင်ရရှိတဲ့ ပထမဆုံးနည်းပြအဖြစ် မှတ်တမ်းဝင်သွားနိုင်မယ့် အခွင့်အလမ်းကို သဘောတွေ့နေပါတယ်။

အန်ဆယ်လော့တီက “ ဗိုလ်လုပွဲတစ်ခုဆီ ချဉ်းကပ်လာနေလို့ ကျွန်တော် စိတ်အားတက်ကြွမိသလို ကစားသမားတွေနဲ့ ကလပ်အသင်းလည်း စိတ်အားတက်ကြွနေပါတယ်။ ကျွန်တော်တို့မှာရှိထားတဲ့ အားသာချက်နဲ့ ဗိုလ်လုပွဲရောက်ရှိဖို့နီးစပ်နေမှုတွေကြောင့် ကျွန်တော်တော့ အရမ်းတက်ကြွနေပါပြီ”လို့ ပြောပါတယ်။