မန်စီးတီးနည်းပြ ပက်ဂွါဒီယိုလာဟာ ဒီအပတ်မှာကစားမယ့် ဖူလ်ဟမ်နဲ့ပွဲစဉ်မတိုင်ခင် သတင်းမီဒီယာတွေနဲ့ တွေ့ဆုံစကားပြောခဲ့ပါတယ်။

ဒီနှစ်သင်းဟာ လွန်ခဲ့တဲ့ လအနည်းငယ်က ခရေဗင်ကော့တစ်ချ်ကွင်းမှာ စီးတီးက ၅-၄ ဂိုးနဲ့ အကြိတ်အနယ်အနိုင်ရခဲ့တဲ့ ပွဲစဉ်ပြီးကတည်းက အခုမှ ပထမဆုံးအကြိမ် ပြန်လည်ရင်ဆိုင်ရမှာပါ။ ဒီတစ်ကြိမ်မှာတော့ အီတီဟတ်ကွင်းမှာ ယှဉ်ပြိုင်ကြမှာဖြစ်ပြီး စီးတီးဟာ နောက်ဆုံးကစားခဲ့တဲ့ ပရီးမီးယားလိဂ်အိမ်ကွင်း ၁၇ ပွဲမှာ ရနိုင်ခြေ ၅၁ မှတ်ထဲက ၄၄ မှတ်အထိ ရယူထားနိုင်တဲ့ မှတ်တမ်းကောင်းပိုင်ဆိုင်ထားပါတယ်။

ဂွါဒီယိုလာရဲ့အသင်းဟာ စပိန်လူမျိုးနည်းပြလက်ထက် အန်ဖီးလ်ကွင်းမှာ ၁၀ ပွဲကစားရာမှာ တစ်ပွဲသာနိုင်ဖူးတဲ့မှတ်တမ်းကို ချိုးဖျက်ပြီး လီဗာပူးကို အဝေးကွင်းမှာ ရှားရှားပါးပါး အနိုင်ရခဲ့တဲ့ပွဲအပြီးမှာ အခုပွဲကို ယှဉ်ပြိုင်ရမှာဖြစ်ပါတယ်။

"လက်ရှိမှာ အမှတ်ကွာဟချက်က သိပ်မကြီးသေးပေမဲ့ အာဆင်နယ်ရဲ့ ခြေစွမ်းအရဆိုရင် ၆ မှတ်ဆိုတာ အများကြီးပါပဲ။ ပြီးခဲ့တဲ့လတွေ ဒါမှမဟုတ် အပတ်တွေတုန်းက ပွဲမတိုင်ခင် အင်တာဗျူးတွေမှာဆိုရင် 'ခင်ဗျားတို့ ရှုံးရင်တော့ အကုန်ဆုံးရှုံးပြီ၊ ကမ္ဘာမြေပေါ်ကနေတောင် ပျောက်ကွယ်သွားတော့မှာ' ဆိုတဲ့ လေသံမျိုးတွေနဲ့ ရင်ဆိုင်ခဲ့ရပါတယ်" လို့ ဂွါဒီယိုလာက ဆိုပါတယ်။

နိုင်ပွဲအပေါ် တုံ့ပြန်မှုနဲ့ပတ်သက်ပြီး "မနေ့ကလည်း ကစားသမားတွေကို မတွေ့ရသေးသလို ဒီနေ့လည်း မတွေ့ရသေးပါဘူး၊ စောင့်ကြည့်ရမှာပါ။ အမှတ်ကွာဟချက်က သိပ်မဝေးသေးပေမဲ့ အာဆင်နယ်လုပ်ပြနေတာတွေနဲ့ဆိုရင် ၆ မှတ်က အများကြီးပါပဲ။ နောက်ထပ် ရင်ဆိုင်ရမယ့် ဖူလ်ဟမ်ကလည်း နှစ်တိုင်း ပိုပိုကောင်းလာတဲ့အသင်းမျိုးပါ" လို့ သူက ဆက်ပြောပါတယ်။

နောက်ဆုံးအနေနဲ့ စီးတီးရဲ့ ခံစစ်ပိုင်းပြဿနာတွေ ပိုဆိုးလာချိန်မှာ ဒီရာသီ ၂၅ ပွဲမှာ ၃၅ ဂိုးအထိ သွင်းထားတဲ့ ဖူလ်ဟမ်ရဲ့ ထက်မြက်တဲ့တိုက်စစ်ကို ဘယ်လိုတားဆီးမလဲဆိုတဲ့ မေးခွန်းကိုလည်း ဂွါဒီယိုလာက ဖြေကြားခဲ့ပါတယ်။

"သူတို့က ရာသီတိုင်း ပိုကောင်းလာတာပါ။ ကစားသမားတွေရဲ့ လှုပ်ရှားမှုတွေက တကယ်ကို ကောင်းပါတယ်။ ကစားကွက်တည်ဆောက်ပုံ၊ အရည်အသွေး၊ တည်ငြိမ်မှုနဲ့ အရှိန်အဟုန်တွေကလည်း အဆင့်အတန်းရှိပါတယ်။ မာကို (ဆေးလ်ဗား) ဟာ ကျွန်တော်ရင်ဆိုင်ဖူးသမျှထဲမှာ အတော်ဆုံး နည်းပြတွေထဲက တစ်ယောက်ပါပဲ။ နောက်နှစ်အနည်းငယ်အတွင်းမှာ ထိပ်တန်းနည်းပြတစ်ယောက် ဖြစ်လာဖို့ သေချာပေါက် ကံပါလာသူပါ" လို့ ဂွါဒီယိုလာက ချီးကျူးစကား ပြောကြားခဲ့ပါတယ်။