စပိန်တော်ဝင်ဘောလုံးအဖွဲ့ချုပ်(RFEF)က စပိန်စူပါဖလားပြိုင်ပွဲကို ၂၀၂၇ ခုနှစ်၊ နှစ်ဆန်းပိုင်း၊ အစ္စတန်ဘူလ်မြို့မှာ ပြောင်းရွှေ့ကျင်းပသွားမယ်လို့ အတည်ပြုလိုက်ပါတယ်။

ဒီလိုပြောင်းရွှေ့ကျင်းပမယ့် သဘောတူညီချက်ကို အခုသီတင်းပတ်အတွင်း RFEF ဥက္ကဋ္ဌ ရာဖာအယ်လ်လူဇန်ကိုယ်တိုင် လက်မှတ်ရေးထိုးခဲ့ပါတယ်။ ဘာစီလိုနာ၊ ရီးရဲလ်မက်ဒရစ်၊ ဆိုစီဒက်နဲ့ အက်သလက်တီကိုမက်ဒရစ်တို့ ပါဝင်လာမယ့် ဒီပြိုင်ပွဲကို ဖေဖော်ဝါရီ ၂ ရက်မှ ၆ ရက်အထိ ကျင်းပသွားပါမယ်။

လာလီဂါနဲ့ ကိုပါဒယ်လ်ရေးဖလားလက်ရှိချန်ပီယံတွေအပြင် ဒုတိယဆုရအသင်းတွေ ပါဝင်ယှဉ်ပြိုင်မယ့် ပြိုင်ပွဲကို စုစုပေါင်းပရိသတ် ၁၅၀,၀၀၀ ဝန်းကျင်ဝင်ဆံ့တဲ့ အားကစားကွင်း သုံးခုမှာ ကျင်းပသွားပါမယ်။
 
ဗိုလ်လုပွဲကိုတော့ ပရိသတ် ၅၂,၀၀၀ ဝန်းကျင် ဝင်ဆံ့ပြီး ဂါလာတာစာရေးရဲ့ အိမ်ကွင်းဖြစ်တဲ့ အလီဆာမီယန် (Ali Sami Yen) ကွင်းမှာ ကျင်းပသွားဖို့ စီစဉ်ထားပါတယ်။
 
ဖေဖော်ဝါရီ ၂ ရက်၊ ဘာစီလိုနာနဲ့ အက်သလက်တီကိုမက်ဒရစ်တို့ ယှဉ်ပြိုင်မယ့် ပထမဆီမီးဖိုင်နယ်ပွဲစဉ်ကိုတော့ ဖီနာဘာချီရဲ့အိမ်ကွင်းဖြစ်တဲ့ ချိုဘာနီ (Chobani) ကွင်းမှာ ကျင်းပသွားပါလိမ့်မယ်။
 
ဖေဖော်ဝါရီ ၃ ရက်၊ ဆိုစီဒက်နဲ့ ရီးရဲလ်မက်ဒရစ်တို့ ယှဉ်ပြိုင်မယ့် နောက်ထပ်ဆီမီးဖိုင်နယ်ပွဲစဉ်ကိုတော့ ဘက်ဆစ်တပ်စ်ရဲ့အိမ်ကွင်းဖြစ်တဲ့ တူပရက်စ် (Tupras) ကွင်းမှာ ကျင်းပသွားပါမယ်။
 
၂၀၂၁ ခုနှစ်မှလွဲလို့ ၂၀၂၀ ပြည့်နှစ်ကတည်းက ဒီပြိုင်ပွဲကို လက်ခံကျင်းပပေးခဲ့တဲ့ ဆော်ဒီအာရေဗျမှ ပြောင်းရွှေ့ဖို့ သီတင်းပတ်ပေါင်းများစွာ ဆွေးနွေးညှိနှိုင်းပြီးနောက် အခုလိုအပြောင်းအလဲ ထွက်ပေါ်လာတာပါ။ ဆော်ဒီကတော့ အာရှဖလားပြိုင်ပွဲနဲ့ ရက်တိုက်နေလို့ ၂၀၂၇ ခုနှစ်အတွက် စပိန်စူပါဖလားပြိုင်ပွဲကို လက်ခံကျင်းပနိုင်ခြင်း မရှိပါဘူး။