ဘရာဇီးလက်ရွေးစင်ဂိုးသမားအလီဆင်က အသင်းလူစာရင်းမှ နုတ်ထွက်လာပြီးနောက် အာဂျင်တီးနားနဲ့ရင်ဆိုင်ရမယ့် ကမ္ဘာ့ဖလားခြေစစ်ပွဲစဉ်ကို လွဲချော်သွားပါလိမ့်မယ်။ ကိုလံဘီယာကို ၂-၁ ဂိုးဖြင့် အနိုင်ရရှိခဲ့တဲ့ ပွဲစဉ်ရဲ့ ဒုတိယပိုင်းပွဲချိန်အတွင်း ပြိုင်ဘက်ကစားသမား ဒါဗင်ဆင်ဆန်းချက်ဇ်နဲ့ မတော်တဆထိခိုက်ခဲ့ပြီးနောက် ဦးခေါင်းဒဏ်ရာရရှိသွားတဲ့ အလီဆင်ကို လူစားလဲလှယ်ခဲ့ပါတယ်။

လတ်တလောမှာ လီဗာပူးကြယ်ပွင့်က နောက်ထပ်စစ်ဆေးစမ်းသပ်မှုတွေခံယူဖို့ လက်ရွေးစင်အသင်းလူစာရင်းမှနုတ်ထွက်ကာ မာဆေးဆိုဒ်ဒေသဆီ ပြန်လည်ရောက်ရှိလာပါလိမ့်မယ်။ သူ့ရဲ့လက်ရွေးစင်အသင်းဖော်တွေကတော့ အာဂျင်တီးနားအသင်းကို ဆက်လက်ရင်ဆိုင်သွားပါမယ်။ လီဗာပူးအသင်းရဲ့ထုတ်ပြန်ချက်တစ်ခုမှာ “ အလီဆင်ဘက်ကာက ဘရာဇီးလက်ရွေးစင်အသင်းလူစာရင်းမှ နုတ်ထွက်ပြီး လီဗာပူးမြို့ဆီ ပြန်လည်ရောက်ရှိလာပါလိမ့်မယ်။ ထိခိုက်မှုတစ်ခုအပြီး ကိုလံဘီယာနဲ့ရင်ဆိုင်ရတဲ့ သောကြာနေ့အစောပိုင်း၊ ကမ္ဘာ့ဖလားခြေစစ်ပွဲစဉ်ရဲ့ ဒုတိယပိုင်းပွဲချိန်အတွင်း ဂိုးသမားကို လူစားလဲခဲ့ရပါတယ်။ အလီဆင်က မာဆေးဆိုဒ်ဒေသဆီ ပြန်လာနေပြီး အသင်းဆေးဝန်ထမ်းတွေရဲ့လေ့လာအကဲဖြတ်မှုကို ခံယူသွားပါလိမ့်မယ်”လို့ ဖော်ပြပါရှိပါတယ်။

ကြိုးကြာနီတွေကတော့ မကြာမီမှာပဲ အလီဆင်ရဲ့ဒဏ်ရာအခြေအနေအပြည့်အစုံကို သိရှိသွားရပါလိမ့်မယ်။ နည်းပြအန်းစလော့ကလည်း ဂိုးသမားကို ဧပြီ ၂ ရက်၊ အဲဗာတန်နဲ့ရင်ဆိုင်ရမယ့် မာဆေးဆိုဒ်ဒါဘီပွဲစဉ်မှာ ပါဝင်ကစားနိုင်ဖို့ မျှော်လင့်နေပါလိမ့်မယ်။