အာဆင်နယ်နည်းပြ မီကယ်အာတီတာက အားကစားဒါရိုက်တာသစ်အဖြစ် အန်ဒရေယာဘာတာ ခန့်အပ်ခံရတာနဲ့ပတ်သက်ပြီး စိတ်လှုပ်ရှားမိကြောင်း ပြောကြားခဲ့ပါတယ်။ အက်သလက်တီကိုအသင်းရဲ့ တာဝန်ရှိသူဟောင်းဟာ ပြီးခဲ့တဲ့ နိုဝင်ဘာလက ထွက်ခွာသွားတဲ့ အီဒူးရဲ့နေရာကို အစားထိုးမှာဖြစ်ပြီး ဘာတာရဲ့ ရောက်ရှိလာမှုဟာ နွေရာသီအပြောင်းအရွှေ့ကာလမှာ အရေးပါတဲ့ အားဖြည့်မှုတစ်ခုဖြစ်လာမယ်လို့ အာတေတာက ယုံကြည်ထားပါတယ်။

ဘာတာဟာ ၂၀၁၇ ခုနှစ်ကနေ ဒီနှစ်အစောပိုင်းအထိ အက်သလက်တီကိုမှာ အောင်မြင်တဲ့ လုပ်ငန်းတာဝန်တွေကို ထမ်းဆောင်ခဲ့ပြီး ရိုဒရီ၊ ဂရစ်ဇ်မန်းတို့လို ကစားသမားတွေကို ခေါ်ယူရောင်းချတာအပါအဝင် ထင်ရှားတဲ့ အပြောင်းအရွှေ့တွေစွာကို စီစဉ်ခဲ့ပါတယ်။ သူဟာ ၂၀၂၄ နွေရာသီမှာ ပေါင် ၁၈၀ သန်းအထိ အကုန်အကျခံပြီး ဂျူလီယန်အယ်လ်ဗာရက်ဇ်၊ ကော်နာဂယ်လာဂါ၊ ရော်ဘင်လီ နော်မန်းနဲ့ အလက်ဇန်းဒါဆောလော့သ်တို့လို ကစားသမားတွေကို ခေါ်ယူခဲ့ပါတယ်။

ဘာတာက အာဆင်နယ်အသင်းရဲ့ ကစားသမားခေါ်ယူရေးအပိုင်းမှာ ဦးဆောင်လာတဲ့အတွက် အာတီတာက နောက်ရာသီမှာ ပရီးမီးယားလိဂ်ဖလားအတွက် ဆက်လက်ယှဉ်ပြိုင်သွားနိုင်ဖို့ သူ့ရဲ့အသင်းကို ပိုမိုအားကောင်းလာအောင် တည်ဆောက်သွားမှာဖြစ်တဲ့အတွက် အသင်းရဲ့ အပြောင်းအရွှေ့ဗျူဟာမှာ လမ်းကြောင်းသစ်တစ်ခုကို မျှော်လင့်ထားပါတယ်။ 

