အာဆင်နယ်အသင်းကတော့ ထွက်ခွာသွားတဲ့အားကစားဒါရိုက်တာ အီဒူးနေရာမှာ တီကိုဒါရိုက်တာဟောင်း ဘာတာနဲ့ အစားထိုးခဲ့တယ်လို့ အတည်ပြုလိုက်ပါတယ်။ ဘာတာဟာ တီကိုအသင်းကို ၂၀၁၇ ကနေ ၂၀၂၅ ဇန်နဝါရီအထိ တာဝန်ယူခဲ့တာဖြစ်ပြီး ရိုဒရီ ၊ ဂရစ်ဇ်မန်းတို့လိုကစားသမားတွေကို ဝယ်ယူနိုင်ခဲ့ပါတယ်။

အဲ့နောက် ပြီးခဲ့တဲ့နွေတုန်းက အယ်လ်ဗာရက်ဇ် ၊ ဂယ်လာဟာ ၊ လီနော်မန် ၊ ဆိုလော့တ်စတဲ့ကစားသမားတွေအတွက် ပေါင်သန်း ၁၈၀ အထိ အသုံးပြုခဲ့ပါတယ်။ အီတလီသားဟာ အာဆင်နယ်အသင်းမှာလစ်လပ်နေတဲ့ အီဒူးနေရာကို အစားဝင်မှာဖြစ်ပါတယ်။ ဘာတာက စာချုပ်ချုပ်ဆိုပြီးနောက် “အာဆင်နယ်လို စိတ်လှုပ်ရှားစရာကောင်းတဲ့အသင်းမျိုးကိုပြောင်းလာရလို့ ပျော်ပါတယ်။ကျွန်တော် ပြီးခဲ့တဲ့နှစ်တွေက အာဆင်နယ်ကို စောင့်ကြည့်ဖြစ်ပါတယ်။ သူတို့အလုပ်လုပ်ခဲ့ပုံကို ကျွန်တော် အားကျမိခဲ့တာပါ။ အခုတော့ ကျွန်တော် သူတို့နဲ့အတူ အလုပ်တွဲလုပ်ဖို့ မစောင့်နိုင်အောင်ဖြစ်နေပါပြီ။ ကျွန်တော် အမ်းမရိတ်မှာ ပရိသတ်တွေနဲ့အတူ ပထမဆုံးအတွေ့အကြုံရဖို့ မစောင့်နိုင်အောင်ဖြစ်နေပါပြီ”လို့ ဘာတာက ပြောကြားခဲ့ပါတယ်။

ဘာတာဟာ အာဆင်နယ်အသင်းရဲ့အပြောင်းအရွှေ့တွေကို တာဝန်ယူမှာဖြစ်ပြီး အာတီတာရဲ့ပရီးမီးယားလိဂ်ချန်ပီယံဖြစ်ရေးအိပ်မက်ကို ဖြစ်မြောက်အောင်ကူညီပေးရမှာဖြစ်ပါတယ်။အာဆင်နယ်ဟာ နွေရာသီမှာ တိုက်စစ်မှူးကို အဓိကခေါ်ယူမှာဖြစ်ပြီး အီဆက်ကို ဦးစားပေးပစ်မှတ်အဖြစ် သတ်မှတ်ထားပါတယ်။

ဘာတာကို ရေရှည်အတွက်ရည်ရွယ်တာဖြစ်ပြီး အာဆင်နယ်အနေနဲ့လည်း ဒီရာသီမှာ ပွဲတွေအများကြီးကန်ဖို့ ကျန်နေသေးတာဖြစ်ပါတယ်။ အာဆင်နယ်ဟာ အင်္ဂါနေ့မှာ ဖူလ်ဟမ်နဲ့ရင်ဆိုင်ရမှာဖြစ်ပြီး အဲ့နောက် ရီးရဲလ်အသင်းနဲ့ ချန်ပီယံလိဂ်ပွဲဆင်နွှဲရမှာဖြစ်ပါတယ်။