အာဆင်နယ်ဟာ မနေ့ညက ပီအက်စ်ဗွီကို ၇-၁ ဂိုးနဲ့ အံ့အားသင့်စရာ အနိုင်ရခဲ့ပြီးနောက် ဥရောပရဲ့ ထိပ်တန်းကလပ်ပြိုင်ပွဲဖြစ်တဲ့ ချန်ပီယံလိဂ်ကွာတားဖိုင်နယ်ကို နှစ်ကြိမ်ဆက်တိုက် တက်ရောက်ဖို့ သေချာလုနီးပါး ဖြစ်သွားပါတယ်။ အာတီတာရဲ့ အသင်းဟာ နောက်ဆုံး နှစ်ပွဲဆက် ဂိုးမသွင်းနိုင်ခဲ့ဘဲ နယ်သာလန်သို့ ရောက်လာခဲ့ပြီး တိုက်စစ်ကစားသမားတွေ အများအပြား မပါဝင်နိုင်တာကြောင့် နောက်ထပ် ဂိုးတွေကို ဘယ်ကနေ ရမလဲလို့ တွေးတောနေခဲ့ရပါတယ်။

ဒါပေမယ့် အာဆင်နယ်အနေနဲ့ ဂိုးတွေသွင်းဖို့ စိတ်ပူစရာ မလိုခဲ့ပါဘူး။ အိမ်ရှင်အသင်းရဲ့ ဆိုးရွားတဲ့ ခံစစ်က သူတို့ကို အခွင့်အရေး ပေးခဲ့ပြီး မကြာသေးခင် ရက်သတ္တပတ်များအတွင်း အကြီးအကျယ် လိုအပ်နေတဲ့ ယုံကြည်မှုနဲ့ အသင်းလိုက်ညီညွတ်မှုကို ပြန်လည်တည်ဆောက်နိုင်ခဲ့ပါတယ်။ ၀မ်နရီက နောက်ထပ်ခြေစွမ်းပြသခဲ့ပြီး အသင်းအတွက် ဒုတိယဂိုးကို သွင်းယူခဲ့သလို ဒုတိယပိုင်းမှာ မာတင် အိုဒီဂတ်အတွက် စတုတ္ထဂိုးကို ဖန်တီးပေးခဲ့ပြီး ပွဲကို အပြတ်အသတ် ဦးဆောင်စေခဲ့ပါတယ်။

သူ့ရဲ့ ခြေစွမ်းပြသလာတဲ့ရာသီမှာ ဒုတိယမြောက် ချန်ပီယံလိဂ် ဂိုးကို မှတ်တမ်းတင် သွင်းယူခဲ့ရင်း ၀မ်နရီက ပြိုင်ပွဲရဲ့ အဆင့်ဆင့်မှာ အသက် ၁၈ နှစ် မပြည့်ခင် ဂိုးသွင်းနိုင်တဲ့ စတုတ္ထမြောက် ကစားသမားဖြစ်လာခဲ့ပါတယ်။ ဟေးလ်အန့်အကယ်ဒမီထွက် ကစားသမားဟာ မကြာသေးခင် ရက်သတ္တပတ်တွေမှာ အာတီတာရဲ့ အသင်းမှာ အရေးပါတဲ့ အစိတ်အပိုင်းတစ်ခု ဖြစ်လာခဲ့ပြီး လက်ရှိအချိန်အထိ ဒဏ်ရာကြောင့် အနားယူနေရတဲ့ ဆာကာ မရှိတဲ့အချိန် ခြေစွမ်းပြသနိုင်ခဲ့တာပါ။

ဆာကာက လာမယ့် နိုင်ငံတကာပွဲစဉ်များပြီးနောက် ပြန်လည်ကစားနိုင်ဖို့ မျှော်လင့်နေပေမယ့် သူ့အင်္ဂလန်အသင်းဖော်ရဲ့ ကြံ့ခိုင်မှု ဘယ်လိုပဲဖြစ်ဖြစ် ၀မ်နရီက ပုံမှန်ပါဝင်ကစားနေမှာပဲလို့ ရိုက်စ်က အခိုင်အမာ ပြောခဲ့ပါတယ်။ "သူက အသက် ၁၇ နှစ်ပဲရှိသေးပြီး ဘောလုံးလောကရဲ့ အကြီးမားဆုံး စင်မြင့်မှာ ကစားနေတာ အံ့ဩစရာပါ" "ကျွန်တော်တို့ သူ့ကို လေ့ကျင့်ရေးမှာ နေ့တိုင်းမြင်ရတယ် အသင်းဖော်တွေ အားလုံးက သူ့ကို ကျွန်တော်တို့ အကာအကွယ်အောက်မှာ ထားထားတယ် မိုင်းလ်စ်နဲ့လည်း အတူတူပါပဲ။ သူတို့က ကစားဖို့ ထိုက်တန်ပါတယ်"

