အန်ဖီးလ်မှာ အရေးနိမ့်ပြီး သီတင်းသုံးပတ်အကြာမှာပဲ နယူးကာဆယ်က ဝင်ဘာလေကွင်းမှာ လီဗာပူးနဲ့ အန်းစလော့ကို နည်းဗျူဟာပိုင်းလှည့်စားမှုတစ်ခုနဲ့အတူ အနိုင်ပြန်ယူခဲ့တယ်လို့ အက်ဒီဟိုဝီက ဝန်ခံပြောဆိုခဲ့ပါတယ်။ဖေဖော်ဝါရီလကုန်ပိုင်း၊ လီဗာပူးကို နှစ်ဂိုးပြတ်ရှုံးနိမ့်ခဲ့ဖူးတဲ့ နယူးကာဆယ်ရဲ့အခုတစ်ကြိမ်ပွဲချဉ်းကပ်မှုပုံစံက ကွင်းဘေးမှာရှိနေတဲ့ အန်းစလော့အတွက် အံ့အားသင့်စရာတစ်ခု ဖြစ်လာခဲ့ပါတယ်။

ဒါပေမယ့် ကာရာဘောင်းဖလားဗိုလ်လုပွဲမှာ လီဗာပူးက ပိုမိုစိတ်ချရပြီး ကြိုးစားကစားနိုင်တဲ့ ပွဲထွက်ကစားသမားအခင်းအကျင်းကို အသုံးပြုလာခဲ့ပေမယ့် ကံမကောင်းစွာနဲ့ဘဲ ပေးဆပ်မှုကြီးမားသွားခဲ့ပါတယ်။ ဒန်ဘန်းရဲ့ခေါင်းတိုက်ဂိုးအပြင် အီဆက်ခ်ရဲ့အဆုံးသတ်ကန်သွင်းချက်တွေက နယူးကာဆယ်ကို နှစ်ဂိုးပြတ်ဦးဆောင်နိုင်စေပြီး ပြိုင်ဘက်အပေါ် ရုပ်ပိုင်း၊စိတ်ပိုင်း အပြတ်အသတ်အသာစီးရရှိစေခဲ့ပါတယ်။ လီဗာပူးကတော့ ဒုတိယပိုင်းနာကျင်အချိန်ပိုမှာသာ ချီယေဆာရဲ့ချေပဂိုးတစ်ဂိုး ရရှိခဲ့ပါတယ်။

ပွဲစဉ်အပြီး Sky Sports ဆွေးနွေးခန်းအစီအစဉ်မှာ အန်းစလော့ကို ဖိအားပေးနိုင်ရန် ပရီးမီးယားလိဂ်ဒုတိယအကျော့ရှုံးနိမ့်မှုမှ ပွဲချဉ်းကပ်မှုပုံစံကို ပြောင်းလဲပစ်ခဲ့သလားဆိုပြီး ဟိုဝီဆီ မေးခွန်းထုတ်လာခဲ့ပါတယ်။ ဟိုဝီက “လွန်ခဲ့တဲ့သီတင်းပတ်အနည်းငယ်ကပွဲစဉ်မှာ ကျွန်တော်တို့ရဲ့အစွမ်းထက်မှုတွေကို ထုတ်မပြချင်ခဲ့ပါဘူး။ ကျွန်တော်တို့တွေ ဒီနေ့ပွဲစဉ်ကို အနိုင်ရရှိချင်ပါတယ်။ ဒါကြောင့် မတူညီတဲ့နည်းလမ်းတစ်ခုနဲ့ လုပ်ဆောင်ခဲ့ပါတယ်”လို့ ပြောပါတယ်။

ဒီအချက်ကလည်း ရှင်းရှင်းလင်းလင်းဖြစ်ခဲ့ပါတယ်။ ပွဲကစားချိန်အတွင်းမှာ နယူးကာဆယ်က ကဏ္ဍစုံ ပိုမိုအားကောင်းတဲ့ပုံစံမျိုး ပြသခဲ့ပြီး အထူးသဖြင့် အရပ် ၆’ ၇”ရှိ ဒန်ဘန်းကို မက်အယ်လစ္စတာလူကပ်ရတဲ့ အလွတ်တည်ကန်ဘောရရှိချိန်တွေမှာ ပိုမိုထင်သာမြင်သာရှိခဲ့ပါတယ်။

ဒါပေမယ့် အက်ဒီဟိုဝီက ပွဲချိန်အတွင်း သူတို့အသင်းရဲ့ထိရောက်မှုရှိတဲ့ကစားဟန်ကြောင့် အံ့အားသင့်ခဲ့ရတယ်လို့ ဝန်ခံပြောဆိုခဲ့ပါတယ်။ သူက “ အခုပွဲစဉ်အတွက်ပဲ အလွတ်တည်ကန်ဘောတွေကို သီတင်းပတ်နှစ်ပတ်ကြာ မနားမနေလေ့ကျင့်ခဲ့ကြပါတယ်။ လက်တွေ့ကျကျလုပ်ခဲ့ရတဲ့အရာတွေကို မြင်တွေ့ကြမယ်ဆိုရင် ကျွန်တော်တို့မှာ အခွင့်အရေးမရှိဘူးလို့ပဲ ပြောကြပါလိမ့်မယ်။ကျွန်တော်တို့ကိုယ်တိုင်လည်း ဒန်ဘန်းဂိုးသွင်းနိုင်မယ်လို့ မယုံကြည်ခဲ့ပါဘူး။ သူက ဒီလိုဂိုးသွင်းယူဖို့ မလေ့ကျင့်ခဲ့ပါဘူး။ ဒန်ဘန်းက ကျွန်တော်တို့အတွက် သာမန်ထက်ပိုပြီး တန်ဖိုးကြီးမားခဲ့ပါတယ်”လို့ ပြောပါတယ်။

တဖက်မှာလည်း အန်းစလော့ရဲ့ပွဲချိန်အတွင်း အပြောင်းအလဲတွေက ထူးခြားခဲ့ပြီး အထူးသဖြင့် ကိုနာတေးကို လူစားလဲကာ ဂရာဗန်ဘတ်ချ်ကို ခံစစ်မှူးအဖြစ် ကစားစေခြင်း ဖြစ်ပါတယ်။ နောက်ပိုင်းမှာ လီဗာပူးက တိုက်စစ်ပိုင်းအတွက် ကာတစ်ဂျုံးစ်၊ အီလီယော့၊ ဆိုဘိုဆလိုင်း၊ ကိုဒီဂတ်ပို၊ မိုဆာလက်၊ ဒါဝင်နူနက်ဇ်နဲ့ တစ်လုံးတည်းသောချေပဂိုးသွင်းယူပေးခဲ့တဲ့ ချီယေဆာအပြင် ဗန်ဒိုက်ကိုပါ ထည့်သွင်းကစားခဲ့ပါတယ်။

အခုလိုတိုက်စစ်ကိုအားကုန်ထုတ်ယှဉ်ပြိုင်ကစားခဲ့ပေမယ့် စိတ်ပျက်အားငယ်ရမှုတွေနဲ့သာ နိဂုံးချုပ်သွားခဲ့ပါတယ်။ နယူးကာဆယ်ရဲ့ချန်ပီယံခရီးလမ်းအတွက် အမှတ်ပေးပွဲစဉ်ပေးဆပ်ခဲ့ရတဲ့ အက်ဒီဟိုဝီရဲ့နည်းဗျူဟာပိုင်းပြောင်းလဲမှုတွေက အဓိကအခန်းကဏ္ဍတစ်ခု ဖြစ်လာခဲ့ပါတယ်။