မန်ချက်စတာယူနိုက်တက်နည်းပြ ရူဘင်အာမိုရမ်က ဘန်လေအသင်းကို ၃-၂ ဂိုးနဲ့ အနိုင်ရရှိခဲ့တဲ့ပွဲစဉ်မှာ ကွန်ဟာ နဲ့ မေဆင်မောင့်တို့ ဒဏ်ရာရရှိခဲ့တာနဲ့ပတ်သက်ပြီး စိုးရိမ်ပူပန်မိကြောင်း ပြောကြားခဲ့ပါတယ်။ 

ဘရူနိုဖာနန်ဒက်စ်ရဲ့ ပင်နယ်တီသွင်းဂိုးကြောင့် အနိုင်ရရှိခဲ့တာဖြစ်ပြီး ဒါဟာ ရာသီအစမှာ မန်ယူအသင်းရဲ့ ပထမဆုံးအနိုင်ရလဒ်လည်း ဖြစ်ပါတယ်။ ကွန်ဟာက ပေါင်ခြံဒဏ်ရာကြောင့် ၃၁ မိနစ်မှာ လူစားလဲခဲ့ရပြီး မောင့်ကတော့ အတိအကျမသိရတဲ့ ဒဏ်ရာနဲ့ မိနစ် ၃၀ လောက် ကစားခဲ့ရပြီးနောက် ပွဲချိန်ဒုတိယပိုင်းမှာ ကိုဘီမိုင်နူးနဲ့ လူစားလဲခဲ့ရပါတယ်။

"ကွန်ဟာ နဲ့ မောင့်လို ကစားသမားမျိုးကို ဆုံးရှုံးခဲ့ရတာက ခက်ခဲပါတယ်။ မောင့်က ဒဏ်ရာနဲ့ မိနစ် ၃၀ လောက်ကစားခဲ့ရတယ်" လို့ အာမိုရမ်က Sky Sports ကိုပြောကြားခဲ့ပါတယ်။ 
ဒဏ်ရာပြင်းထန်မှုနဲ့ပတ်သက်ပြီး မေးမြန်းတဲ့အခါမှာတော့ "ကျွန်တော်မသိပါဘူး၊ ဒါပေမဲ့ ကျွန်တော်စိုးရိမ်ပါတယ်။ သူတို့က ကျွန်တော်တို့အတွက် အရမ်းအရေးကြီးပါတယ်" လို့ ဖြေကြားခဲ့ပါတယ်။

နိုင်ငံတကာပွဲစဉ်တွေရှိတာကြောင့် အနားယူဖို့ အချိန်ရရှိမှာဖြစ်ပြီး စက်တင်ဘာ ၁၄ ရက်နေ့မှာ မန်စီးတီးနဲ့ကစားရမယ့်ပွဲ၊ ခြောက်ရက်အကြာမှာ ချဲလ်ဆီးအသင်းနဲ့ကစားရမယ့်ပွဲတွေမတိုင်ခင် ကစားသမားတွေဟာ နှစ်ပတ်ကျော် အနားယူခွင့်ရရှိမှာဖြစ်ပါတယ်။

ဒဏ်ရာရရှိမှုတွေကြောင့် တနင်္လာနေ့ အပြောင်းအရွှေ့ကာလမပြီးခင် ယူနိုက်တက်အသင်းရဲ့ ကစားသမားခေါ်ယူရေးနည်းဗျူဟာအပေါ် သက်ရောက်မှုရှိလာနိုင်ပြီး အသင်းကို တိုးတက်ကောင်းမွန်လာအောင် ဘုတ်အဖွဲ့နဲ့ ဆွေးနွေးနေတယ်လို့ အာမိုရမ်က အတည်ပြုပြောကြားခဲ့ပါတယ်။