ဒီနွေရာသီမှာ ထိပ်တန်းတိုက်စစ်မှူးတစ်ဦးကို ခေါ်ယူဖို့က အဓိကရည်ရွယ်ချက်ဖြစ်ပြီး နယူးကာဆယ်က အလက်ဇန်းဒါအီဆက်နဲ့ စပို့တင်းက ဗစ်တာဂိုကရက်ဇ်တို့ဟာ အဓိကပစ်မှတ်တွေဖြစ်လာဖွယ်ရှိနေပါတယ်။ ဘာတာက အသင်းအတွက် ဘာတွေဆောင်ကျဉ်းပေးမလဲဆိုတာနဲ့ပတ်သက်ပြီး အာတေတာက  "ဟုတ်ပါတယ်၊ ဒါက အသင်းအတွက် အရေးပါတဲ့အရာတစ်ခုဖြစ်သလို အသင်းအတွက်လည်း အရေးပါတဲ့အရာတစ်ခုပါပဲ။ ကစားသမားသစ် ခေါ်ယူရေးဌာနက အရမ်းတော်တဲ့ လူတွေအများကြီးနဲ့ ဖွဲ့စည်းထားတဲ့ အဖွဲ့တစ်ခုပါ။ ရစ်ချတ် (ဂါးလစ်) က ဦးဆောင်နေတာပေါ့။ ဂျိမ်းစ် (ကင်း)၊ ဂျေဆန် (အေတို) နဲ့ အသင်းမှာ အရမ်းကောင်းတဲ့အလုပ်တွေ အများကြီးလုပ်နေတဲ့ လူတွေနဲ့ပါပဲ။ ဒါကြောင့် ဒီဆက်ဆံရေးကို တည်ဆောက်ရမှာပါ။ ဂျော့ခ်ျ (ခရွန်ကီ) ကလည်း လုပ်ငန်းစဉ်မှာ အပြည့်အဝပါဝင်ခဲ့တယ်လို့ ကျွန်တော်ယုံကြည်ပါတယ်။ ဒါကြောင့် သူ့ကိုတွေ့ရဖို့ ကျွန်တော်တို့အားလုံး အရမ်းစိတ်လှုပ်ရှားနေကြပါတယ်။ သူ့ကို ခင်ဗျားတို့တွေ့ခဲ့ရပြီးပြီ၊ အမြန်ဆုံး အောင်မြင်ရဖို့၊ တိုးတက်ဖို့နဲ့ တောင်းဆိုမှုတွေရှိဖို့ဆိုတဲ့ စကားလုံးတွေက အမြဲတမ်းထွက်ပေါ်လာတာပါပဲ။ သူက အရမ်းရိုးသား တည်ကြည်တဲ့သူတစ်ယောက်ဖြစ်ပြီး သူလုပ်ချင်တာတွေနဲ့ပတ်သက်ပြီး ရှင်းလင်းပြတ်သားတဲ့ ရည်ရွယ်ချက်တွေရှိပါတယ်"လို့ ပြောခဲ့ပါတယ်။

အာဆင်နယ်နည်းပြကလည်း ဘာတာဟာ အသင်းကိုရောက်ရှိလာဖို့ အရမ်းစိတ်အားထက်သန်နေတယ်လို့ ပြောကြားခဲ့ပါတယ်။ "သူက ကျွန်တော်တို့အသင်းကို ရောက်ရှိလာဖို့ အရမ်းကို စိတ်အားထက်သန်ခဲ့တာပါ။ ဒါကလည်း အကောင်းမြင်တဲ့ကိစ္စတစ်ခုပါပဲ။ ဘာလို့လဲဆိုတော့ သူမှာ တခြားရွေးချယ်စရာတွေအများကြီးရှိခဲ့ပေမဲ့ ကျွန်တော်တို့အသင်းကို ရွေးချယ်ခဲ့တာပါ။ အခုတော့ သူရဲ့အခြေအနေနဲ့ပတ်သက်ပြီး ကျွန်တော်တို့က သူလိုအပ်တဲ့ အထောက်အပံ့တွေ၊ နားလည်မှုတွေ ပေးရမှာဖြစ်ပါတယ်။ ပြီးတော့ သူက နှစ်ပေါင်းများစွာ အမြင့်ဆုံးအဆင့်မှာ လုပ်ခဲ့တဲ့အရာတွေကို စတင်လုပ်ဆောင်ဖို့ပါပဲ၊ ဒါက အရမ်းကို အထင်ကြီးစရာပါပဲ"လို့ အာတီတာက ဆိုပါတယ်။

ဘာတာရဲ့ ခန့်အပ်မှုဟာ ရေရှည်အောင်မြင်မှုနဲ့ လာမယ့်အပြောင်းအရွှေ့ဈေးကွက်ကို ရည်ရွယ်ထားပေမဲ့ လက်ရှိရာသီမှာ အာဆင်နယ်အသင်းက အရေးပါတဲ့ပွဲစဉ်တွေ ယှဉ်ပြိုင်ကစားရဦးမှာပါ။ အာဆင်နယ်အသင်းဟာ ယနေ့ည ဖူလ်ဟမ်အသင်းနဲ့ ပရီးမီးယားလိဂ်ပွဲစဉ်ကစားရမှာဖြစ်ပြီး၊ ချန်ပီယံလိဂ် ကွာတားဖိုင်နယ် ပထမအကျော့မှာ ရီးရဲလ်မက်ဒရစ်အသင်းနဲ့ ရင်ဆိုင်ကစားရမှာဖြစ်ပါတယ်။