"သူတို့ ဘယ်လိုလေ့ကျင့်လဲဆိုတာ မြင်သင့်တယ် ဘာကိုမှ မကြောက်ဘဲ ဝင်ကစားပြီး စွမ်းဆောင်ရည်ပြသချင်တယ် ဒီည သူ ခြေစွမ်းပြသခဲ့ပါတယ်" "ဆာကာ ဒီမှာ ရှိနေရင်တောင် အီသန်က အသင်းမှာ ရှိနေဦးမှာပဲ ပွဲကစားချိန်မိနစ်တွေ ရဦးမှာပါပဲ။ ဘာလို့လဲဆိုတော့ သူ လေ့ကျင့်ရေးမှာ အရမ်းကောင်းလို့ပါ" "သူက ကျွန်တော်တို့နဲ့ အတူရှိပါတယ် မိုင်းလ်စ်လည်း အတူတူပဲ။ သူ အဝါကတ်ကြောင့် ထွက်သွားခဲ့ရပေမယ့် ကျွန်တော်တို့မှာ လူငယ် နှစ်ယောက်ရှိပါတယ် နောက်ထပ် အရမ်းကောင်းတဲ့ လူငယ်တွေ အများကြီး တက်လာနေပါသေးပါတယ်" လို့ ရိုက်စ်က ပွဲအပြီး TNT Sports ကို ပြောခဲ့ပါတယ်။

၀မ်နရီအတွက် အနားယူဖို့ အခွင့်အရေး မရှိသလောက်ပါပဲ။ တနင်္ဂနွေနေ့ ယူနိုက်တက်နဲ့ ပွဲမှာ သူ သေချာပေါက် ပွဲထွက်ကစားမှာဖြစ်ပြီး အာတီတာကတော့ အသက် ၁၇ နှစ်အရွယ် ဒီကစားသမားက အခု စိန်ခေါ်မှုကို တည်ငြိမ်တဲ့ စွမ်းဆောင်ရည် ပြသနိုင်ဖို့ပဲလို့ သတိပေးခဲ့ပါတယ်။ အာတီတာက "သူ့ကို တွန်းအားပေးဖို့ လိုတယ်လို့ မထင်ပါဘူး။ သူက ဘောလုံးကိုင်တိုင်း ဘာကို ရည်ရွယ်လဲဆိုတာ မြင်ရပါတယ်။ ဒါက အရမ်းကောင်းပြီး ဒီည သူ ဘယ်လိုကစားခဲ့လဲ ဘယ်လိုပြုမူခဲ့လဲဆိုတာ အထင်ကြီးစရာပါ"

"အခုက တည်ငြိမ်မှုရှိဖို့ပါ။ သုံးရက်အကြာ ပွဲကြီးပွဲကောင်းမှာ နောက်ထပ် ခြေစွမ်းပြသရမှာပါ" "ဒါက ကျွန်တော်တို့ လိုချင်တာပါ။ ဒါပေမယ့် နောက်ဆုံးမှာ အဲ့ဒီအရာက အကောင်အထည်ဖော်မှုနဲ့ ပတ်သက်တာပါ" "ဒီနေ့ ကျွန်တော်တို့ ကောင်းကောင်းလုပ်နိုင်ခဲ့ပါတယ်။ ချန်ပီယံလိဂ်မှာ ပြိုင်ဘက်ရဲ့ဂိုးဧရိယာထဲရောက်တဲ့အခါ အရေးကြီးတယ် အဲဒါတွေကို ထိန်းချုပ်ရမယ်လို့ ပွဲမတိုင်ခင် ကျွန်တော်တို့ ပြောခဲ့ပါတယ်" "ပထမဆုံး အခွင့်အရေးမှာ မလုပ်နိုင်ခဲ့ရင် သူတို့က ဂိုးသွင်းသွားမှာပဲ နောက်တစ်ကြိမ်က ပင်နယ်တီဖြစ်သွားတယ် ဒါပေမယ့် ဒီနေ့ ကျွန်တော်တို့ အံ့သြစရာကောင်းအောင် လုပ်နိုင်ခဲ့ပါတယ်" လို့ အာတီတာက ပြောပါတယ်။